“Wa’ faso beto lenda sadisa bampangi na ntangu ya mambu ya mpasi mutindu bamvula ya nene?”

Bamambu ya mpasi mutindu bamvula ya nene ke na salamá mingi bubu yayi. Ntangu ya ke salamá, ya ke mfunu na kubongisa mpe kutwadisa kisalu samu ya luta na faso ya mbote. Na yawu, na bafiliale nyonso, Kimvuka ya Bantwadisi tulá Biro samu na kusadisa ba yina mpasi ya nene me kumina bawu.

Ntangu bampangi ya Biro yayi ke kuwá ti mpasi ya nene me kumina bampangi, na mbangu nyonso ba ke bokilá bakuluntu ya kisika yina ya me salama samu na kuzaba wapi bima bampangi ke vanda na yawu nsatu. Kana mambu yina me salama ke ngolo mingi, mpe bampangi yina ke vandá kuna lenda lenda ve kuyidika bamambu bawu mosi, filiale ke filisa bampangi yina zaba mbote-mbote kisalu samu na kutwadisa kisalu ya kusadisa bampangi. Bampangi yayi lenda lomba bampangi ya nkaka na kwiza tula diboko mpe kulomba na bampangi na kupesa bima yina bampangi lenda vanda na yawu nsatu, to ba lenda sumba na kisika ba kele bima yina bampangi ke na yawu nsatu mpe kukabula bawu yawu.

Ya ke mbote na kusala bamambu mutindu yayi. Ya ke salá ti muvusu vanda ve, bampangi sala ve kisalu ya mpamba mpe ba bebisa ve mbongo to bima. Ya lenda salama kana muntu ni muntu sosa kusala mambu na faso ya yandi.

Bampangi yina filiale ke filisa lenda tala lutangu ya mbongo yina ba ke na yawu nsatu mpe bampangi yikwa ba lenda lomba na kukwiza tula diboko na kisalu. Ba lenda solola mpe na bantu ya luyalu ya kisika yina ba kele. Ntangu ya nkaka, luyalu lenda sadisa beto na kusala kisalu na mbangu. Na yawu, ya me bonga ve bampangi baka mukanu na kukutika mbongo bawu na bawu, na kufilisa bampangi bima, to na kukwenda kisika yina mambu me salama kana ba me bokila ve bawu.

Ntembe ve, ntangu mpasi ya nene ke kubwá, beto ke vandá na nsatu ya kusadisa bampangi. (Ebr 13:16) Beto ke zolá bampangi ya beto. Na yawu, yinki beto lenda sala? Mambu ya kulutila mfunu, ni kusambila samu na bampangi ya beto yina mpasi me kumina mpe samu na ba yina ke sadisá bawu. Beto lenda pesa mpe makabu samu na kisalu yina ke salamá na yinza nyonso. Na lutwadusu ya Kimvuka ya Bantwadisi, ba comités ya filiale zaba wapi kisika mbongo yina lenda sadisa mingi bampangi. Kana beto zola kwenda sadisa bampangi yina mambu ya mpasi me kumina, beto lenda fulusa mukanda Demande d’admission comme volontaire local de développement-construction (DC-50).

TALA VIDEO BAMVULA YA NENE ME DYAMISA BAYINZO NA BRÉSIL, MPE NA MANIMA PESA MVUTU NA KYUVU YAYI:

Yinki me simba ntima ya nge na kutala mutindu Bambangi ya Yehova sadisá bampangi ya bawu ntangu mvula dyamisá bayinzo na Brésil na 2020?