Bakuluntu, beno longoka na kifwani ya Ngedeyoni

1. Faso 1 Piere 5:2 ke na lakisak’ yawu, wapi kisalu ya mfunu Yehova me pesa na bakuluntu?

YEHOVA pesá bakuluntu kisalu ya kukipe mameme ya yandi, yina yandi ke zolá mingi. Samu ba ke zolá bampangi, bakuluntu ke sepelá mingi na bweso ya kusala samu na bawu, mpe ba ke salá nyonso samu na kuvanda ʻmivungi yina ntima ya Nzambi me zola.ʼ (Yer. 3:15; tanga 1 Piere 5:2.) Beto ke na vutulá matondo mingi na Yehova na yina yandi me pesa beto babakala ya mutindu yayi.

2. Wapi bamambu ya mpasi bakuluntu ya nkaka ke kutaná na yawu?

² Bakuluntu ke kutaná na bamambu mingi ya mpasi na kisalu ya bawu. Ya ke lombá ba sala bangolo mingi samu na kukipe kimvuka. Tony, kuluntu mosi yina ke na États-Unis kwizá longoka ti, yandi lenda sala ve bamambu nyonso yandi mosi. Yandi me zonza: “Ntangu kimbevo ya COVID-19 bandá, mu sosá kusala mingi samu balukutakanu ya kimvuka mpe kisalu ya kusamuna salama. Kasi ata ti mu vandá salá mingi, ya vandá kaka na mingi ya kusala. Na yawu, ya kumá mpasi na munu na kutanga Biblia, kulongoka yawu mpe kusambila.” Ilir, yina ke kuluntu na Kosovo, kutaná mpe na mambu ya nkaka. Ntangu yandi vandá na kisika yina mvita vandá salama, ya vandá mpasi na yandi na kutumama na misiku yina kimvuka ya Yehova vandá pesa. Yandi me zonza: “Ntangu filiale zonzá na munu na kukwenda sadisa bampangi yina vandá na kisika yina mvita vandá salama, ya vandá mpasi na munu na kuvanda na bukindi. Mu vandá na boma mpe mu vandá tala ti bamambu yina ba zonzá na munu na kusala ke simba ve.” Tim, mpangi mosi yina ke missionnaire na Asie, talá ti ya vandá mpasi na yandi na kusala bamambu nyonso yina yandi vandá na nsatu ya kusala bilumbu nyonso. Yandi me zonza: “Bantangu ya nkaka, mu vandá tala ti mu ke ya kulemba mingi mpe mu ke lenda ve kukipe bampangi.” Yinki lenda sadisa bakuluntu yina ke na kutaná na bamambu ya mutindu yayi?

3. Yinki beto nyonso lenda longoka na kifwani ya zuzi Ngedeyoni?

³ Bakuluntu lenda longoka na kifwani ya Ngedeyoni, zuzi mosi ya bwala ya Izraele. (Ebr. 6:12; 11:32) Yehova tulak’ yandi samu na kubumba mpe kutwadisa dikanda ya Izraele. (Baz. 2:16; 1 Ns. 17:6) Mutindu Ngedeyoni, Yehova tulá mpe bakuluntu samu na kukipe dikanda ya yandi na ntangu ya mpasi. (Bis. 20:28; 2 Tim. 3:1) Kifwani ya Ngedeyoni lenda longa beto na kuvanda ya kukuluka, na kutumama mpe kuzaba bandilu ya beto. Kisalu ya yandi vandá ve pete, ya vandá lomba yandi kanga ntima. Beto vanda kuluntu to ve, kifwani ya yandi lenda longa beto na kupesa buzitu na kisalu yina bakuluntu ke salaka. Beto lenda sadisa bampangi yina ke kipeke beto.​—Ebr. 13:17.

NTANGU YA KE MPASI NA NGE NA KUVANDA YA KUKULUKA

4. Wa’ faso Ngedeyoni lakisá ti yandi vandá muntu ya kukuluka?

⁴ Ngedeyoni vandá muntu ya kukuluka.b Ntangu mbazi ya Yehova zonzá na yandi ti ni yandi ba me soola samu na kuvuukisa bana ya Izraele na maboko ya bantu ya Madiani, yandi zonzaka: ʻDibuta ya munu kele ya kuluta fioti na Manase, mpe munu kele muntu ya kukondwa mfunu na yinzo ya tata ya munu.ʼ (Baz. 6:15) Yandi vandá tala ti yandi vandá ve na ngolo ya kulungisa kisalu yina Yehova pesak’ yandi, kasi Yehova zabá ti yandi lenda sala yawu. Na lubakusu ya Yehova, Ngedeyoni lendá kulungisa kisalu yayi.

5. Na wapi ntangu ya lenda vanda mpasi na bakuluntu na kuvanda ya kukuluka?

⁵ Bakuluntu ke salá bangolo na kuvanda bantu ya kukuluka na bamambu nyonso yina ba ke salaka. (Mika 6:8; Bis. 20:18, 19) Ba ke salá ve matalana na bamambu yina ba ke na makoki ya kusala to na bamambu yina ba me lungisa, mpe ntangu ba ke salá bafoti, ba ke talá ve ti ba ke kaka bantu ya mpamba. Kasi ntangu ya nkaka ya ke mpasi na bakuluntu na kuvanda ya kukuluka. Na kifwani, kuluntu lenda ndima bisalu yina ba ke pesak’ yandi mpe na manima, kutala ti yandi lendá lenda ve kulungisa yawu nyonso. Ya lenda vanda mpasi na yandi na kuvanda ya kukuluka kana bampangi me sepela ve na bamambu yina yandi me sala, to kana ba me kembila yandi samu na bamambu yina yandi me lenda kulungisa. Wa’ faso kifwani ya Ngedeyoni lenda sadisa bakuluntu ntangu ba ke kutaná na bamambu ya mutindu yayi?

6. Yinki bakuluntu lenda longoka na kifwani ya Ngedeyoni na yina me tadila kifu ya kundimá bandilu ya bawu? (Tala mpe kizizi.)

⁶ Lomba na bampangi na kusadisa nge. Muntu ya kukuluka zaba ti yandi lenda lungisa ve bamambu nyonso. Ngedeyoni lakisá ti yandi vandá ya kukuluka ntangu yandi lombá na bampangi na kusadisa yandi. (Baz. 6:27, 35; 7:24) Bakuluntu mpe lenda landa kifwani ya yandi. Tony, yina beto me zonzila me zonza: “Mu vandá na kifu ya kundimá bisalu nyonso yina ba ke pesá munu, ata yina mu vandá ve na ngolo ya kusala. Ni mutindu yina ba kulisá munu. Na yawu, mu sosá ti beto zonzila na kulongaka ya beto ya dikanda, kifu ya kundimá bandilu ya beto mpe mu lombá na kento ya munu na kuzonzila munu yina yandi ke kanisaka. Mu talá mpe video, Comme Jésus, formons les autres, faisons-leur confiance et rendons-les capables na jw.org.” Tony bandá kulomba na bantu ya nkaka na kusadisa yandi na kusala kisalu yina yandi vandá na yawu. Yinki ya nataka? Tony me zonza: “Kisalu na kati ya kimvuka ke na salamá, mpe mu ke na ntangu samu na kukumisa ngolo kindiku ya munu na Yehova.”

7. Ntangu bampangi ke zonzilá yimbi ya bamambu yina bakuluntu ke salá, wa’ faso bakuluntu lenda landa kifwani ya Ngedeyoni? (Zaki 3:13)

⁷ Kudasuka ve ntangu ba ke zonzilá yimbi ya bamambu yina nge ke salaka. Ntangu ba ke zonzilá yimbi ya bamambu yina bakuluntu ke salá, ya ke salá bawu mpasi. Awa mpe, kifwani ya Ngedeyoni lenda sadisa bawu. Ngedeyoni zabá ti yandi vandá muntu ya masumu. Na yawu, yandi dasuká ve ntangu bantu ya Efrayimi dasukilak’ yandi. (Baz. 8:1-3) Ngedeyoni pesá bawu mvutu na lembami nyonso. Yandi lakisá ti yandi vandá ya kukuluka ntangu yandi kuwá bamambu yina ba vandá na yawu na ntima mpe yandi zonzá na bawu na ntima ya mbote nyonso. Ya salá ti ba zuna. Bakuluntu yina ke na ndwenga ke landá kifwani ya Ngedeyoni, ntangu bampangi ke zonzilá yimbi ya bamambu yina ba ke salaka. Ba ke kuwá bawu mbote-mbote mpe ba ke pesá mvutu na lembami nyonso. (Tanga Zaki 3:13.) Samu ba ke salá mutindu yina, ya ke salá ti kizunu vanda na kati ya kimvuka.

8. Yinki bakuluntu me bonga kusala ntangu ba ke kembilá bawu? Pesa kifwani.

⁸ Pesa nkembo na Yehova. Ntangu bantu kembilá Ngedeyoni samu yandi nungá bantu ya Madiani, yandi vutulá nkembo na Yehova. (Baz. 8:22, 23) Wa’ faso bakuluntu lenda landa kifwani ya Ngedeyoni? Ba me bonga kupesa nkembo na Yehova samu na bamambu nyonso yina ba ke lungisaka. (1 Ko. 4:6, 7) Na kifwani, kana ba budila kuluntu maboko samu yandi zaba kulonga, yandi lenda pesa nkembo na Yehova samu ti bamambu yina yandi me longa me katuka na Biblia to na kimvuka ya yandi yina ke longá beto. Ntangu bakuluntu ke longá, ba lenda kanisa: ba ke sosá kwandi kupesa nkembo na Yehova to ba ke sosá kutalana? Beto zonzila mambu yina kuminá na kuluntu mosi na nkumbu ya Timothy. Ntangu Timothy kumá kuluntu, yandi vandá zolá kusala ba discours. Yandi me zonza: “Bamambu ya ntete yina mu vandá zonzá mpe bifwani yina mu vandá pesá, vandá yinda mpe mpasi na kusimba. Bambala mingi bampangi vandá siiká munu samu na yawu. Kasi ya vandá sala ti ba tala mingi munu kasi ve Yehova to Biblia.” Na manima, Timothy talá ti yandi me bonga kubongisa faso ya yandi ya kulonga samu bampangi tala ve kak’ yandi. (Bin. 27:21) Yinki ya nataka? Yandi me zonza: “Bubu yayi, bampangi mingi ke zonzá na munu wapi mutindu discours yina mu me sala me sadisa bawu na kuzaba yinki ya kusala na mambu yina ba ke na yawu, na kukanga ntima na mantwala ya bampasi to na kukuma dyaka pene-pene na Yehova. Bamambu yina ba ke zonzá na munu ke pesá munu kilengi mingi, kulutila nkembo yina munu vandá kuzwá na ntama.”

NTANGU YA KE MPASI NA KUTUMAMA TO NA KULAKISA BUKINDI

9. Yinki zolá sala ti ya vanda mpasi samu na Ngedeyoni na kutumama mpe kulakisa bukindi? (Tala kizizi ya paje ya ntete.)

⁹ Ntangu Yehova tulá Ngedeyoni mutindu zuzi, yandi vandá na nsatu ya kutumama mpe kulakisa bukindi. Ba pesak’ yandi kisalu ya mpasi ya kumwangisa kisika yina tata ya yandi salá samu na kusambila Baale. (Baz. 6:25, 26) Na manima, Ngedeyoni bokilá basoda samu na kukwenda nwana, kasi Yehova zonzá na yandi bambala zole na kuvutula ba ya nkaka. (Baz. 7:2-7) Yehova zonzá dyaka na yandi na kukwenda nwanisa bambeni ya bawu na kati-kati ya mpimpa.​—Baz. 7:9-11.

10. Wapi bamambu lenda sala ti ya vanda mpasi na bakuluntu na kutumama?

¹⁰ Bakuluntu me bonga kuvanda ya ʻkuyilama na kutumama.ʼ (Zaki 3:17, nwt-MK) Kuluntu yina ke tumamá, ke sadilá na mbangu bamambu yina Biblia ke zonzá mpe malongi yina ke katuká na kimvuka ya Yehova. Na yawu, ya ke sadisá bampangi ya nkaka na kutumama. Kasi ya ke na bamambu yina lenda sala ti ya vanda mpasi samu na kuluntu na kutumama. Na kifwani, ba lenda pesa yandi misiku mingi to misiku lenda soba na mbangu mpe ya lenda vanda mpasi samu na yandi na kusadila yawu. Bantangu ya nkaka, yandi lenda yufula kana bamambu yina ba ke lombá na yandi na kusala ke simba, to kana ya ke vanda mayela na kulanda yawu. Ntangu ya nkaka, ba lenda pesa yandi kisalu yina lenda sala ti basoda simba yandi. Wa’ faso kifwani ya Ngedeyoni lenda sadisa bakuluntu na mantwala ya bamambu ya mutindu yayi?

11. Yinki lenda sadisa bakuluntu na kutumama?

¹¹ Sosa kuzaba mbote-mbote bamambu yina kimvuka ya Yehova ke zonzá mpe sadila yawu. Nzambi zonzá na Ngedeyoni na kumwangisa kisika yina tata ya yandi bongisá samu na kusadila Baale mpe na kutunga kuna kisika ya malu-malu samu na kupesa minkayulu na Yehova. Ngedeyoni salá ve ntembe na mambu yina Yehova zonzá na yandi. Yandi sadilak’ yawu. Bubu yayi mpe kimvuka ya Yehova ke zonzá na bakuluntu bamambu ya kusala. Ya ke salamá na nzila ya mikanda, ya bansangu mpe malongi yina ke sadisá bisadi ya Yehova na kubumba luzingu ya bawu mpe na kubikana ya kukangama na yandi. Beto ke zolá bakuluntu ya beto samu ba ke landá mbote-mbote bamambu yina kimvuka ya Yehova ke zonzaka. Samu ba ke salá mutindu yina, bampangi nyonso ya kimvuka ke kuzwa bambote.​—Nku. 119:112.

12. Wa’ faso bakuluntu lenda sadila Baebre 13:17 ntangu dibuundu ya Yehova ke zonzá na bawu na kusoba bamambu?

¹² Ndima kusoba bamambu. Yehova zonzá na Ngedeyoni na kukatula basoda mingi mpe na kubikana kaka na ndambu. (Baz. 7:8) Ntangu ya nkaka Ngedeyoni kanisaka: ‘Samu na yinki kusala yawu? Ya ke simba kwandi?’ Ata mpila yina, yandi tumamaka. Bubu yayi bakuluntu ke landá kifwani ya Ngedeyoni. Ntangu kimvuka ya Yehova ke zonzá na bawu na kusoba bamambu, ba ke tumamaka. (Tanga Baebre 13:17.) Na kifwani, na 2014, kimvuka ya bantwadisi sobá bamambu na yina me tadila faso ya kuzwa mbongo samu na kutunga Bayinzo ya Kimfumu mpe bayinzo samu na balukutakanu ya nene. (2 Ko. 8:12-14) Na ntama, dibuundu ya Yehova vandá defisá bimvuka mbongo samu na kutungisa Bayinzo ya Kimfumu. Kasi bubu yayi, dibuundu ya Yehova ke vukisá makabu yina ke katuká na bimvuka nyonso ya yinza. Mpe ba ke sadilak’ yawu samu na kutungisa Bayinzo ya Kimfumu mpe bayinzo samu na balukutakanu ya nene kisika yina bampangi ke na nsatu ya yawu, ata ti bampangi ya kuna ke pesá kaka makabu ndambu. Ntangu José kuwá bamambu yayi, yandi talá ti ya ke simba ve mpe yandi kanisaka: ‘Ba ke lenda kutunga ata Yinzo mosi ya Kimfumu. Na faso yayi, ya ke simba ve.’ Yinki sadisá José na kutumama? Yandi me zonza: “Mambu yina ke na Bingana 3:5, 6 bambulá munu ti mu me bonga kutula ntima na Yehova. Na manima, mu kwizá tala ti bamambu ke na simbaka. Bubu yayi, beto ke na tungá Bayinzo ya Kimfumu kulutila na ntama mpe faso ya beto ya kusala makabu ke salá ti ba yina ke na bima ya kulutila ke sadisá ba yina ke na ndambu.”

13. a) Yinki Ngedeyoni vandá na kundima? b) Wa’ faso bakuluntu lenda landa kifwani ya Ngedeyoni? (Tala mpe kizizi.)

¹³ Sala luzolo ya Yehova na bukindi nyonso. Ngedeyoni tumamá na Yehova ata na ntangu yandi vandá na boma, mpe ti kisalu yina ba pesak’ yandi zolá tula luzingu ya yandi na mpasi. (Baz. 9:17) Ntangu Yehova kindisá Ngedeyoni, yandi kumá na kundima ti yandi ke sadisa yandi na kubumba dikanda ya Izraele. Bakuluntu yina ke vandá na kisika yina ba ke niminá kisalu ya beto, ke landá kifwani ya Ngedeyoni. Ata ti bakuluntu zaba ti ba lenda simba bawu, kusosa kunata bawu na kuteka bampangi, kubula bawu to kukatula bawu na kisalu, na bukindi nyonso ba ke vandá na mantwala samu na balukutakanu mpe kisalu ya kusamuna.c Na kati ya mpasi ya nene, bakuluntu ke vanda na nsatu ya bukindi, samu na kulanda misiku yina kimvuka ya Yehova ke pesa bawu ata ti kusala yawu ke tula luzingu ya bawu na mpasi. Ntangu ya nkaka misiku yina ba ke kuzwa ke tadila nsangu ya ngolo yina ke zonzila bamambu ya mpasi yina ke kumina yinza yayi, mpe mutindu ya kusala samu na kuvuuka ntangu Gogi ya Magogi ke nwanisa bisadi ya Nzambi.​—Ezk. 38:18; Luz. 16:21.

NTANGU YA KE VANDÁ MPASI NA KUKANGA NTIMA

14. Samu na yinki ya vandá mpasi na Ngedeyoni na kukanga ntima?

¹⁴ Kisalu ya zuzi yina Yehova pesá na Ngedeyoni vandá kisalu ya ngolo mingi. Ntangu Ngedeyoni kwizá nwanisa bantu ya Madiani na mpimpa, ba kimaka. Ngedeyoni landá bawu kubanda Yezreele tii na maza ya Yordani kisika mosi yina vandá na bayinti mingi. (Baz. 7:22) Ngedeyoni suká ve kaka kuna ata ti yandi na babakala 300 yina vandá na yandi vandá ya kulemba. Ba lutá na kati ya maza ya Yordani mpe ba landá bawu. Na manima, ba kuzwá bawu mpe ba nungá bawu.​—Baz. 8:4-12.

15. Ntangu ya nkaka, yinki lenda lembisa bakuluntu?

¹⁵ Ntangu ya nkaka kisalu ya kukipe kimvuka mpe makanda ya bawu lenda lembisa mingi bakuluntu, ya vanda na nzutu to na makanisi. Ntangu ba ke ya kulemba, wa’ faso bakuluntu lenda landa kifwani ya Ngedeyoni?

16-17. Yinki sadisá Ngedeyoni na kukanga ntima, mpe yinki bakuluntu lenda vanda na kundima? (Izaya 40:28-31) (Tala mpe kizizi.)

¹⁶ Vanda na kundima ti Yehova ke pesa nge ngolo. Ngedeyoni vandá na kundima ti Yehova zolá pesa yandi ngolo, mpe yandi kufwá ve nsoni. (Baz. 6:14, 34) Kilumbu mosi, Ngedeyoni na babakala yina vandá na yandi vandá landa bamfumu zole ya Madiani na makulu. Bamfumu yayi vandá nata bashamo. (Baz. 8:12, 21) Kasi Yehova sadisá Ngedeyoni na bantu ya yandi na kubwila bamfumu zole yayi mpe kununga bawu. Mutindu Ngedeyoni, bakuluntu lenda tula ntima na Yehova muntu yina ʻke lembaka ve ata fioti mpe ngolo ya yandi ke manisaka ve.ʼ Yandi ke pesa bawu ngolo yina ba ke vanda na yawu nsatu.​—Tanga Izaya 40:28-31.

¹⁷ Matthew mpangi mosi, ke na kimvuka ya ba yina ke sadisá bampangi yina ke kutaná na bamambu ya ngolo ya mavimpi (comité de liaison hospitalier). Yinki ke sadisak’ yandi na kukanga ntima? Yandi me zonza: “Mu talá ngolo yina ke katuká na Nzambi, yina Bafilipi 4:13 ke zonzilaka. Bambala mingi mu vandá ya kulemba mpe mu vandá tala ti mu ke lenda dyaka ve. Mu sambilá mingi Yehova mpe mu bondilak’ yandi samu yandi pesa munu ngolo ya kusadisa bampangi ya munu. Na kati ya bantangu yayi, Yehova vandá pesa munu ngolo yina vandá sadisa munu na kukanga ntima.” Bakuluntu ya beto ke salá kisalu ya ngolo samu na kukipe dikanda ya Yehova, ata ti bantangu ya nkaka ya ke vandá mpasi na kusala yawu. Kasi ba me bonga kundima ti ba lendá lenda ve kusala bamambu nyonso yina ba ke na nsatu ya kusala. Mpe ba lenda vanda na kundima ti Yehova ke kuwá bawu ntangu ba ke lombá na yandi ngolo mpe yandi ke sadisa bawu na kulemba ve.​—Nku. 116:1; Flp. 2:13.

18. Na bunkufi, wa’ faso bakuluntu lenda landa kifwani ya Ngedeyoni?

¹⁸ Ya ke na bamambu mingi yina bakuluntu lenda longoka na kifwani ya Ngedeyoni. Bakuluntu me fwana kuvanda ya kukuluka samu na kundima ti ya ke na bisalu yina ba lenda sala ve. Kukuluka ya bawu ke talaná mpe ntangu bampangi ke zonzilá yimbi ya bamambu yina ba ke salaka to ntangu ba ke kembilá bawu. Ba me fwana kutumama mpe kuvanda na bukindi, mingi-mingi na kati ya bilumbu ya nsuka yayi. Dyaka, ba me bonga kuvanda na kundima ti mambu ni mambu ba ke kutana na yawu, Yehova ke pesa bawu ngolo. Ntembe ve, beto zolá sepela mingi na kisalu ya ngolo yina mivungi ya beto ke salá mpe “kuvwanda na buzitu na bantu yina kele mutindu [yina].”​—Flp. 2:29.