Samu na yinki yimbi mpe bampasi kele na yinza?

Ntangu bampasi ke kuminá beto, bantu mingi ke yufulá “samu na yinki?” Ya ke kilengi na kuzaba ti Biblia ke pesá mvutu na kyuvu yayi!

1. Yinki Satana salá samu na kukotisa yimbi na yinza?

Satana, Dyabulu balukilá Nzambi. Yandi vandá sosa kuyala. Ni na yawu, yandi natá bantu ya ntete Adami na Eva na kubalukila Nzambi mpe kulanda yandi. Satana salaka yawu ntangu yandi vuná Eva. (Kubanda 3:1-5) Yandi natá Eva na kukanisa ti Yehova zolá ve ti ba vanda na luzingu ya mbote. Yandi sosá kuzonza ti bantu ke vanda na kilengi ya kulutila kana ba tumama ve na Yehova. Satana zonzá luvunu ya ntete ntangu yandi zonzá na Eva ti yandi ke kufwa ve. Ni na yawu, Biblia me bokila Satana “muntu ya luvunu mpe tata ya luvunu.”—Yoane 8:44.

2. Yinki Adami na Eva soolá kusala?

Yehova pesá na Adami na Eva bima mingi. Yandi zonzá na bawu ti ba lenda kudya bambuma ya bayinti nyonso faso ba me zola, kasi yandi niminá bawu kaka bambuma ya yinti mosi. (Kubanda 2:15-17) Ata faso yina, ba soolá kudya mbuma ya yinti yina ba niminá bawu. Eva “bakaka mbuma ya yawu mpe kudyaka yawu.” Na manima, Adami mpe “kudyaka yawu.” (Kubanda 3:6) Bawu nyonso zole tumamá ve na Nzambi. Samu Adami na Eva vandá bantu ya kulunga, ya vandá ve mpasi na bawu na kutumama na Nzambi. Kasi bawu mosi soolá kumanga kutumama na Yehova. Na kusalá mutindu yina, ba sumuká mpe losá luyalu ya Yehova. Ba zolá dyaka ve ti Yehova twadisa luzingu ya bawu. Mambu yina ba salá natiná bawu bampasi mingi.—Kubanda 3:16-19.

3. Yinki mambu yina Adami na Eva salá natiná beto?

Ntangu Adami na Eva sumuká, ba kumá bantu ya masumu, mpe ba pesá disumu yina na bana mpe na mitekolo ya bawu. Na yina me tadila Adami, Biblia ke zonzá: “masumu kotaka na yinza samu na muntu mosi, Adami, mpe yawu pesaka lufwa. Na yina, lufwa me kumina bantu nyonso.”—Baroma 5:12.

Bamambu mingi ke salá ti beto tala mpasi. Ya lenda vanda samu na mikanu ya yimbi yina beto mosi ke bakaka. Ya lenda vanda mpe samu na mikanu ya yimbi yina bantu ya nkaka me baka. Ntangu ya nkaka, beto ke talá mpasi samu beto ke na kisika ya yimbi mpe na ntangu ya yimbi.—Tanga Longi 9:11.

SOSA KUZABA MBOTE-MBOTE

4. Na nani bampasi ya beto ke katukaka

Bantu mingi ke kanisá ti ni Nzambi ke yalá yinza. Ya ke kwandi ya tsyeleka? Tala VIDEO.

VIDEO: Nani ke na kuyalá yinza? (1:24)

Tanga Zaki 1:13 na 1 Yoane 5:19, mpe na manima beto zonzila kyuvu yayi:

• Bampasi ya beto mpe mambu ya yimbi ke katuká kwandi na Nzambi?

5. Bamambu yina luyalu ya Satana me nata

VIDEO: Samu na yinki Nzambi me bika nzila na bampasi?—Ndambu (3:07)

Tanga Kubanda 3:1-6, mpe na manima beto zonzila byuvu yayi:

• Wapi mambu ya luvunu Satana zonzaka?—Tala baverse 4 na 5.

• Wa’ faso Satana ke natá bantu na kukanisa ti Yehova ke zolá ve ti ba vanda na luzingu ya mbote?

• Samu na Satana, bantu ke kwandi na nsatu Yehova twadisa luzingu ya bawu samu ba vanda na kilengi?

Tanga Longi 8:9, mpe na manima beto zonzila kyuvu yayi:

• Samu Yehova ke na yalá dyaka ve yinza, yinki ke na salamaka?

1. Adami na Eva vandá na nzutu ya kulunga. Ba vandá na luzingu ya kitoko na paradiso. Kasi ba kuwá Satana mpe balulá Yehova mukongo

2. Na manima ya mambu yina ba salaka, disumu, bampasi mpe lufwa kotá na yinza

3. Yehova ke katula disumu, bampasi mpe lufwa. Na yawu, bantu ke vanda na luzingu ya kitoko na paradiso, mutindu ya vandá na kubanda ya yinza

6. Bampasi ya beto ke nyongisá Yehova

Nzambi ke kipeke kwandi bampasi ya beto? Tala mambu yina mfumu David mpe ntumwa Piere sonikaka. Tanga Nkunga 31:7 na 1 Piere 5:7, mpe na manima beto zonzila kyuvu yayi:

• Yinki ya ke na salá nge na kuzaba ti, Yehova ke talá mpe ke kipeke bampasi ya beto?

NA BUNKUFI

Satana, Adami na Eva ke bantu ya ntete yina salá ti bampasi vanda na yinza. Kasi bampasi ya beto ke salá mpasi mingi na Yehova, mpe na ntangu fioti kaka yandi ke katula yawu.

Mambu ya kusimba

• Wa’ faso Satana vuná Eva?

• Mambu yina Adami na Eva salá natiná beto yinki?

• Wa’ faso beto me zaba ti bampasi ya beto ke nyongisá Yehova?

SOSA KUZABA DYAKA

Longoka yina Biblia ke zonzá na yina me tadila disumu.

“Yinki ke disumu?” (Tanga yawu na jw.org)

Longoka mingi na mambu yina Satana zonzá na jardin d’Eden.

“ Pourquoi Dieu permet-il les souffrances ? ” (La Tour de Garde, 1^er Janvier 2014)

Tala bamvutu ya kulunga na kyuvu mosi ya nene.

“Samu na yinki Nzambi biká nzila na lufwa ya ba millions ya ba Juif? Samu na yinki Nzambi biká ya salama?” (Tanga yawu na jw.org)

Tala mambu yina bakala mosi longoká na yina me tadila bampasi ya luzingu ya yandi.

Yehova me sadisa munu na kuvanda na luzingu ya mbote (5:09)