6 millions ya bantu me kufwa na kimbevo ya COVID-19—Yinki Biblia ke zonzaka?

Na kilumbu ya 23 mai 2022, kimvuka yina ke tadilá mambu ya mavimpi na yinza (OMS), zonzá ti bantu 6,27 millions me kufwa na kimbevo ya COVID-19. Kasi na kilumbu ya 5 mai 2022, ba zonzá ti kana ba tala mbote-mbote, lutangu ya bantu yina me kufwa na COVID-19 me lutila. Ba lakisá ti na kati ya bamvula 2020 na 2021, “lutangu ya bantu nyonso yina me kufwa na COVID-19 lenda vanda pene-pene na 15 millions.” Ya ke kwandi na mambu yina Biblia ke zonzá samu na mambu ya mpasi yayi?

Biblia zonzilá bimbevo yina ke kufwa bantu mingi

• Yesu zonzilá ntangu yina “bimbevo ya nene” ke mwangana. Biblia ke bokilá ntangu yango “bilumbu ya nsuka.”—Luke 21:11; 2 Timote 3:1.

Mambu yina Yesu zonzá ke na lunganá bubu yayi. Samu na kuzaba dyaka mingi, tanga “Yinki ke kidimbu ya ‘bilumbu ya nsuka,’ to ‘nsuka ya yinza’?”

Biblia ke pesá ngolo na mantwala ya bampasi

• “Nzambi yina ke katulaka kyadi ya bantu nyonso [. . .] ke katulaka beto kyadi na bampasi nyonso yina ke kuminaka beto.”—2 Bakorinto 1:3, 4.

Bantu mingi yina fwidilá bantu kuzwá ngolo na mambu yina Biblia ke zonzaka. Samu na kuzaba dyaka mingi, tanga “ Comment revivre : ce que vous pouvez faire ’’ mpe “ Une aide incomparable. ’’

Biblia ke lakisá ti Kimfumu ya Nzambi ke bongisa bamambu

• “Bika Kimfumu ya nge kukwiza, mpe luzolo ya nge kusalama na ntoto mutindu yawu ke salamaka na mazulu.”—Matayi 6:10.

Na mwa ntangu fioti, “Kimfumu ya Nzambi” ke sala ti ata ‘muntu mosi ve yina ke zingaka na yinsi zonza: “Munu ke na beelaka.”’ (Marke 1:14, 15; Izaya 33:24) Tala video Kimfumu ya Nzambi ke yinki?, samu na kuzaba yinki ke Kimfumu ya mazulu mpe yinki ya ke sala.

Beto ke na lombá na nge na kusosa kuzaba dyaka mingi Biblia samu nge na dikanda ya nge kuzwa bambote ya malongi mpe bansilulu ya kitoko yina ke na kati.