Sadisa ba yina ke longoká Biblia na bampangi ya nkaka na kukwenda tii na bateme

1-2. Nani lenda sadisa muntu yina ke longoká Biblia na kukwenda tii na bateme?

AMY yina ke vandá na Fidji zonzá: “Mu vandá zolá mingi mambu yina mu vandá longoká na Biblia. Mu zabá ti, ya vandá laverite. Kasi, lere mu bandá kulutisa ntangu na bampangi ya kimvuka, ba sadisa munu na kusala bachanjement mpe na kuzwa bateme.” Disolo ya Amy ke na longá beto mambu ya important yayi: ya ke facile na muntu yina ke longoká Biblia na kukwenda tii na bateme si bampangi ya nkaka mpe ke na sadisak’ yandi.

² Proklamatere nyonso lenda tula diboko samu na kusadisa muntu yina ke longoká Biblia na kukuma temwe ya Yehova. (Ef. 4:16) Leilani mpangi mosi ya kento ya pionier yina ke vandá na Vanuatu me zonza: “Mwana ke vandá ya mama ntangu yandi ke vandá ntete na kati ya kivumu, kasi ntangu yandi ke basiká, yandi ke kumá ya bantu nyonso. Mu kanisa ti ya ke faso mosi mpe na kisalu ya kusala badisiple. Bantu nyonso na kati ya kimvuka ke important samu na kunata muntu yina ke longoká Biblia na kukuma temwe ya Yehova.” Mwana ya fioti ke vandá na nsatu ya baparent ya yandi, bantu ya famiye, bakamarade mpe baprofesere ya lekole samu yandi kula. Ba ke salak’ yawu ntangu ba ke pesá mwana kuraje mpe ba ke longá yandi faso ya kuvanda na luzingu. Faso mosi mpe, baproklamatere nyonso lenda pesa bakonseye, kuraje mpe kulakisa ekzample ya bien na muntu yina ke longoká Biblia samu yandi kwenda tii na bateme.—Bin. 15:22.

3. Yinki nge me longoká na mambu yina me zonza Ana, Dorin, mpe Leilani?

³ Samu na yinki beto zolá vanda na kilengi ntangu baproklamatere ya nkaka ke na sadisá muntu yina ke longoká Biblia na beto? Ana, mpangi mosi ya kento yina ke pionier spesial na Moldovie me zonza: “Muntu yina ke longoká Biblia ke vandá na nsatu ba sadisa yandi mingi. kasi ya ke mpasi na proklamatere yina ke longoká na yandi na kusala yawu kaka yandi mosi.” Dorin, yina ke mpe pionier spesial na Moldavie me zonza: “Bambala mingi, baproklamatere ya nkaka ke zonzá bamambu yina ke simbá ntima ya muntu yina ke longoká na munu, bamambu yina vandá ata fioti ve na makanisi ya munu.” Leilani me pesa rezon ya nkaka: “Luzolo mpe ntima ya mbote yina bampangi ya nkaka ke lakisá na muntu yina ke longoká Biblia, ke sadisa yandi na kuzaba ti beto ke bisadi ya Yehova.”—Yoa. 13:35.

4. Yinki beto ke zonzila na artikle yayi?

⁴ Kasi, nge lenda yufula: ‘Yinki mu lenda sala na kusadisa muntu yina ke longoká Biblia na proklamatere ya nkaka na kukula na kimpeve?’ Beto zonzila yinki beto lenda sala ntangu proklamatere ya nkaka ke bokilá beto na kulongoka Biblia na muntu, mpe yinki beto lenda sala ntangu muntu yina ke longoká Biblia ke bandá kukwiza na balukutakanu. Beto ke tala mpe faso bakuluntu lenda sadisa ba yina ke longoká Biblia na kukwenda tii na bateme.

NTANGU BA KE NATÁ NGE NA KULONGOKA BIBLIA NA MUNTU

5. Yinki nge lenda sala ntangu proklamatere ya nkaka me nata nge na kukwenda longoka Biblia na muntu?

⁵ Ya ke ntete responsabilite ya proklamatere yina ke longoká Biblia na muntu, na kusadisa yandi na kuzaba bien mambu ya Biblia. Si mpangi mosi me lomba na nge na kukwenda longoka Biblia na muntu, nge me bonga kusadisa yandi. (Lon. 4:9, 10) Kasi, yinki nge lenda sala samu na kusadisa mpangi ya nge ntangu yandi ke na longoká Biblia na muntu?

6. Ntangu mpangi ya nkaka ke natá nge na kukwenda longoka Biblia na muntu, wa’ faso nge lenda sadila mambu ke na Bingana 20:18?

⁶ Baka ntangu ya kuprepare leson yina ba ke sala. Ya ntete, lomba na mpangi yina me bokila nge na kulongoka na muntu, na kuzonzila nge mwa bamambu ya luzingu ya muntu yango. (Tanga Bingana 20:18.) Nge lenda yufula mpangi yina: “Yinki nge me zaba na luzingu ya muntu yina ke longoká Biblia na nge? Wapi leson beno ke longoka na yandi? Yinki nge zola yandi simba na leson yayi? Ya ke na kima yina mu zolá sala to kusala ve to kuzonza ntangu beno ke longoka Biblia? Wa’ faso mu lenda sadisa muntu yango na kukula na kimpeve?” Ya vrai, mpangi yina ke longoká Biblia na muntu, lenda zonza ve na nge mambu yina muntu yina zonzá na yandi na kuzonza ve na muntu ya nkaka, kasi yandi lenda zonza na nge kaka bamambu yina nge ke na yawu nsatu samu na kusadisa muntu yina. Joy misionere mosi ya kento ke zwa mpe masolo ya faso yayi na bampangi yina yandi ke natá na kukwenda longoka Biblia na muntu. Yandi me zonza: “masolo yina mu ke zwa na bawu ke sadisa bawu na kuzaba faso ya kusadisa muntu yina ke longoká na munu.”

7. Si mpangi ya nkaka me nata nge na kukwenda longoka Biblia na muntu, samu na yinki nge zolá prepare leson yina ba ke longoka?

⁷ Si mpangi ya nkaka me bokila nge na kukwenda longoka Biblia na muntu, ya ke mbote nge prepare leson yina yandi ke longoka na muntu yina. (Esd. 7:10) Dorin, mpangi ya bakala yina beto zonzilá deja me zonza: “Mu ke vandá na kilengi ntangu mpangi yina ke precheke na munu, ke prepareke mambu yina beto ke kwenda longa. Ya ke sadisa yandi na kupesa bakomentere yina ke mbote samu na muntu yina ke na longoká.” Na yawu, muntu yina ke longoká Biblia ke tala ti beno zole me prepare leson yina yandi ke longoka mpe ya ke vanda ekzample ya mbote samu na yandi. Ata nge me zwa ve ntangu ya kuprepare leson yina ba ke longoka, kasi nge lenda baka mwa ntangu ya kukanisa na mambu yina muntu yina ke longoká Biblia lenda simba.

8. Wa’ faso beto lenda sala ti lusambu ya beto ntangu beto ke longoká Biblia na muntu vanda ve ya zulu-zulu?

⁸ Lusambu ke kima mosi ya important ntangu beto ke longoká na muntu. Kanisa na mambu yina nge ke zonza, si mpangi me lomba na nge na kusambila. Na yawu, kusambila ve na zulu-zulu. (Nku. 141:2) Hanae, yina ke vandá na Japon, lenda zimbana ve lusambu yina salá mpangi ya kento yina kwizá tala yandi na mpangi yina ke longoká Biblia na yandi. Yandi me zonza: “Mu talá ti yandi vandá na kikamarade ya ngolo na Yehova, mpe mu vandá na nsatu ya kuvanda faso yandi. Mu talá mpe ti yandi lakisa munu luzolo ntangu yandi tulá nkumbu ya munu na kati ya lusambu.”

9. Faso me zonza Zaki 1:19, yinki nge lenda sala samu na kusadisa mpangi yina me nata nge na kukwenda longoka na muntu?

⁹ Sadisa mpangi yina me nata nge na kulongoka Biblia na muntu. Omamuyovbi pionier special mosi yina ke vandá na Nigeria, me zonza: “Mpangi yina ba me nata na kukwenda longoka Biblia na muntu, zolá baka ntangu ya kuwa lere mpangi yina me nata yandi ke na longá muntu yina. Yandi zolá pesa bakomentere ya mbote, kasi yandi zolá zonza ve mingi samu yandi zaba ti ni mpangi yina ke longoká na muntu yina zolá zonza mingi.” Na yawu, na wapi ntangu nge me lunga kuzonza mpe wapi mambu nge me lunga kuzonza? (Bin. 25:11) Kuwa bien faso disolo ya bawu ke na kwenda. (Tanga Zaki 1:19.) Ni kuna nge ke zaba ntangu ya bien ya kuzonza. Ya vrai, nge zolá kanisa avant na kuzonza. Na kifwani, kuzenga ve mpangi ntangu yandi ke na zonzilá kima na muntu yina ke na longoká na yandi, mpe nge lenda banda ve kuzonza mambu ya nkaka yina yandi kanisá ve kuzonza. Kasi, komentere, ekzample to kestion yina nge ke sadila, zolá sadisa muntu yina ke longoká Biblia, na kusimba dyaka ya kulutila mambu yina mpangi me zonza deja. Bantangu ya nkaka nge lendá tala ti, ya ke ve bien na kubwela dyaka mambu ya nkaka na zulu ya mambu yina mpangi me zonza. Kasi, si nge felisite muntu yina ke longoká Biblia, mpe nge lakisa yandi ti yandi ke na valere na meso ya nge, nge lenda sadisa yandi na kukula na kimpeve.

10. Wa’ faso bamambu yina nge kutaná na yawu na luzingu lenda sadisa muntu yina ke longoka Biblia?

¹⁰ Zonzila bawu bamambu yina nge kutaná na yawu. Si ya lenda sadisa muntu yina ke longoká Biblia, nge lenda zonzila na bunkufi faso nge zabá laverite, wapi mambu ya mpasi nge kutaná na yawu to faso nge talá diboko ya Yehova na luzingu ya nge. (Nku. 78:4, 7) Ntangu ya nkaka ni yawu yandi ke na nsatu ya kuwa. Ya lenda kumisa kiminu ya yandi ngolo to kupesa yandi kuraje ya kukwenda tii na bateme. Ya lenda lakisa yandi mpe yinki ya kusala na mantwala ya mambu ya mpasi yina lenda vanda na yandi. (1 Pi. 5:9) Gabriel, yina ke vandá na Brésil mpe ke pionier, lenda zimbana ve mambu yina sadisak’ yandi ntangu yandi vandá longoka Biblia. Yandi me zonza: “Ntangu mu vandá kuwa bamambu ya mpasi yina bampangi ya nkaka kutaná na yawu, mu kwiza zaba ti Yehova ke talá bampasi ya beto. Mpe si ba lendá kunwana na yawu, munu mpe ke lenda.”

NTANGU BA KE KWIZÁ NA BALUKUTAKANU

11-12. Samu na yinki beto zolá yamba na kilengi nyonso ba yina ke bandá kukwiza na balukutakanu ya beto?

¹¹ Samu muntu yina ke longoká Biblia kwenda tii na bateme, yandi me lunga kuvanda ntangu nyonso na balukutakanu mpe kuwa malongi yina ba ke pesá kuna. (Ebr. 10:24, 25) Na yawu, proklamatere yina ke longoká na yandi, zolá bokila yandi na balukutakanu. Lere yandi ke kwiza, beto nyonso zolá yamba yandi mpe kuzonzila yandi mambu yina ke pesa yandi nsatu ya kukwiza dyaka. Wa’ faso beto lenda sala yawu?

¹² Yamba na kilengi nyonso muntu yina ke longoká Biblia. (Rom. 15:7) Si beto yamba na faso ya bien muntu yina ke longoká Biblia na balukutakanu, ntangu ya nkaka ya lenda pesa yandi nsatu ya kukwiza dyaka. Beto zolá suka ve kaka na kutula yandi aleze, kasi na tiya nyonso, beto zolá pesa yandi mbote mpe kulakisa yandi na bampangi ya nkaka. Solola na yandi samu ntangu ya nkaka mpangi yina ke longoká na yandi kwizá ve na lukutakanu, to ke na salá kima ya nkaka na ntangu yina. Baka ntangu ya kuwa mambu yina yandi ke na zonzá, mpe lakisa yandi ti yandi ke na valere na meso ya nge. Faso ya nge ya kuyamba muntu yina ke longoká Biblia lenda sala yandi yinki? Beto kuwa disolo ya Dmitrii. Yandi kuzwá bateme bamvula mingi ve me luta mpe bubu yayi yandi ke assistant. Yandi me kanisa na kilumbu ya ntete yina yandi kwizá na lukutakanu. Yandi me zonza: “Mpangi mosi ya bakala talá ti mu vandá na boma ntangu mu vandá kwiza na salle du Royaume. Yandi yambá munu mpe natá munu tii na kati ya salle. Bampangi mingi kwiza pesa munu mbote. Mu vandá vingila ve yawu, ya salá munu vrai kilengi. Mu kumá na nsatu ti balukutakanu vanda bilumbu nyonso na semaine. Ba vandá nabunu ba yamba munu faso yina na bakote nyonso yina mu kwendá.”

13. Wa’ faso ekzample ya nge ya mbote lenda sadisa ba yina ke longoká Biblia?

¹³ Vanda ekzample ya mbote. Ekzample ya nge ya mbote lenda sadisa muntu yina ke longoká Biblia na kundima ti beto ke vrai bakristo. (Mat. 5:16) Vitalii, yina ke pionier bubu yayi na Moldavie, me zonza: “Mu vandá talá faso bampangi ya kimvuka vandá natá luzingu ya bawu, faso ya bawu ya kukanisa, mpe ya kusala bamambu. Ya natá munu na kundima ti batemwe ya Yehova ke vrai bakristo.”

14. Wa’ faso ekzample ya nge lenda sadisa muntu yina ke longoká Biblia na kukula na kimpeve?

¹⁴ Avant na kuzwa bateme muntu yina ke longoká Biblia me bonga kusadila mambu yina yandi ke longoká. Ya lenda vanda ntangu ya nkaka mpasi na kusala. Kasi, ntangu yandi ke tala faso mambu ya mbote ke na kuminá nge samu nge ke na sadilá mambu ya Biblia, ya ke nata yandi na kulanda ekzample ya nge. (1 Ko. 11:1) Beto tala mambu yina kuminá Hanae yina beto me zonzila deja. Yandi me zonza: “Bampangi ya kento na ya bakala vanda sala bamambu yina mu vanda na nsatu ya kulongoka kusala. Ekzample ya bawu vanda lakisa munu faso ya kupesa bampangi kuraje, ya kulemvokila bawu mpe ya kulakisa bawu luzolo. Ba vandá zonzá ntangu nyonso mambu ya mbote samu na bampangi. Mu vanda na nsatu ya kuvanda faso bawu.”

15. Wa’ faso Bingana 27:17 ke na sadisá beto na kutala samu na yinki beto zolá sala kikamarade na ba yina ke kwizá ntangu nyonso na balukutakanu?

¹⁵ Sala kikamarade na ba yina ke longoká Biblia. Bambala nyonso yina muntu yina ke longoká Biblia ke banda kukwizá na balukutakanu, lakisa yandi ti yandi ke na valere na meso ya nge. (Flp. 2:4) Sosa kusolola na yandi samu na kuzaba yandi bien. Nge lenda zonza na yandi ti nge ke na kilengi ya kutala bachanjement yina yandi ke na salá. Beno lenda solola na yina me tadila famiye ya yandi, kisalu ya yandi mpe faso ke na lutilá kulongoka ya yandi ya Biblia. Kasi, sala keba, kuyufula ve yandi bakestion yina lenda talisa yandi nsoni. Masolo yina nge ke zwá na yandi lenda kulisa kikamarade ya beno. Si nge kuma kamarade ya muntu yina ke longoká Biblia, nge ke sadisa yandi na kukwenda tii na bateme. (Tanga Bingana 27:17.) Hanae yina ke pionier ya ntangu nyonso bubu yayi, me zimbana ve mbala ya ntete yina yandi kwizá na balukutakanu. Yandi me zonza: “Samu mu kumá na bakamarade na kati ya kimvuka, mu vandá vingilá balukutakanu kuma deja na mbangu mpe mu vandá kwendá ata ntangu mu vanda ya kulemba. Mu vanda sepelá kuvanda na bakamarade ya munu ya malu-malu. Ya sadisá munu na kubika kusala kikamarade na ba yina ke sambilá ve Yehova. Mu vandá na nsatu ya kuvanda kamarade ya ntima ya Yehova mpe ya bampangi ya kimvuka. Na manima, mu baká desizion ya kuzwa bateme.”

16. Wa’ faso nge lenda sadisa muntu yina ke longoká Biblia na kuvanda na kilengi ya kuvanda na kati ya kimvuka?

¹⁶ Ntangu muntu yina ke longoká Biblia ke na kontinye kusala bachanjement na luzingu ya yandi, sadisa yandi na kutala ti yandi ke na plase ya yandi na kati ya kimvuka. Na yawu, nge lenda bokila yandi na yinzo ya nge samu na kulutisa mwa ntangu. (Ebr. 13:2) Denis, yina ke vandá na Moldavie, ke na kanisá dyaka na ntangu yina yandi vanda longoká Biblia mpe me zonza: “Bambala mingi, bampangi ya kimvuka vanda bokilá munu na kento ya munu na kulutisa ntangu na bawu. Beto vandá kuwa bawu ntangu ba vandá zonza faso Yehova sadisá bawu. Ya pesá beto nsatu ya kusala faso bawu. Beto bandá kundima ti beto zolá sadila Yehova mpe beto ke vanda na luzingu ya kitoko si beto sala.” Ntangu muntu yina ke longoká Biblia ke kuma proklamatere, nge lenda bokila yandi samu yandi kwenda preche na nge. Diego, proklamatere mosi yina ke vandá na Brésil, me zonza: “Bampangi mingi ya bakala ke bokilá munu na kukwenda preche na bawu. Ya ke faso ya kulutila mbote samu na munu na kuzaba bawu bien. Ntangu mu ke salá yawu, mu ke longoká mingi, mpe kikamarade ya munu na Yehova na Yesu ke kulá.”

WA’ FASO BAKULUNTU LENDÁ SADISA?

17. Wa’ faso bakuluntu lenda sadisa ba yina ke longoká Biblia?

¹⁷ Pesa ba yina ke longoká Biblia ntangu ya nge. Bakuluntu, si beno lakisa luzolo mpe beno kipe ba yina ke longoká Biblia, beno lenda sadisa bawu na kukwenda tii na bateme. Beno lenda baka kwandi ntangu ya kusololá na ba yina ke longoká Biblia na balukutakanu nyonso? Ba ke tala ti beno ke pesá bawu valere, si beno bokila bawu na bankumbu ya bawu, surtout ntangu ba ke bandá kupesa bakomentere. Nge lenda yidiká kwandi programe ya nge samu na kuzwa mwa ntangu ya kukwenda na proklamatere mosi samu na kulongoka na muntu? Prezense ya nge lenda sadisa mingi muntu yina ke longoká Biblia. Jackie, mpangi mosi ya kento ya pionier na Nigeria, me zonza: “Mingi ya ba yina ke longoká Biblia ke pamuká ntangu ba ke zabá ti, mpangi yina me kwiza na munu ke kuluntu na kimvuka. Muntu mosi yina ke longoká Biblia me zonza: ‘Pastere ya munu lenda sala ve yawu. Yandi ke kwendá talá kaka bantu yina ke na mbongo mingi mpe kaka si ba futa yandi!’” Muntu yayi mase kwizá na balukutakanu.

18. Wa’ faso bakuluntu lenda sadila mambu yina ke na Bisalu 20:28?

¹⁸ Pesa formasion mpe kuraje na baproklamatere. Bakuluntu, beno ke na responsabilite ya nene ya kusadisa baproklamatere na kuzaba bien kupreche mpe kulonga bantu. (Tanga Bisalu 20:28.) Si nge me tala ti proklamatere ke na nsoni ya kulonga muntu na mantwala ya nge, zonza na yandi, yandi bika nge longoka na muntu yango. Jackie yina beto me zonzila deja, me zonza: “Bakuluntu ke sosá ntangu nyonso kuzaba faso ke ba yina ke longoká Biblia na munu. Ntangu ya ke kumá mwa mpasi na munu na kulongoka na muntu, ba ke pesá munu bakonseye yina ke sadisa munu.” Bakuluntu lenda sala mingi na pesa kuraje mpe ngolo na baproklamatere yina ke longoká Biblia na bantu. (1 Tes. 5:11) Jackie me bwela: “Ya ke salá munu vrai kilengi ntangu bakuluntu ke zonzá na munu ti, ba ke sepelá na kisalu yina mu ke salá. Mambu yina ba ke zonzá na munu, ke bwá na ntima ya munu faso maza ya madidi na ntangu ya tiya. Bafelisitasion ya bawu ke sadisá munu na kutala ti mu ke na salá kisalu ya mbote, mpe ya ke pesá dyaka munu kilengi ya kulongoka na bantu.”—Bin. 25:25.

19. Wapi kilengi beto nyonso lenda kuzwa?

¹⁹ Ata si bubu yayi beto ke ve na muntu yina ke longoká Biblia na beto, kasi beto lenda sadisa bantu yina ke longoká na bampangi ya nkaka, na kukwenda tii na bateme. Ntangu mpangi mosi ke bokilá beto na kukwenda longoka na muntu, beto zonza ve mingi. Beto baka ntangu ya kuprepare bakomentere yina beto ke kwenda pesa, samu na kusadisa mpangi yina me nata beto. Beto lenda sala kikamarade na ba yina ke longoká Biblia ntangu ba ke kwizá na salle du Royaume mpe beto lenda vanda ba-ekzample ya bien samu na bawu. Bakuluntu lenda lakisa na ba yina ke longoká Biblia ti ba ke pesá bawu valere, lere ba ke baká ntangu ya kusolola na bawu. Mpe ba lenda sadisa baproklamatere ntangu ba ke formeke bawu mpe ba ke felisiteke bawu. Beto ke vandá na vrai kilengi, ntangu beto ke salá kima, ata ya vanda ya fioti, samu na kusadisa muntu na kuzolá mpe kusadila Yehova!