Mambu ya kukubula bantu na balukolo. Yinki Biblia ke zonzaka?

Na kilumbu ya 24 mai 2022, mambu mosi ya mpasi mingi salamá na Uvalde, na Texas, na bwala ya États-Unis. Mutindu journal mosi (The New York Times) zonzak’ yawu, na lukolo mosi “bakala na munduki kufwá bana 19 na bakento zole yina vandá longá kuna.”

Mambu ya kyadi ke ti bamambu ya mutindu yayi ke salamá mingi. Journal USA Today zonzá ti kaka na bwala ya États-Unis “mambu ya mutindu yayi me salama bambala 249 na mvula yina me luta. Kana beno tala bamvula kubanda 1970 tii bubu yayi, ya ke mbala ya ntete na kutala lutangu ya mutindu yayi.”

Samu na yinki bamambu ya mpasi yayi ke salamaka? Wa’ faso beto lenda zwa ngolo ntangu ya ke salamaka? Beto lenda vanda kwandi na kivuvu ti bamambu ya ngolo ke manisa? Biblia ke pesá bamvutu na byuvu yayi.

Samu na yinki yinza ke na kumá kaka na bamambu ya ngolo?

• Biblia ke bokilá ntangu ya beto “bilumbu ya nsuka.” Ya ke lakisá ti na ntangu yayi, bantu mingi ke vanda na “ntima ngolo” mpe ba ke vanda na “myangu.” Ya zola zonza ti ba ke sala bamambu ya ngolo mpe ya yimbi mingi. Bantu ya mutindu yayi “ke lutila na kusala yimbi.” (2 Timote 3:1-5, 13) Na kuzaba dyaka mingi, tala “Biblia zonzilá kwandi mavanga yina bantu ke vanda na yawu na ntangu ya beto?”

Bantu mingi ke yufulaka: ‘Samu na yinki Nzambi ke biká bamambu mutindu kukubula bantu na balukolo salama?’ Samu na kuzwa mvutu ya Biblia, tanga “Pourquoi les innocents souffrent-ils ?”

Wa’ faso beto lenda zwa ngolo ntangu bamambu ya mpasi ya mutindu yayi ke salamaka?

• “Mambu nyonso yina ke na Dibuku ya Nzambi sonamaka samu na kulongisa beto, samu ti na lusalusu ya [. . .] kibakala yina yawu ke pesa beto, beto vanda na kivuvu.”—Baroma 15:4.

Malongi ya Biblia lenda sadisa nge ntangu bamambu ya ngolo ke salamá na yinza yayi. Samu na kuzaba dyaka mingi, tanga Réveillez-vous ! yina ke na yintu dyambu “La violence cessera-t-elle un jour ?”

Na disolo “Enfants et actualités troublantes,” bibuti lenda kuzwa malongi samu na kusadisa bana ya bawu ntangu ba ke wá to ke talá bansangu ya yimbi.

Ya ke kwandi na kilumbu yina bamambu ya ngolo ke manisa?

• ‘Yandi ke vuukisa bawu na bampasi mpe na mubulu.’—Nkunga 72:14.

• ‘Ba ke kumisa bambele ya bawu ya bamvita bima ya kubundudila ntoto mpe ba ke kumisa makonga ya bawu bakupe-kupe. Dikanda mosi ke nanguna ve mbele ya bamvita samu na kunwanisa dikanda ya nkaka, ba ke longoka mpe dyaka ve bamvita.’—Mika 4:3.

Nzambi ke sala mambu yina bantu ke na lendá ve kusala. Kimfumu ya yandi yina ke na mazulu, ke kwiza katula minduki nyonso mpe bamambu nyonso ya ngolo. Samu na kuzaba mingi na yina Kimfumu ya Nzambi ke sala, tanga “Sous le royaume de Dieu, ‘ la paix abondera. ’”