Disolo na zulu ya mongo

Na manima ya kusoola bantumwa 12, Yesu katukaka na zulu ya mongo mpe kwendaka kisika yina bantu vandaka mingi. Bantu yayi katukaka na Galile, Zude, Tire, Sidoni, Siri, mpe na bisika ya nkaka ya Yordani. Ba nataka bantu yina vandaka na bimbevo mpe ba yina bampeve ya yimbi vanda kwamisa. Yesu belusaka bawu nyonso. Na manima yandi vandaka pene ya mongo mpe bandaka kuzonza. Yandi zonzaka pwelele yinki beto me fwana kusala samu na kuvanda bandiku ya Nzambi. Beto me fwana kundima ti beto ke na nsatu ya Yehova mpe kulongoka kuzola yandi. Kasi beto lenda zola ve Nzambi kana beto ke zolaka ve bantu ya nkaka. Beto me fwana kulakisa ntima ya mbote mpe kubakila bantu nyonso na mutindu ya mbote, ata mpe bambeni ya beto.

Yesu zonzaka: ‘Beno me lunga ve kaka na kuzola bampangi ya beno. Beno me fwana kuzola mpe bambeni ya beno mpe kulemvokila bantu na ntima nyonso. Kana muntu me dasukila nge, kwenda mbala mosi na sika ya yandi mpe lomba mulemvo. Bakila bampangi mutindu nge zola ti ba bakila nge.’

Yesu pesaka mpe bantu malongi ya mbote na mutindu ya kubakila bima ya yinza. Yandi zonzaka: ‘Ya ke mfunu mingi na kuvanda ndiku ya Yehova na kisika ya kuvanda na mbongo mingi. Muyibi lenda laba mbongo ya nge, kasi ata muntu lenda laba kindiku ya nge na Yehova. Kuvanda ve na maketi-keti na yina me tadila yinki nge ke kudya, yinki nge ke kunwa, to yinki nge ke lwata. Tala bandeke! Nzambi ke yidikaka ntangu nyonso bamambu samu ba vanda na yina me lunga na kudya. Maketi-keti ke bwela ata kilumbu mosi na luzingu ya nge. Kuzimbana ve, Yehova zaba yina nge ke na yawu nsatu.’

Bantu yayi vandaka nabunu ba kuwa muntu kuzonza faso Yesu. Bamfumu ya mabuundu ya bawu longaka ve bawu bamambu yayi. Samu na yinki Yesu vandaka mulongisi ya nene? Samu mambu nyonso yina yandi vanda longa katukaka na Yehova.