Moyize na Aroni kwendaka na Faraoni samu na kuzonza na yandi nsangu yina Nzambi pesaka bawu: ‘Kana nge bika ve bantu ya munu kwenda, mu ke filisa banzinzi yina ke tatikaka na bwala nyonso.’ Banzinzi yango fulukaka na bayinzo ya bantu ya Ezipte, ya vanda bayinzo ya bantu ya mbongo to ya bapovre. Bwala nyonso fulukaka na banzinzi yina ke tatikaka. Kasi na bwala ya Goshene, kisika yina bantu ya Izraele vandaka, banzinzi yina ke tatikaka vandaka ve. Mambu ya mpasi ya yiya mpe bamambu ya nkaka yina landaka vanda kumina kaka bantu ya Ezipte. Faraoni zonzaka na Moyize: ‘Bondila Yehova samu yandi katula banzinzi yayi, mpe bantu ya nge lenda kwenda.’ Kasi ntangu Yehova katulaka banzinzi yango, Faraoni sobaka makanisi ya yandi. Faraoni bendaka kwandi bileso na mambu yayi?

Yehova zonzaka: ‘Kana Faraoni bika ve bantu ya munu kwenda, bibulu ya bwala ya Ezipte ke beela mpe ke kufwa.’ Kilumbu yina landaka, bibulu bandaka kufwa. Kasi bibulu ya bantu ya Izraele vanda kufwa ve. Ata faso yina, Faraoni vandaka kaka na yintu ngolo, yandi bikaka ve ba kwenda.

Na manima, Yehova zonzaka na Moyize na kuvutuka na sika ya Faraoni mpe na kulosa dibombi ya tiya na zulu. Dibombi yango mwanganaka na bwala nyonso mpe ya vandaka kubwa na zulu ya bantu ya Ezipte. Dibombi yango basisaka babibon na bantu ya Ezipte mpe na bibulu ya bawu mpe ya vanda sala mpasi mingi. Ata faso yina, Faraoni mangaka kubika bana ya Izraele ba kwenda.

Yehova filisaka dyaka Moyize na sika ya Faraoni na nsangu yayi: ‘Nge ke na mangaka kaka kubika bantu ya munu kwenda? Mbasi mu ke nokisa mvula ya matadi na zulu ya Ezipte.’ Kilumbu yina landaka, Yehova nokisaka mvula ya matadi na batonere mpe tiya. Ya vandaka mbala ya ntete mupepe ya ngolo ya mutindu yayi salama na Ezipte. Bayinti mpe bima nyonso yina ba kundaka bebaka, kasi na bwala ya Goshene ve. Faraoni zonzaka: ‘Bondila Yehova samu yandi sukisa mambu yayi, na manima beno lenda kwenda.’ Kasi ntangu mvula ya matadi manisaka, Faraoni sobaka makanisi ya yandi.

Moyize zonzaka: ‘Ntangu yayi makonko ke kudya bima nyonso yina beno kundaka, yina mupepe ya ngolo me bebisa ve.’ Ba millions ya makonko kudyaka bima nyonso yina bikanaka na bilanga mpe na bayinti. Faraoni zonzaka na Moyize: ‘Bondila Yehova yandi katula makonko.’ Kasi ata ntangu Yehova katulaka makonko, Faraoni vandaka kaka na yintu ngolo.

Yehova zonzaka na Moyize: ‘Nanguna maboko ya nge na zulu.’ Na mbala mosi zulu kumaka ndombe. Na kati ya bilumbu tatu, bantu ya Ezipte vanda tala dyaka ve ata kima to ata muntu. Kaka bantu ya Izraele vandaka na nsemo na bayinzo ya bawu.

Faraoni zonzaka na Moyize: ‘Nge na bantu ya nge, beno lenda kwenda. Beno bika kaka bibulu ya beno awa.’ Moyize zonzaka: ‘Beto me fwana kunata bibulu ya beto samu beto pesa yawu na munkayulu na Nzambi ya beto.’ Faraoni kumaka na nkele mingi. Yandi zonzaka na Moyize na ndinga ya ngolo: ‘Katuka awa! Kana mu tala dyaka nge, mu ke kufwa nge.’

Moyize pesaka Faraoni nsilulu ti yandi ke sosa dyaka ve kutala yandi. Kasi tekila yandi kwenda, yandi zonzaka na Faraoni: ‘Na kati-kati ya mpimpa, mwana nyonso ya ntete na bwala ya Ezipte ke kufwa, kubanda na mwana ya Faraoni tii na bana ya bisadi.’

Yehova zonzaka na bana ya Izraele na kubongisa madya ya mfunu. Yandi zonzaka: ‘Beno kufwa mwana ya dimeme to ya nkombo yina kele na mvula mosi mpe beno tula ndambu ya menga ya yawu na dibaya ya zulu ya mwelo ya beno. Beno yoka yawu mpe beno kudya yawu na mampa yina ke ve na levire. Beno vanda ya kubongama, na mapapa ya beno na makulu samu na kukwenda. Na mpimpa yayi mu ke basisa beno na Ezipte.’ Nge lenda kanisa na kilengi yina vandaka na bana ya Izraele?

Na kati-kati ya mpimpa, mbazi ya Yehova lutaka na bayinzo nyonso ya Ezipte. Na bayinzo yina vandaka ve na menga na mabaya ya zulu ya mwelo, mwana ya ntete ya yinzo yina vanda kufwa. Kasi na bayinzo yina vandaka na menga, mbazi kotaka ve. Makanda nyonso ya bantu ya Ezipte, ya vanda ba yina vandaka na mbongo to ve, fwidilaka mwana. Kasi ata mwana mosi ve ya bantu ya Izraele kufwaka.

Mwana ya Faraoni mpe kufwaka. Na mbala mosi yandi zonzaka na Moyize na Aroni: ‘Beno kwenda, beno basika awa, beno kwenda sambila Nzambi ya beno, beno baka na bibulu ya beno, beno kwenda na yawu!’

Ngonda vanda ngenga ntangu bana ya Izraele basikaka na Ezipte. Ba vanda basika na bikunku ya mabuta mpe ya makanda. Ya vandaka na babakala 600 000 mpe bakento mingi na bana. Bantu mingi ya nkaka mpe kwendaka na bawu samu ba vanda sambila Yehova. Ni na ntangu yayi bana ya Izraele kuzwaka kimpwanza.

Samu na kuzimbana ve ti Yehova vuukisaka bawu, bamvula nyonso bana ya Izraele zolaka kudya madya ya mfunu yayi. Ba ke bokilaka yawu Pake.