Yehova bumbaka Yesu

Na esti ya Izraele, ya vandaka na bantu yina vanda kanisaka ti bambwetete lenda twadisa bantu. Na mpimpa mosi, babakala yina katukaka na Esti talaka kima mosi yina vanda ngenga mutindu mbwetete mpe yina vanda tambula, mpe ba landaka yawu. Mbwetete yango “nataka” bawu na Yeruzalemi. Babakala yango bandaka kuyufula na bantu: ‘Wapi kisika kele mwana yina ke vanda mfumu ya Bazwife? Beto me kwiza fukama na mantwala ya yandi.’

Ntangu Erode mfumu ya Yeruzalemi kuwaka nsangu ya mfumu ya malu-malu, yandi kumaka na boma mingi. Yandi yufulaka na bamfumu ya banganga-nzambi: ‘Wapi kisika mfumu yango ke butuka?’ Ba vutulaka yandi: ‘Bambikudi zonzaka ti yandi ke butuka na Betelemi.’ Na yawu, Erode bokilaka babakala yina katukaka na Esti mpe yandi zonzaka na bawu: ‘Beno kwenda sosa mwana yina na Betelemi. Na manima beno vutuka awa samu beno zonzila munu kisika yandi kele. Munu mpe ke kwenda fukama na mantwala ya yandi.’ Kasi yandi vanda vuna.

“Mbwetete” bandaka dyaka kukwenda. Babakala yango landaka yawu tii na Betelemi. “Mbwetete” yango kwendaka telama na zulu ya yinzo mosi mpe ba kotaka na yinzo yango. Ba talaka Yesu na mama ya yandi Maria. Ba fukamaka na mantwala ya mwana mpe ba pesaka yandi makabu ya wolo, maaka ya nsunga ya kitoko, mpe mananasi ya mire. Ya ke kwandi ni Yehova filisaka babakala yayi kisika yina Yesu vandaka? Ve.

Kaka na mpimpa yina, Yehova zonzaka na Yozefi na ndosi: ‘Erode ke na sosaka kufwa Yesu. Baka kento ya nge na mwana, beno kima na Ezipte. Beno vanda kuna tii ntangu mu ke zonza na nge ti beno lenda vutuka.’ Na mbala mosi, Yozefi na dikanda ya yandi kwendaka na Ezipte.

Yehova zonzaka na babakala yina katukaka na Esti na kuvutuka ve na Erode. Ntangu Erode kwizaka zaba ti ba ke vutuka ve, yandi dasukaka mingi. Samu Erode zabaka ve kisika yina Yesu vandaka, yandi pesaka musiku ti ba kufwa bana nyonso ya babakala yina vandaka mvula mosi na Yesu na bwala ya Betelemi. Kasi Yesu vuukaka, samu ba nataka yandi na Ezipte.

Na manima ya mwa bantangu, Erode kufwaka. Yehova zonzaka na Yozefi: ‘Ntangu yayi nge lenda vutuka.’ Yozefi, Maria, mpe Yesu vutukaka na Izraele, mpe ba kwendaka vanda na mbanza ya Nazareti.