KILESO 34
Wapi mutindu beto lenda lakisa na Yehova ti beto ke zolaka yandi?
Kubanda ntangu yina nge bandá kulongoka kuzaba Nzambi, luzolo ya nge samu na yandi me kula kwandi? Nge ke na nsatu ya kukulisa dyaka kindiku ya nge na yandi? Kana nge sala yawu, Yehova ke zola nge mpe ke kipe nge dyaka ya kulutila. Wa’ faso nge lenda lakisa na Yehova ti nge ke zolaka yandi?
1. Wapi mutindu beto lenda lakisa na Yehova ti beto ke zolaka yandi?
Beto ke lakisa na Yehova ti beto ke zolaka yandi na kutumamá na misiku ya yandi. (Tanga 1 Yoane 5:3.) Yandi ke natá ata muntu na kutumama na yandi na ngolo. Kasi, yandi ke biká mosi na mosi na beto na kusoola na kutumama na yandi to ve. Samu na yinki? Samu Yehova me zola ti beto “kutumama na ntima mosi.” (Baroma 6:17) Ya zola zonza, yandi zola ve ti beto tumama na yandi na bantima zole, to samu ba me lomba beto yawu, kasi samu beto ke zolaka yandi. Bitini 3 na 4 ya buku yayi, ke sadisa nge na kuzaba wapi mutindu nge lenda pesa Yehova kilengi, mpe kumanga kusala mambu yina lenda nyongisa yandi.
2. Samu na yinki ya lenda vanda mpasi na kulakisa luzolo ya beto na Yehova?
“Muntu ya lunungu ke kutanaka na bampasi mingi.” (Nkunga 34:19) Beto nyonso ke nwaná na banzutu ya beto ya masumu. Bantangu ya nkaka ya ke vandá mpasi na kuzwa mbongo, bantu ke salá beto yimbi, mpe beto ke kutaná na bamambu mingi ya nkaka. Ntangu beto ke bwabaná na bankwamusu, ya ke vandá mpasi na beto na kutumama na Yehova. Ni na ntangu yina kusala mambu yina Yehova ke zolá ve, ke kumá pete. Kasi ntangu nge ke sala bangolo na kutumama na Yehova, nge ke lakisa ti nge ke zolaka yandi kulutila bima nyonso. Nge ke lakisa mpe ti nge ke ya kukangama na yandi. Na manima, Yehova mpe ke vanda ya kukangama na nge, mpe yandi ke bika ve nge ata fioti.—Tanga Nkunga 4:3.
SOSA KUZABA MBOTE-MBOTE
Tala samu na yinki kutumama ya nge ke mfunu mingi na mantwala ya Yehova, mpe beto zonzila yinki lenda sadisa nge na kuvanda ya kukangama na yandi.
3. Satana me vunina nge mambu
Faso Biblia ke zonzaka yawu na buku ya Yobi, Satana vuniná ve kaka Yobi mambu, kasi yandi vuniná mpe beto nyonso. Tanga Yobi 1:1, 6–2:10, mpe na manima beto zonzila byuvu yayi:
Samu na Satana, samu na yinki Yobi vanda tumamá na Yehova?—Tala Yobi 1:9-11.
Yinki Satana vuniná bantu nyonso, na nge mpe na kati?—Tala Yobi 2:4.
Tanga Yobi 27:5b, mpe na manima beto zonzila kyuvu yayi:
Wapi mutindu Yobi lakisá ti ya tsyeleka yandi vanda zolá Yehova?
Yobi lakisá ti yandi ke zolá Yehova na kuvandá ya kukangama na yandi
Beto ke lakisa luzolo ya beto na Yehova ntangu beto ke vanda ya kukangama na yandi
4. Sepelisa ntima ya Yehova
Tanga Bingana 27:11, mpe na manima beto zonzila byuvu yayi:
Yinki ya ke salá Yehova ntangu nge ke salá mambu na mayela nyonso mpe ke tumamá na yandi? Samu na yinki nge me zonza faso yina?
5. Nge lenda vanda ya kukangama na Yehova
Luzolo ya beto samu na Yehova ke natá beto na kuzonzila bantu ya nkaka mambu yina me tadila yandi. Kukangama ya beto na yandi, ke natá beto na kusala yawu ata ntangu ya ke vandá mpasi. Tala VIDEO, mpe na manima beto zonzila byuvu yina ke landa.
Ntangu ya nkaka, ya ke vandá kwandi mpasi samu na nge na kuzonzila bantu mambu ya Yehova?
Na video, yinki sadisá Grayson na kununga boma ya yandi?
Ya ke ve mpasi mingi na kuvanda ya kukangama na Yehova ntangu beto ke zolá mambu yina yandi ke zolá, mpe ke yiná mambu yina yandi ke yinaka. Tanga Nkunga 97:10, mpe na manima beto zonzila byuvu yayi:
Na nyonso yina nge me longoka na yina me tadila Yehova, wapi yina ke bamambu yina Yehova ke zolaka? Wapi yina ke bamambu yina yandi ke yinaka?
Wapi mutindu nge lenda longoka kuzola mambu yina ke mbote, mpe kuyina mambu yina ke yimbi?
6. Kutumama na Yehova ke natina beto bambote mingi
Kutumama na Yehova ke vandá kaka mbote ntangu nyonso. Tanga Izaya 48:17, 18, mpe na manima beto zonzila byuvu yayi:
Nge me kanisa ti Yehova ke zabá ntangu nyonso mambu yina ke mbote samu na beto? Samu na yinki nge me zonza faso yina?
Kubanda ntangu yina nge bandá kulongoka Biblia, mpe kuzaba Nzambi ya matsyeleka Yehova, wapi bambote nge me kuzwa?
BANTU YA NKAKA KE ZONZAKA: “Nzambi ke talaka ya yandi ve mambu yina beto ke salaka.”
Wapi verse nge lenda sadila, samu na kulakisa ti bamambu yina beto ke salá lenda sepelisa to kunyongisa Yehova?
NA BUNKUFI
Nge lenda lakisa ti nge ke zolá Yehova na kutumamá na yandi, mpe na kuvandá ya kukangama na yandi ata na ntangu ya mpasi.
Mambu ya kusimba
Yinki nge me longoka na kifwani ya Yobi?
Wa’ faso nge lenda lakisa luzolo ya nge na Yehova?
Yinki ke sadisa nge na kuvanda ya kukangama na Yehova?
SOSA KUZABA DYAKA
Tala wapi mutindu nge lenda vanda ya kukangama na Yehova mpe na kimvuka.
“Na muntu ya kukwikama, nge ke salá mambu ya kukwikama” (16:49)
Longoka mingi na mambu yina Satana vuniná bantu.
“ L’intégrité de Job ” (La Bible : quel est son message ?, partie 6)
Tala wapi mutindu bana lenda lakisa luzolo ya bawu na Yehova.
Wa’ faso ntwenya lenda lakisa ti yandi ke ya kukangama na Yehova, ata ntangu bantwenya ya nkaka ke sosá kunata yandi na kusala mambu ya yimbi?
Kusala ve bamambu na luyenge samu bampangi ndima nge! (3:59)