Na bwala ya Uze, ya vandaka na bakala mosi yina vanda sambilaka Yehova. Nkumbu ya yandi vandaka Yobi. Yandi vandaka na bimvwama mingi mpe dikanda ya nene. Yandi vandaka na ntima ya mbote, yandi vanda sadisaka bapovre, bakento yina fwidilaka babakala, mpe bana yina vandaka dyaka ve na bibuti. Kasi, samu yandi vanda salaka mambu ya mbote, ya zola zonza ti yandi zolaka kutana ve na mambu ya mpasi?

Yobi zabaka ve ti Satana Dyabulu vanda tala yandi. Yehova zonzaka na Satana: ‘Nge me tala kisadi ya munu Yobi? Ya ke ve na muntu faso yandi na ntoto. Yandi ke kuwaka munu mpe ke salaka mambu ya mbote.’ Satana vutulaka: ‘Ya tsyeleka Yobi ke tumamaka na nge. Nge ke bumbaka yandi mpe ke sakumunaka yandi. Nge me pesa yandi ntoto mpe bibulu. Katula yandi bima nyonso yayi, mpe yandi ke bika kusambila nge.’ Yehova zonzaka: ‘Nge lenda meka Yobi. Kasi mu me pesa ve nge nzila ya kufwa yandi.’ Samu na yinki Yehova bikaka Satana meka Yobi? Yandi vandaka na kundima ti Yobi ke vanda kaka ya kukangama na yandi.

Satana bandaka kumeka Yobi na bampasi ya mutindu na mutindu. Na kubanda yandi filisaka bantu yina ba vanda bokilaka Basabea samu na kulaba bangombe na bambuluku ya Yobi. Na manima tiya yokaka mameme nyonso ya Yobi. Bantu ya nkaka ba Kaldea yibaka bashamo ya yandi. Ba kufwaka mpe bisadi yina vanda bumba bibulu yango. Na manima mambu ya kulutila mpasi kuminaka yandi. Bana nyonso ya Yobi kufwaka ntangu yinzo yina ba vanda sala feti bwidilaka bawu. Ya salaka Yobi mpasi mingi na ntima, kasi yandi bikaka ve kusambila Yehova.

Samu Satana vandaka na nsatu Yobi tala mpasi mingi, yandi losilaka yandi maladi ya yimbi ya babibon na nzutu nyonso. Yobi vanda tala mpasi mingi. Yandi zabaka ve samu na yinki bamambu nyonso yayi vanda kumina yandi. Kasi, yandi bikaka ve kusambila Yehova. Nzambi vanda tala mambu nyonso yayi, mpe yandi sepelaka mingi na Yobi.

Na manima Satana filisaka bantu tatu samu na kumeka Yobi. Ba zonzaka na Yobi: ‘Nge me sala disumu mpe nge ke na bumbaka yawu. Ni na yawu Nzambi ke na sembaka nge.’ Yobi zonzaka: ‘Mu me sala ata kima ya yimbi.’ Kasi na manima Yobi bandaka kukanisa ti ni Yehova vanda sala ti bamambu nyonso yayi kumina yandi. Mpe yandi zonzaka ti Nzambi salaka ve bamambu na mutindu ya kukwikama samu na yandi.

Ntwenya mosi ya bakala na nkumbu ya Eliwu vandaka swi mpe vanda kuwa masolo ya bawu. Na manima yandi bandaka kuzonza: ‘Mambu nyonso yina beno me zonza ke luvunu. Beto lenda bakula ve bunene ya Yehova. Yandi lenda sala ata fioti ve mambu ya yimbi. Yandi ke talaka mambu nyonso mpe ke sadisaka bantu na bamambu ya bawu.’

Na manima Yehova sololaka na Yobi. Yandi zonzaka: ‘Wapi kisika nge vandaka ntangu mu yidikaka zulu na ntoto? Samu na yinki nge ke na zonzaka ti mu me sala ve bamambu na mutindu ya kukwikama? Nge ke na zonzaka, kasi nge zaba ve samu na yinki bamambu ke na salamaka.’ Yobi ndimaka foti ya yandi mpe zonzaka: ‘Mu me sala mambu ya yimbi. Mu kuwaka nsangu ya nge, kasi ntangu yayi mu me zaba nge ya tsyeleka. Ya ke ve na mambu yina nge lenda sala ve. Lemvokila munu na mambu yina mu me zonza.’

Ntangu kumekama ya Yobi manisaka, Yehova belusaka yandi mpe pesaka yandi bima mingi kuluta yina yandi vandaka na yawu. Yobi vandaka na luzingu ya yinda mpe ya kilengi. Yehova sakumunaka Yobi samu yandi kuwaka yandi ata na ntangu yina ya vandaka mpasi. Nge ke vanda kwandi faso Yobi mpe nge ke bika ve kusambila Yehova ata na ntangu ya mpasi?

Na Ezipte, ba vanda bokilaka dikanda ya Yakobi, bantu ya Izraele. Na manima ya lufwa ya Yakobi mpe ya Yozefi, Faraoni ya malu-malu bandaka kuyala. Yandi vandaka na boma ti bantu ya Izraele kuma mingi kuluta bantu ya Ezipte. Na yawu, Faraoni yango kumisaka bantu ya Izraele bangaamba. Yandi nataka bawu na ngolo na kusala babrike mpe na kusala kisalu ya ngolo na bilanga. Kasi ntangu nyonso yina bantu ya Ezipte vanda nata bantu ya Izraele na kusala kisalu ya ngolo, bantu ya Izraele vanda kuma kaka mingi. Samu Faraoni zolaka ve ti bamambu salama kaka faso yina, yandi pesaka musiku ti ba kufwa bana nyonso ya babakala ya bantu ya Izraele, ntangu ba ke na butukaka. Nge lenda meka na kukanisa na boma yina vandaka na bantu ya Izraele?

Kento mosi na nkumbu ya Yokebedi yina vandaka muntu ya Izraele butaka mwana mosi ya kitoko ya bakala. Samu mambu ya yimbi kumina ve yandi, yandi tulaka yandi na kati ya kitunga mpe bumbaka yandi na matiti ya Nzadi Nile. Mwana ya yandi ya kento na nkumbu ya Miriami, telamaka pene-pene samu na kutala yinki ke salama.

Mwana ya Faraoni ya kento kwizaka na nzadi samu na kuyobila mpe yandi talaka kitunga. Yandi talaka mwana ya fioti vanda dila na kati, mpe yandi kumaka na kyadi ya yandi. Miriami yufulaka yandi: ‘Nge zola mu kwenda sosa kento yina ke pesa yandi mabene?’ Mwana ya Faraoni ndimaka, Miriami nataka Yokebedi na sika ya mwana ya Faraoni. Mwana ya Faraoni zonzaka na yandi: ‘Baka mwana yayi, nwikisa yandi mabene samu na munu mpe mu ke futa nge.’

Ntangu mwana kulaka, Yokebedi vutulaka yandi na mwana ya Faraoni, mwana ya Faraoni pesaka yandi nkumbu ya Moyize mpe yandi kulisaka yandi mutindu mwana ya yandi. Moyize kulaka mutindu mwana ya mfumu mpe vandaka na makoki ya kuzwa kima nyonso yina yandi vandaka na yawu nsatu. Kasi Moyize zimbanaka ata fioti ve Yehova. Yandi zabaka ti yandi vandaka muntu ya Izraele, kasi ya Ezipte ve. Na yawu, yandi soolaka kusadila Yehova.

Ntangu yandi kumaka na bamvula 40, Moyize bakaka mukanu ya kusadisa dikanda ya yandi. Ntangu yandi talaka muntu mosi ya Ezipte vanda bula ngaamba mosi ya Izraele, Moyize bulaka muntu yango ya Ezipte, ya salaka ti yandi kufwa. Moyize bumbaka mvumbi ya yandi na zyelo. Ntangu Faraoni zabaka yawu, yandi sosaka kufwa Moyize. Kasi Moyize kimaka na bwala ya Madiani. Kuna Yehova kipeke yandi.