Mabuundu nyonso ke kwandi faso mosi? Bawu nyonso ke nataka kwandi na Nzambi?

Mvutu ya Biblia

Ve, mabuundu nyonso ke ve faso mosi. Biblia ke zonzilaka bifwani mingi ya mabuundu yina ke sepelisaka ve Nzambi. Beto lenda kabula mabuundu yango na bikunku zole.

Kikunku 1: Mabuundu yina ke sambilaka banzambi ya luvunu

Biblia ke sadilaka banzozolo “luvunu,” “mpamba,” mpe “kukondwa mfunu,” samu na kuzonzila mabuundu yina ke sambilaka banzambi ya luvunu. (Yeremi 10:3-5; 16:19, 20) Yehovaa pesaka musiku na bantu ya Izraele ya ntangu ya ntama: ‘Nge fwana vanda ve na banzambi ya nkaka kukatula munu.’ (Kubasika 20:3, 23; 23:24) Ntangu bantu ya Izraele vanda sambila banzambi ya nkaka, ‘Yehova wilaka Izraele nkele ya ngolo.’—Lutangu 25:3; Levitike 20:2; Bazuzi 2:13, 14.

Nzambi me soba ve mutindu ya yandi ya kutadila mabuundu yina ke sambilaka “ba yina ba ke bokilaka banzambi.” (1 Bakorinto 8:5, 6; Bagalate 4:8) Yandi ke lombaka na bantu nyonso yina ke zolaka kusambila yandi, na kubika kuvukana na mabuundu yina ke sambilaka banzambi ya luvunu. Ni na yina yandi me zonza: “Beno basika na kati ya bawu mpe beno vanda ntama na bawu.” (2 Bakorinto 6:14-17) Nzambi zola zonza kwandi mutindu yayi kana mabuundu nyonso ke mutindu mosi mpe ti bawu nyonso ke nataka na yandi?

Kikunku 2: Mabuundu yina ke sambilaka Nzambi ya tsyeleka na mutindu yina yandi ke ndimaka ve

Bantangu ya nkaka, bantu ya Izraele vanda sambila Nzambi mpe kulanda malongi mpe ndyatulu ya bantu yina vanda sambila banzambi ya luvunu. Kasi, Yehova vanda sepela ata fioti ve na faso yina ba vanda vukisa dibuundu ya tsyeleka na dibuundu ya luvunu. (Kubasika 32:8; Deteronome 12:2-4) Yezu vanda telemina bamfumu ya mabuundu samu na mutindu ya bawu ya kusambila Nzambi. Ba vanda sosa kutalana na meso ya bantu mutindu bisadi ya Nzambi, kasi na mansweki ba vanda “vwezaka mambu ya kulutila mfunu na kati ya Musiku, mutindu lunungu, kutala bantu kyadi, mpe kuvanda ya kukwikama.”—Matayi 23:23.

Mutindu mosi mpe bubu yayi, dibuundu yina ke sepelisaka Nzambi ke kaka dibuundu yina ke longaka malongi ya tsyeleka. Malongi yango ya tsyeleka, ke katukaka na Biblia. (Yoane 4:24; 17:17; 2 Timote 3:16, 17) Mabuundu yina ke longaka mambu yina ke kwelanaka ve na Biblia, ke sadisaka ata fioti ve bantu na kukuma pene-pene na Nzambi. Malongi mingi yina bantu ke kanisaka ti ya katukaka na Biblia, mutindu bantu tatu na kati ya muntu mosi, mwela ke fwaka ve, mpe dibenga ya tiya katukaka na mabuundu ya luvunu. Mabuundu yina ke longaka mambu yayi kele “mpamba,” to ya kukondwa mfunu, samu ba ke zitisaka misiku ya bantu kasi ya Nzambi ve.—Marke 7:7, 8.

Nzambi ke yiinaka luvunu ya bantu ya mabuundu. (Tite 1:16) Dibuundu ke ve kaka kupesa bansiku. Kasi, samu na kusadisa bantu na kukuma pene-pene na Nzambi, dibuundu me lunga kupesa malongi yina ke sadisa bantu konso kilumbu. Na kifwani, Biblia ke zonzaka: “Kana muntu ke na kukanisaka ti yandi ke sambilaka ya tsyelika, kasi yandi zaba ve kukutika yinwa ya yandi, yandi ke na kuvunama, mpe kusambila ya yandi kele ya mpamba. Kusambila ya kuvedila mpe ya tsyelika na ntwala ya Tata Nzambi, ni kusadisa bansaana mpe mifwidi na bampasi ya bawu, mpe kusumuka ve na mambu ya yimbi ya yinza.” (Zaki 1:26, 27) Ba me sadila nzonzolo “kusambila ya kuvedila” samu na kuzonzila dibuundu yina ke na bunkete, yina ke sambilaka na butsyeleka.