Beto me bika ve bampangi ya beto na bampasi yina kuminá bawu na mvula 2021

Bampasi yina me nata COVID-19 manisá ve na mvula ya kisalu 2021.a Mutindu beto zonzilá yawu na “Faso ba me sadisa bampangi na kati ya COVID-19,” beto me basisa ba millions ya ba dollarsb samu na kubakisa bampangi na kati ya kimbevo ya COVID-19, mpe beto me tula ba comités de secours kuluta 950 na yinza nyonso.

Kaka maladie ya COVID-19 ve me natina bampangi ya beto bampasi. Ya ke mpe na bamambu mutindu kuningana ya ntoto, mupepe ya ngolo, mpe bima ya nkaka me natina bawu bampasi. Mpe bampasi ya nkaka me katuka na bamambu ya yimbi yina bantu ke salaka. Bampasi nyonso yayi lutá lutangu ya 200 na yinza nyonso. Comité des coordinateurs ya Kimvuka ya Bantwadisi ndimá ti ba basisa 8 millions ya ba dollars (kuluta 4,5 milliards ya ba Francs CFA) samu na kusadisa bampangi na bampasi yina. Beto tala faso ba me sadila makabu ya beno samu na kusadisa bampangi yina kutaná na bamambu ya mpasi zole.

Tiya me basika na Mongo Nyiragongo

Na kilumbu ya 22 Mai 2021, tiya bandá kubasika na Mongo Nyiragongo na République démocratique du Congo. Tiya yango, yina ke basiká mutindu poto-poto, mwangisá bayinzo, ba l’école mpe kisika mosi ya nene yina ba ke bumbá maza. Kasi kaka tiya ya poto-poto ve vandá yimbi samu na bantu. Na bilumbu yina landá, mulinga na fundu-fundu ya tiya vandá mwangana na bwala ya Goma, mpe ntoto ninganá mwa fioti bambala 12. Ya natá luyalu na kuzonza na bantu na kukatuka na bwala. Mingi na kati ya bawu kwendá na Rwanda.

Na kati ya bantu yina katuká na bwala ya Goma, bambangi ya Yehova vandá 5 000. Ba ya nkaka vandá dyaka ve na kisika ya kuvanda samu tiya mwangisá bayinzo ya bawu. Mpe ba ya nkaka, ntangu ba kwendá, ba yibá bima nyonso yina vandá na bayinzo ya bawu. Ba comités de secours ya Rwanda mpe ya République démocratique du Congo, twadisá kisalu ya kubakisa bampangi. Filiale ya Congo Kinshasa me zonza mambu yayi samu na comité de secours mosi: “Ata muvusu nyonso yina vandá na bwala, mpe tekila luyalu zonza na bantu na kukatuka na Goma, comité de secours bandá kukabula madya, maza, bima ya kulalila, mpe bilele. Na bwala mosi yina bampangi 2 000 kwendá, comité de secours yidiká ba tentes, kabulá ba masques, mpe zonzilá bawu yinki ya kusala samu na kuzwa ve COVID-19 na cholera.

Na kati ya bangonda 3 yina landá mpasi yayi, bampangi ya beto kwizá kabula ba tonnes kuluta 6 ya loso, ba tonnes 6 ya fufu ya masangu, ba tonnes 3 ya mafuta ya kulambila, mpe ba tonnes 3 ya maza. Samu na kusadila mbongo na faso ya mbote, filiale sumbá madya mingi na kisika yina bampangi vandaka. Ba sumbá ve yawu na babwala ya nkaka, samu ya zolá vanda ntalu.

Tiya yina basiká na Mongo Nyiragongo mwangisá yinzo yina mpangi mosi ya kento tungá ntama mingi ve. Mpangi yango me zonza: “Ya salá munu mpasi mingi mpe ya lembisá munu.” Na manima, dikanda ya yandi kuzwá madya mpe bima ya nkaka. Bampangi kwizá pesa mpe bawu ngolo samu ba vanda kaka ya kukangama na Yehova. Yandi me zonza: “Yehova ke sadisá beto ntangu nyonso samu na kuzwa yina beto ke na yawu nsatu. Beto me kwiza tala ti Yehova ke baká kilo ya beto, mpe yandi ke salá ti bamambu vanda ve mpasi samu na beto.”

Kuzwa mbongo na Venezuela me kuma mpasi mingi

Na kati ya bamvula yayi me luta tii bubu yayi, kunata luzingu na Venezuela me kuma mpasi mingi. Mbongo ke na talaná dyaka ve na bwala. Luzingu ya bampangi ya beto ya kento na ya bakala yina ke vandá kuna me beba. Kuzwa madya me kuma mpasi, mpe bubandi me lutila. Kasi, kimvuka ya Yehova me bika ve bawu.

Na mvula yina me luta, beto me basisa mbongo kuluta 1,5 million ya ba dollars (kuluta 850 millions ya ba Francs CFA) samu na kusumba mpe kunata madya na ba savons na bampangi ya beto ya Venezuela yina ke na kati ya mpasi. Bampangi ya filiale ya Venezuela zonzaka: “Ya ke ve kima ya fioti kunata bangonda nyonso 130 tonnes ya madya na bampangi ya beto na bisika nyonso ya Venezuela. Mpe kusala ti madya yango kuma tii na maboko ya bawu na mutindu ya mbote.” Samu madya beba ve na nzila, bampangi ke sumbá madya yina ke bolá ve na mbangu. Bampangi ya filiale me bwela: “Samu beto kuzwa madya na ntalu ya fioti, beto ke sumbá madya mingi na mbala mosi. Beto ke sosá madya yina me kuma mingi na zandu. Na manima, beto ke sosá faso ya kufilisa yawu, yina ke lombá ve mbongo mingi.”

Leonel, mpangi mosi yina ke salá na comité de secours na Venezuela, ke zolá kisalu yina yandi ke salaka. Yandi me zonza: “Ya ke kisalu mosi ya kitoko. Ya me pesa munu ngolo na manima ya lufwa ya kento ya munu na maladie ya COVID-19. Mu ke na mingi ya kusala, mpe mu ke na talá ti yina mu ke salá ke sadisá bampangi ya munu na kati ya mpasi. Mu ke na talá na meso ya munu faso Yehova ke na lungisá mambu yina yandi zonzá ti yandi ke bika ve bisadi ya yandi.”

Mpangi mosi yina kuzwá madya, vandá na ntama, mosi ya bampangi ya comité de secours. Yandi me zonza: “Ntangu yayi, ni munu vandá na nsatu ba sadisa munu. Beto kuzwá ve kaka madya na bima ya nkaka. Bampangi sadisá munu na kento ya munu na kuvanda ve na boma. Ba kipeke beto, ba pesá beto ngolo mpe bukindi.”

Bamambu ya nkaka ya mpasi ke kuminá beto na ntangu yina beto ke ve na vingilá yawu. Ata faso yina, na nzila ya makabu ya beno, bambala mingi kimvuka ya Yehova ke lendá kuzwa mpe kukabula na mbangu bima yina bampangi ke na yawu nsatu. Na kati ya site ya beto donate.jw.org, beno ke kuzwa bafaso ya kupesa makabu. Beto ke sepelá mingi na makabu yina beno ke pesá na ntima mosi.