Na yinza nyonso, bansangu ya bantu yina ke kufwá bampangi na minduki. Yinki Biblia ke zonzá na mambu yayi?

Na ngonda ya juillet 2022, beto me wa mingi mambu ya bantu yina ke kufwá bampangi na minduki. Yayi ke mwa bamambu yina me salama:

• “Na bwala ya Japon, bamambu ya ngolo ke salamá ve mingi, mpe ba ke na misiku yina ke salá ti ya vanda mpasi na kuvanda na minduki. Na yawu, ntangu bantu ya Japon me kuwa ti ba me kufwa Shinzo Abe, yina vandá mfumu ya bwala na ntama, ya me pesa bawu boma. Mambu yango me kamwisa mpe bantu ya yinza nyonso.”—Journal The Japan Times ya kilumbu ya 10 juillet 2022.

• “Bantu ya Danemark me pamuka ntangu ba me kuwa ti bakala mosi me kufwa bantu tatu na munduki na zandu mosi ya nene.”—Journal Reuters ya kilumbu ya 4 juillet 2022.

• “Afrique du Sud: Na nganda mosi na Soweto, ba me kufwa bantu 15 na minduki.”—Journal The Guardian ya kilumbu ya 10 juillet 2022.

• “Na kati ya bilumbu ya 1^er tii 4 juillet, na États-Unis, ba me kufwa bantu kuluta 220 na minduki.”—Journal CBS News ya kilumbu ya 5 juillet 2022.

Beto lenda vanda kwandi na kivuvu ti bamambu ya ngolo ya mutindu yayi ke manisa? Yinki Biblia ke zonzaka?

Bamambu ya ngolo ke manisa

Biblia ke zonzá ti beto ke na zingá na “bilumbu ya nsuka,” ntangu yina bantu ke sala bamambu ya ngolo mpe ya yimbi mingi. (2 Timote 3:1, 3) Ntangu bamambu ya mutindu yayi ke salamá, ya ke pesá bantu boma. (Luke 21:11) Kasi, Biblia ke pesá beto nsilulu ti na mwa ntangu fioti bamambu ya ngolo ke manisa, mpe ‘bantu ke zinga na kisika ya ngemba, na bisika ya kuzinga na kizunu na bisika ya kupema mpe ya swi.’ (Izaya 32:18) Wapi mutindu bamambu ya ngolo ke manisa?

Nzambi ke katula bantu nyonso ya yimbi mpe yandi ke sala ti minduki vanda dyaka ve.

• ‘Bantu ya yimbi, bawu ke katula bawu na ntoto.’—Bingana 2:22.

• ‘Nzambi ke sukisa bamvita na ntoto ya mvimba. Yandi ke buka munduki ya madyonga mpe dikonga; yandi ke yoka bapusu-pusu ya basoda na tiya.’—Nkunga 46:9.

Samu Nzambi ke longa bantu na kuzinga na kizunu, bamambu ya ngolo ke vanda dyaka ve.

• ‘Bawu ke sala ata yimbi mosi ve mpe ke bebisa ata kima mosi ve na mongo ya munu nyonso ya santu, samu ntoto ke fuluka tsyeleka na nzayilu ya Yehova mutindu bamaza ke fulusaka nzadi ya mungwa.’—Izaya 11:9.

• Bubu yayi, Nzambi ke longá bantu ya yinza nyonso na kulosa bamambu ya ngolo mpe na kusadila dyaka ve minduki. Ba ke longoká na ‘kukumisa bambele ya bawu ya bamvita bima ya kusaba bilanga.’—Mika 4:3.

Samu na kuzaba dyaka mingi na nsilulu yina Nzambi pesá ti bantu ke zinga dyaka ve na boma, tanga disolo “ Affranchis de la peur : est-ce possible ?”

Samu na kuzaba dyaka mingi yinki Nzambi ke sala samu na kukatula bamambu ya ngolo samu na ntangu nyonso, tanga disolo “ Enfin la paix sur la terre !”