Yesu me kufwa na Gologota

Bamfumu ya banganga-nzambi me nata Yesu na yinzo ya kimfumu ya Pilate. Pilate yufulaka bawu: ‘Wapi mambu muntu yayi me sala?’ Ba vutulaka: ‘Yandi ke na zonzaka ti yandi ke mfumu!’ Pilate yufulaka Yesu: “Ni nge Mfumu ya Bazwife?” Yesu zonzaka na yandi: “Kimfumu ya munu ke ve ya yinza yayi.”

Na manima Pilate filisaka Yesu na sika ya Erode, mfumu ya kizunga ya Galile, samu na kutala kana Erode ke kuzwa mambu ya kufunda yandi. Erode kuzwaka ata mambu ya kufunda yandi. Na yawu, yandi vutulaka Yesu na sika ya Pilate. Na manima Pilate zonzaka na bantu: ‘Ya vanda munu to Erode beto me kuzwa ata mambu ya kufunda yandi. Mu ke bika yandi.’ Bantu zonzaka na ndinga ya ngolo: ‘Kufwa yandi! Kufwa yandi!’ Basoda bulaka yandi bashikoti, losilaka yandi mante, mpe bulaka yandi. Ba tulaka yandi yimpu ya bansende na yintu mpe samu na kuseka yandi ba vanda zonza: ‘Mbote, Mfumu ya Bazwife.’ Pilate zonzaka dyaka na bantu: ‘Mu na talaka ata mambu ya yimbi na muntu yayi.’ Kasi bantu nyonso zonzaka na ndinga ya ngolo: “Tula yandi na yinti!” Na yawu, Pilate pesaka bawu Yesu samu ba kufwa yandi.

Ba nataka Yesu na kisika yina ba ke bokilaka Gologota, ba komaka yandi na zulu ya yinti, mpe ba telemisaka yinti yango. Yesu sambilaka: ‘Tata, lemvokila bawu, samu ba zaba ve mambu yina ba ke na salaka.’ Bantu vanda seka Yesu, ba vanda zonza: ‘Kana nge ke Mwana ya Nzambi, kulumuka na yinti! Vuukisa nge mosi.’

Mosi ya bimpumbulu yina ba komaka pene-pene na Yesu zonzaka na yandi: “Yesu, bambukila munu moyo ntangu nge ke kwiza na Kimfumu ya nge.” Yesu salaka yandi nsilulu: “nge ke vanda na munu na paradiso.” Na manima ya midi, bwala nyonso kumaka kitombi na kati ya bangunga tatu. Bilandi ya yandi ya nkaka bikanaka pene-pene na yinti. Na kati ya bawu ya vandaka na Maria mama ya Yesu. Yesu lombaka na Yoane na kukipe Maria mutindu yandi ke mama ya yandi.

Na kumanisa, Yesu zonzaka: “Ya me lungana!” Yandi talaka na yisi mpe yandi kufwaka. Kaka na ntangu yina, ntoto ninganaka ngolo. Na tempelo, rido yina vanda kabula Kisika ya Santu na Kisika ya Kulutila Santu pasukaka na kati-kati. Mfumu mosi ya basoda zonzaka: ‘Muntu yayi vandaka ya tsyeleka Mwana ya Nzambi.’