Nge lenda kuzwa kilengi ya tsyeleka

1. Yinki ke ‘nsatu ya mambu ya kimpeve,’ mpe samu na yinki ya ke kwelaná na kilengi ya beto?

KILENGI ya tsyeleka ke ve kilengi yina nge ke na yawu bubu yayi mpe mbasi ya ke dyaka ve. Kilengi ya tsyeleka, muntu lenda vanda na yawu luzingu ya yandi nyonso. Samu na yinki? Na disolo yina yandi salá na zulu ya mongo, Yesu zonzá mambu yayi : ‘Kyese na bantu yina zaba mbote ti ba kele na nsatu ya mambu ya kimpeve.’ (Mat. 5:3) Yesu zabá ti Yehova yidiká bantu na nsatu ya ngolo ya kuzaba mpe kusambila yandi. Ni yawu ba ke bokilá ‘nsatu ya mambu ya kimpeve.’ Mpe samu Yehova ke ‘Nzambi yina ke ya kufuluka na kyese,’ bantu yina ke sambilak’ yandi lenda vanda mpe na kilengi.—1 Tim. 1:11.

2-3. a) Samu na Yesu, banani lenda vanda na kilengi? b) Yinki beto ke zonzila na disolo yayi, mpe samu na yinki beto ke na nsatu ya yawu?

² Beto lenda vanda kwandi na kilengi ata beto ke na bamambu? Ee. Na disolo yina yandi salá na zulu ya mongo, Yesu zonzá mambu yina lenda kamwisa beto. Yandi zonzaka: “Kyese na bayina ke na kudila.” Ata ba yina ke dilá samu na kilo ya masumu ya bawu, to bamambu ya nkaka ya mpasi, lenda vanda na kilengi. Yesu zonzá mpe yawu samu na “bayina ba ke talisaka mpasi samu na mambu” ya lunungu, mpe ba yina “bantu ke fingaka” samu ba ke bilandi ya yandi. (Mat. 5:4, 10, 11) Kasi, wa’ faso muntu lenda vanda na kilengi ya tsyeleka ntangu yandi ke na kati ya bamambu ya mutindu yayi?

³ Na mambu yina yandi zonzá, Yesu vandá longa beto ti kilengi ya tsyeleka zola zonza ve kuvanda ve na bamambu. Kasi ya zola zonza kulungisa bansatu ya beto ya mambu ya kimpeve, mpe kuvanda pene-pene na Nzambi. (Zaki 4:8) Wa’ faso beto lenda sala yawu? Na disolo yayi, beto ke zonzila bima tatu yina beto lenda sala samu na kuzwa kilengi ya tsyeleka.

KUDYA MADYA YA KIMPEVE

4. Wapi kima ya ntete ke sadisa beto na kuzwa kilengi ya tsyeleka? (Nkunga 1:1-3)

⁴ YA NTETE: Samu na kuvanda na kilengi ya tsyeleka, beto me fwana kudya madya ya kimpeve. Bantu na bibulu ke na nsatu ya madya samu na kuzinga. Kasi kaka bantu lenda kudya madya ya kimpeve. Mpe beto ke na nsatu ya yawu. Ni na yawu Yesu zonzaka: “Luzingu ya muntu kele kaka ve samu na mampa, kasi na mambu nyonso yina Nzambi ke tubaka.” (Mat. 4:4) Ni na yina beto zolá lutisa ve kilumbu yina beto me tanga ve Biblia, mambu ya Yehova. Mosi ya ba yina soniká Bankunga zonzaka: ‘Kyese na muntu yina ke vandaka na kyese na nsiku ya Yehova mpe yandi ke tangaka yawu mpimpa na ntangu.’—Tanga Nkunga 1:1-3.

5-6. a) Yinki beto ke longoká na Biblia? b) Wa’ faso kutanga Biblia ke sadisá beto?

⁵ Yehova ke zolá beto mingi. Ni na yina, yandi me lakisa beto na Biblia yinki beto me fwana sala samu na kuzwa luzingu ya kilengi. Na Biblia, beto ke longoká wa’ faso Yehova me zola luzingu ya beto vanda. Beto ke longoká wa’ faso beto lenda vanda pene-pene na yandi, mpe kuzwa mulemvo ya masumu ya beto. Mpe beto ke longoká luzingu ya kitoko yina yandi ke na bumbilá beto na bilumbu yina ke kwiza. (Yer. 29:11) Nyonso yina beto ke longoká na Biblia ke fulusá ntima ya beto na kilengi!

⁶ Biblia ke pesá mpe malongi yina beto lenda sadila na luzingu ya beto ya bilumbu nyonso. Ntangu beto ke landá malongi yina, beto ke vandá na kilengi. Ntangu nge ke vandá ya kulemba samu na bamambu ya luzingu, lutisa dyaka ntangu mingi na kutangá mambu ya Yehova, mpe na kuyindulá na yawu. Yesu zonzaka: “Kyese na bantu yina ke kuwaka Mambu ya Nzambi mpe ke sadilaka yawu !”—Luke 11:28.

7. Yinki nge lenda sala samu na kuzwa bambote na kutanga Biblia?

⁷ Ntangu nge ke tangá mambu ya Nzambi, vanda mutindu muntu yina ke baká ntangu na kudya na kilengi nyonso madya yina ke na mantwala ya yandi. Ntangu ya nkaka, mambu yayi me kuminá nge. Ba me lamba madya yina nge ke zolá mingi. Kasi samu nge ke ve na ntangu mingi to nge ke na bamambu ya nkaka na yintu, nge me kudya yawu mbangu-mbangu, mpe nge me baka ve ntangu na kudya yawu na kilengi. Na manima, nge me nyonga na yina nge baká ve ntangu na kudya malembe-malembe madya yina. Ya lenda salama mpe ntangu beto ke tangá Biblia. Bantangu ya nkaka, beto ke tangá na mbangu. Ya ke salá ti beto ke bakulá ve bamambu yina beto ke tangaka. Baka ntangu na kusepela kutanga Biblia. Ntangu nge ke tangá, sala mutindu bamambu yina nge ke na tangá ke na salamá na meso ya nge. Sala mutindu nge ke na wá bandinga ya bantu yina ba ke na zonzilá, mpe kanisa na bamambu yina nge me tanga. Kusala yawu ke pesa dyaka nge kilengi mingi.

8. Wa’ faso “kisadi ya kukwikama mpe ya mayela” ke lungisá kisalu ya yandi? (Tala mpe note ya yinsi ya paje.)

⁸ Yesu tulá “kisadi ya kukwikama mpe ya mayela” samu na kupesa beto madya ya kimpeve na ntangu yina me lunga. Ntembe ve, beto ke na kuzwá madya yango.b (Mat. 24:45) Mambu ya Nzambi ke kima ya ntete yina ke kotá na madya ya kimpeve yina kisadi ya kukwikama ke lambaka. (1 Tes. 2:13) Na yawu, madya yango ke sadisá beto na kuzaba makanisi ya Yehova, mutindu yandi ke lakisak’ yawu na Biblia. Ni na yina beto ke tangá Yinzo ya Kengidi, Réveillez-vous ! mpe bima yina ke basiká na jw.org. Beto ke bongamá samu na balukutakanu nyonso ya lumingu. Mpe beto ke talá JW télédiffusion bangonda nyonso, kana beto ke na yawu na ndinga ya beto. Kana beto ke dyá madya ya kimpeve, ya ke sadisa beto na kusala kima ya zole yina ke pesá kilengi ya tsyeleka.

TUMAMA NA MISIKU YA YEHOVA

9. Wapi kima ya zole ke sadisa beto na kuzwa kilengi ya tsyeleka?

⁹ YA ZOLE: Samu na kuvanda na kilengi ya tsyeleka, beto me bonga kutumama na misiku ya Yehova. Mosi ya ba yina soniká Bankunga zonzaka: ‘Kyese na konso muntu yina ke waka Yehova boma, yina ke tambulaka na banzila ya yandi.’ (Nku. 128:1) Kuvanda na boma ya Nzambi zola zonza kuvanda na buzitu ya mingi samu na yandi. Ni buzitu yina ke nata beto na kusala ata kima yina ke sepelisa ve yandi. (Bin. 16:6) Beto ke salá bangolo samu na kulanda ntangu nyonso faso ya Yehova ya kutala mambu ya mbote to ya yimbi, mutindu yandi me zonzila beto yawu na Biblia. (2 Ko. 7:1) Beto ke vanda na kilengi kana beto sala bamambu yina Yehova ke zolá mpe beto manga bamambu yina yandi ke yinaka.—Nku. 37:27; 97:10; Rom. 12:9.

10. Ya me lunga kaka kuzaba mambu yina Yehova zola? Zonzila yawu (Baroma 12:2)?

¹⁰ Tanga Baroma 12:2. Muntu lenda zaba ti Yehova ke na lutumu ya kuzonza na beto yinki ke mbote to yimbi. Kasi yandi me fwana kundima mpe kulanda misiku ya Nzambi. Na kifwani, muntu lenda zaba ti luyalu ke na lutumu ya kupesa misiku na yina me tadila mbangu samu na ba yina ke natá ba camions. Kasi yandi lenda ndima ve kulanda misiku yina. Na yawu, yandi ke nata mbangu kuluta bandilu yina ba me tula. Mambu yina beto ke salá ke lakisá kana beto ke ndimá ya tsyeleka ti misiku ya Yehova kele nzila yina me lutila mbote. (Bin. 12:28) Ni mutindu yina Davidi vandá talá bamambu. Yandi zonzá na Yehova: ‘Nge me lakisa munu nzila ya luzingu. Kyese ya mingi kele na ntwala na nge, kyese kele ya mankululu na diboko ya nge ya kitata.’—Nku. 16:11.

11-12. a) Ntangu beto ke ya kulemba to bamambu ke kwamisá beto, na yinki beto me fwana kusala keba? b) Wa’ faso Bafilipi 4:8 lenda sadisa beto na kusoola bansaka?

¹¹ Ntangu beto ke vandá ya kulemba to bamambu ke kwamisá beto, beto lenda vanda na nsatu ya kusala bima yina ke sadisa beto na kuzimbana bampasi ya beto. Kusala yawu ke ya yawu ve yimbi. Kasi beto me bonga kusala keba ti bima yango nata ve beto na kusala bamambu yina Yehova ke yinaka.—Ef. 5:10-12, 15-17.

¹² Na mukanda yina yandi sonikilá bampangi ya Filipi, Polo zonzilá na bakristo na kukanisa ntangu nyonso na bamambu yina ke “ya kudedama [to ya lunungu], ya kuvedila [to ya bunkete], ya kitoko, mpe ya nsoni ve.” (Tanga Bafilipi 4:8.) Ata ti Polo vandá zonzila ve na bansaka, kasi bamambu yina yandi soniká lenda sadisa beto na kusoola faso beto ke lutisá ntangu. Meka kusala mambu yayi: ntangu nge ke tangá verse yayi, bisika nyonso yina nge ke tala “mambu,” tula “banzimbu,” “ba films,” to “babuku.” Kusala yawu ke sadisa nge na kuzaba bansaka yina Yehova lenda ndima to ve. Beto zola kulanda misiku ya Yehova na luzingu ya beto. (Nku. 119:1-3) Ya ke sala ti ndinga yina ke zonzilá beto na kati ya bantima kwamisa ve beto. Na yawu, beto ke lenda kusala kima ya nkaka yina ke sadisa beto na kuvanda na kilengi.—Bis. 23:1.

TULA LUSAMBU YA YEHOVA NA KISIKA YA NTETE

13. Wapi kima ya tatu ke sadisa beto na kuzwa kilengi ya tsyeleka? (Yoane 4:23, 24)

¹³ YA TATU: Sala nyonso samu lusambu ya Yehova vanda na kisika ya ntete na luzingu ya nge. Ni Yehova yidiká beto. Na yawu, beto me bonga kusambila yandi. (Luz. 4:11; 14:6, 7) Kima ya kulutila mfunu na luzingu ya beto zolá vanda kusambila Yehova na mutindu yina yandi ke ndimaka. Ya zola zonza kusambila yandi ‘na mpeve mpe na matsyeleka.’ (Tanga Yoane 4:23, 24.) Beto zola ti mpeve ya santu twadisa beto samu beto sambila Yehova na mutindu yina ke kwelaná na matsyeleka yina ke na Biblia. Lusambu ya Yehova fwana vanda kima ya ntete na luzingu ya beto, ata ti beto ke zingá na bwala yina ba ke niminá kisalu ya beto, to ba ke kangá beto nzila na kusala yawu na mutindu ya mbote. Bubu yayi, bampangi ya beto kuluta 100 ke na boloko kaka samu ba ke Bambangi ya Yehova.c Ata mpili yina, ba ke na kilengi samu ba ke salá bangolo ya bawu nyonso na kusambila, kulongoka mpe kusadisa bantu ya nkaka na kuzaba Yehova mpe Kimfumu ya yandi. Ntangu ba ke fingá beto to ba ke nyokolá beto, beto lenda vanda na kilengi samu beto zaba ti Yehova ke na beto mpe yandi ke sakumuna beto.—Zaki 1:12; 1 Pi. 4:14.

KIFWANI MOSI

14. Yinki kuminá mpangi mosi ya ntwenya na Tadjikistan, mpe samu na yinki?

¹⁴ Bampangi ya beto ya nkaka kutaná na bampasi mingi. Kasi ba me lenda kuvanda na kilengi ya tsyeleka samu ba me sala bamambu tatu yina beto me zonzila. Mpangi Jovidon Bobojonov ke vandá na Tadjikistan. Ntangu yandi vandá na bamvula 19, yandi mangá kukuma soda, mpe ba kangak’ yandi na kilumbu ya 4 octobre 2019. Yandi lutisá bangonda mingi na boloko. Kuna ba vandá nyokola yandi mutindu muntu yina salá mambu ya yimbi. Na internet, ba zonzilá mambu ya yimbi yina ba vandá sala yandi. Ba vandá bulak’ yandi samu na kunata yandi na ngolo na kulwata bilele ya basoda, mpe kuzenga ndefi ya basoda. Na manima, ba sambisak’ yandi mpe ba natak’ yandi na boloko ya ngolo. Yandi vandá kuna tii ntangu mfumu ya bwala zonzá ba basisa yandi. Na kati ya bantangu nyonso yayi, Jovidon bikaná kaka ya kukangama mpe bumbá kilengi ya yandi. Wa’ faso yandi lendá kusala yawu? Ntangu nyonso, yandi zabá ti yandi vandá na nsatu ya mambu ya kimpeve.

15. Wa’ faso Jovidon vandá kuzwa madya ya kimpeve ntangu yandi vandá na boloko?

¹⁵ Ntangu yandi vandá na boloko, Jovidon biká ve kudya madya ya kimpeve, ata ti yandi vandá ve na Biblia mpe na ata mikanda ya beto. Wa’ faso yandi vandá kuzwa madya ya kimpeve? Bampangi ya kento na ya bakala yina vandá natinak’ yandi madya vandá soniká dikanisi ya kilumbu na basaki yina ba vandá natinak’ yandi madya. Na yawu, yandi vandá lenda kutanga mpe kuyindula na Biblia bilumbu nyonso. Ntangu yandi basiká na boloko, yandi pesá dilongi yayi samu na ba yina nabunu ba kutana na bankwamusu ya ngolo: “Ntangu beto ke ntete ve na boloko, beto me bonga kusala nyonso samu na kuzaba mingi Yehova, na kutangá Biblia mpe mikanda ya beto.”

16. Na wapi bamambu Jovidon tulá makanisi ya yandi?

¹⁶ Mpangi ya beto vandá landa misiku ya Yehova. Yandi vandá tulá ve makanisi ya yandi na bansatu ya yimbi, mpe yandi vandá salá ve bamambu ya yimbi. Yandi vandá tula makanisi ya yandi na Yehova mpe na bamambu yina ke mfunu samu na yandi. Jovidon vandá sepelá na kutala kitoko ya bima yina Yehova yidikaka. Basuka nyonso, ni banzimbu ya bandeke vandá vumbulak’ yandi. Na mpimpa, yandi vandá sepelá na kutala ngonda na bambwetete. Yandi zonzaka: “Makabu ya Yehova yayi vandá pesá munu kilengi mpe ngolo.” Ntangu beto ke sepelá na bamambu nyonso yina Yehova ke pesá beto na kimpeve mpe na kinsuni, ntima ya beto ke vandá na kilengi. Mpe kilengi yina ke salá ti beto kanga ntima.

17. Wa’ faso 1 Piere 1:6, 7 lenda sadisa muntu yina ke na kutaná na bamambu yina Jovidon kutaná na yawu?

¹⁷ Jovidon tulá lusambu ya Yehova na kisika ya ntete. Yandi zabá ti kuvanda ya kukangama ke mfunu na meso ya Yehova. Yesu zonzaka: ‘Nge fwana sambila Yehova Nzambi ya nge, mpe kaka ni yandi nge fwana sadila kisalu ya santu.’ (Luke 4:8) Basoda na bamfumu ya bawu vandá sosa ti Jovidon manga dibuundu ya yandi. Kasi Jovidon vandá sambilá bilumbu nyonso, mpimpa na ntangu. Yandi vandá lombá na Yehova na kusadisa yandi na kukanga ntima. Ata bamambu nyonso ya mpasi yina ba salak’ yandi, Jovidon bikaná kaka ya kukangama na Yehova. Bubu yayi, yandi ke na kilengi ya kulutila samu yandi ke na kima yina yandi vandá ve na yawu tekila ba kanga yandi, ba bula yandi mpe ba tula yandi na boloko: kiminu ya yandi me kuma ngolo ya kulutila, samu yandi me kutana na bampasi.—Tanga 1 Piere 1:6, 7.

18. Wa’ faso beto lenda bumba kilengi ya beto?

¹⁸ Yehova zaba yinki beto ke na yawu nsatu samu na kuvanda na kilengi ya tsyeleka. Kana nge sala bima tatu yina ke natá na kilengi ya tsyeleka, nge lenda bumba kilengi ya nge ata bampasi. Ya ke sala ti nge zonza mutindu muntu yina zonzaka: ‘Kyese na bantu yina Yehova kele Nzambi ya bawu!’—Nku. 144:15.