Yehova zonzaka na Moyize: ‘Kwiza na sika ya munu na zulu ya mongo. Mu ke sonika misiku ya munu na zulu ya matadi mpe mu ke pesa nge yawu.’ Moyize kwendaka na zulu ya mongo mpe yandi lutisaka bilumbu mpe bampimpa 40 kuna. Ntangu yandi vandaka kuna, Yehova sonikaka misiku 10 na zulu ya matadi zole mpe yandi pesaka yawu na Moyize.

Na manima ya mwa bantangu, bana ya Izraele kanisaka ti Moyize bikaka bawu. Na yawu, ba zonzaka na Aroni: ‘Beto ke na nsatu ya ntwadisi. Yidika beto nzambi!’ Aroni vutulaka: ‘Beno pesa munu wolo ya beno.’ Yandi sulumusaka wolo mpe yidikaka kiteki ya mwana ya ngombe. Bana ya Izraele zonzaka: ‘Mwana ya ngombe yayi ke Nzambi ya beto yina me basisa beto na bwala ya Ezipte!’ Ba bandaka kusambila mwana ya ngombe ya wolo yina, mpe ba salaka mukembo ya nene. Ya vandaka kwandi mambu ya yimbi? Ee, samu ba salaka nsilulu ya kusambila kaka Yehova. Kasi ntangu yayi ba me zitisa ve nsilulu ya bawu.

Yehova vanda tala mambu yina vanda salama, mpe yandi zonzaka na Moyize: ‘Vutuka na bana ya Izraele. Ba ke na tumamaka ve na munu mpe ke na sambilaka nzambi ya luvunu.’ Na yawu, Moyize kwendaka na matadi zole na maboko.

Ntangu Moyize kumaka pene-pene na camp, yandi kuwaka bantu vanda yimba. Yandi talaka ba vanda bina mpe vanda fukama na mantwala ya kiteki ya mwana ya ngombe. Moyize kuzwaka nkele mingi, mpe yandi losaka matadi yina na ntoto mpe ya mwanganaka. Na mbala mosi yandi mwangisaka kiteki yina. Mpe yandi yufulaka Aroni: ‘Wa’ faso bantu lenda nata nge na kusala mambu ya yimbi ya faso yayi?’ Aroni vutulaka: ‘Kudasuka ve. Nge zaba faso bantu yayi kele. Ba vandaka na nsatu ya nzambi. Na yawu, mu losaka wolo ya bawu na tiya mpe ni kiteki yayi me basika!’ Aroni zolaka sala ve mambu ya faso yayi. Moyize vutukaka na zulu ya mongo mpe bondilaka Yehova samu yandi lemvokila bawu.

Yehova lemvokilaka ba yina ndimaka kutumama na yandi. Nge me tala samu na yinki ya vandaka mfunu na bana ya Izraele na kundima ti Moyize twadisa bawu?

Ntangu Moyize vandaka na Mongo ya Sinayi, Yehova zonzaka na yandi na kutunga tenta, yina ba vanda bokilaka tabernakle, kisika yina bana ya Izraele lenda sambila yandi. Ba zolaka nata yawu kisika nyonso yina ba ke kwenda.

Yehova zonzaka: ‘Zonza na bana ya Izraele na kupesa yina ba lenda pesa samu ya sadisa na kutunga tabernakle.’ Ba pesaka wolo, arza, kwivre, matadi ya ntalu, mpe ba bijoux. Ba pesaka mpe mika ya bibulu, lino, bampusu ya bibulu, mpe bima mingi ya nkaka. Samu ba vanda pesa bima mingi, Moyize zonzaka na bawu: ‘Ya me lunga! Beno bika dyaka kunata.’

Bakento na babakala mingi yina vandaka na makoki sadisaka na kutunga tabernakle. Yehova pesaka bawu mayela samu na kulungisa kisalu. Ba ya nkaka vanda tunga basinga, ba ya nkaka vanda tunga bilele, to kutula ba dessins na zulu ya yawu. Ba ya nkaka vanda yidika matadi, ba ya nkaka vanda sala na wolo, to vanda zenga mabaya.

Ba tungaka tabernakle kaka mutindu Yehova zonzaka na bawu. Ba yidikaka rido ya kitoko samu na kukabula tabernakle na bitini zole, Kisika ya Santu mpe Kisika ya Kulutila Santu. Na Kisika ya Kulutila Santu vandaka na sanduku ya luwawanu yina ba yidikaka na mabaya ya acacia mpe na wolo. Na Kisika ya Santu vandaka na kima ya wolo ya kutudila mwinda, mesa, mpe kisika ya munkayulu samu na kuyoka mananasi ya nsunga ya kitoko. Na ngaanda ya tabernakle vandaka na ndonga ya nene yina ba salaka na kwivre mpe kisika ya nene ya kuyokila minkayulu. Sanduku ya luwawanu vanda bambula bana ya Izraele nsilulu ya bawu ya kutumama na Yehova. Nge zaba yinki zola zonza luwawanu? Ya ke nsilulu mosi yina ke ve mutindu bansilulu ya nkaka.

Yehova soolaka Aroni na bana ya yandi ya babakala na kusala mutindu banganga-nzambi na tabernakle. Ba zolaka kipe yawu mpe kupesa minkayulu na Yehova. Kaka Aroni nganga-nzambi ya nene muntu vandaka na bweso ya kukota na Kisika ya Kulutila Santu. Yandi vanda kotaka kuna mbala mosi na mvula, na kupesa munkayulu samu na masumu ya yandi mosi, samu na masumu ya dikanda ya yandi mpe samu na masumu ya bwala nyonso ya Izraele.

Bana ya Izraele manisaka kutunga tabernakle mvula mosi na manima ya kubasika ya bawu na Ezipte. Awa ba kuzwaka kisika ya kusambila Yehova.

Yehova fulusaka tabernakle na nkembo ya yandi mpe basisaka dituti na zulu ya yawu. Ntangu nyonso yina dituti vandaka na zulu ya tabernakle, bana ya Izraele kwendaka ve kisika ya nkaka. Kasi ntangu dituti vanda kwenda, ba zabaka ti ya me kuma ntangu ya kukwenda. Ba vanda nangunaka tabernakle na bitini mpe vanda landaka dituti.