Bambote ya kuvanda na boma ya Yehova

1-2. Mutindu Loti, wapi mambu bakristo ke na kutaná na yawu bubu yayi?

NTANGU beto ke talá mavanga ya yimbi ya bantu bubu yayi, ya ke salá beto ntima mpasi mutindu Loti. Yandi “vwandaka tala ntima mpasi samu na nkadulu ya busafu ya bantu yina vwandaka zinga ata kutumama na misiku.” Yandi zabá ti Tata ya beto ya mazulu ke yiná ndyatulu ya mutindu yina. (2 Pi. 2:7, 8) Samu Loti vandá na boma ya Nzambi mpe vandá zolak’ yandi, yandi vandá yiná bamambu ya yimbi ya bantu yina vandá pene-pene na yandi. Beto mpe ke na zingá na bantu yina ke zitisá ve faso ya Yehova ya kutadila bamambu. Ata mpila yina, beto lendá kima mavanga ya yimbi kana beto bumba luzolo ya beto samu na Nzambi mpe beto kulisa boma ya kunyongisa yandi.​—Bin. 14:2.

² Samu beto lenda kusala yawu, Yehova me pesa beto lubakusu na nzila ya buku ya Bingana. Bakristo nyonso, ya vanda bakento to babakala, bantwenya to bantu ya kukula, beto nyonso lenda kuzwa bambote ya malongi yina ke na kati.

BOMA YA NZAMBI KE BUMBÁ BETO

3. Faso me zonzila yawu Bingana 17:3, wapi yina ke mosi ya bamambu yina lenda sadisa beto na kubumba bantima ya beto? (Tala mpe kizizi.)

³ Mosi ya bamambu ya mfunu yina ke natá beto na kubumba bantima ya beto ke ti Yehova ke talá bantima. Ya zola zonza ti yandi ke talá kimuntu ya beto ya kati yina bantu lenda tala ve. (Tanga Bingana 17:3.) Yandi ke zola beto kana beto fulusa makanisi ya beto na ndwenga ya yandi. (Yoa. 4 :14) Kusala yawu ke sadisa beto na kusala ve bamambu yina Satana mpe yinza ya yandi ke na sosá kunata beto na kusala. (1 Yoa. 5: 18, 19) Kukuma pene-pene na Yehova ke kulisa luzolo mpe buzitu ya beto samu na yandi. Ya ke sala ti beto yina makanisi ya kusala bamambu yina lenda nyongisa Tata ya beto ya mazulu. Ntangu beto ke vanda na nsatu ya kusala mambu ya yimbi, beto lenda yufula: ‘Samu na yinki mu ke nyongisa muntu yina ke zolá munu mingi?’​—1 Yoa. 4:9, 10.

4. Wa’ faso boma ya Yehova sadisá mpangi mosi ya kento na kusala ve mambu ya yimbi?

⁴ Marta, mpangi ya kento mosi yina ke vandá na Croatie kutaná na mambu yina zolá nata yandi na kuvukisa nzutu na faso yina Yehova ke niminaka. Yandi sonikaka: “Mu vandá lenda ve kukatula makanisi ya yimbi mpe nsatu ya kuvukisa nzutu na yintu ya munu. Kasi ni boma ya Yehova sadisá munu.”b Na wa’ faso boma ya Yehova sadisak’ yandi? Marta me zonza ti yandi baká ntangu ya kukanisa na yina zolá kumina yandi, kana yandi baka mukanu ya yimbi. Beto mpe lenda sala mutindu yandi. Mambu ya kulutila mpasi yina lenda kumina beto, ni kunyongisa Yehova mpe kulenda dyaka ve kusadila yandi samu na ntangu nyonso.​—Kub. 6:5, 6.

5. Yinki beto lenda longoka na yina kuminá Leo?

⁵ Kuvanda na boma ya Yehova ke nata beto na kusala keba na kuvanda ve na bandiku yina ke salá bamambu yina Yehova ke yinaka. Leo, mpangi mosi yina ke vandá na Congo bendá kileso na yawu. Bamvula 4 na manima ya mbotokolo ya yandi, yandi bandá kulutisa ntangu na bandiku yina ke salá bamambu ya yimbi. Yandi vandá kanisa ti kuvanda na bawu vandá ve disumu samu yandi mosi vandá sala ve bamambu ya yimbi faso bawu. Kasi ya lutá ve faso yina. Bandiku yango natak’ yandi na kunwa malafu mingi mpe na kuvukisa nzutu na faso yina Yehova ke yinaka. Yandi bandá kukanisa na bamambu yina bibuti ya yandi yina vandá sadila Yehova longak’ yandi. Yandi kanisá mpe na kilengi yina vandá na yandi ntangu yandi vandá sadila Yehova. Yinki salamá na manima? Na lubakusu ya bakuluntu, yandi vutuká na Yehova. Bubu yayi, yandi ke na kilengi mpe yandi ke kuluntu mpe pionnier spécial.

6. Na disolo yayi, wapi bifwani ya bakento zole yina beto ke tala?

⁶ Beto tala na Bingana kikapu 9 bifwani ya bakento zole: mosi ke kifwani ya buzoba, ya nkaka ke kifwani ya ndwenga. (Ntangu ya nkaka, Biblia ke fwanisá bima to mambu na bantu. Na kifwani, nge lenda tala Baroma 5:14; Bagalate 4:24.) Na yawu, beto zimbana ve ti, mambu ya kuvukisa nzutu na faso ya yimbi, ya kuwa banzimbu yina ke vumbula nsatu ya kuvukisa nzutu, ya kutala bafoto to bavideo ya bantu yina ke kimpene to yina ke na vukisá nzutu ke ya kufuluka na yinza ya Satana yayi. (Ef. 4:19) Na yawu, beto me lunga kukulisa boma ya Nzambi mpe kukima bamambu ya yimbi. (Bin. 16:6) Beto nyonso, ya vanda bakento to babakala, beto lenda kuzwa bambote na bamambu yina ke na Bingana kikapu 9. Bakento zole yina ba ke na zonzilá awa ke na bokilá bantu ya kukondwa mayela, to ‘yina me kondwa mabanza ya mbote.’ Bawu zole ke na zonzilá mambu yayi: ‘Kwiza na yinzo ya munu, mu ke na madya.’ (Bin. 9:1, 5, 6, 13, 16, 17) Kasi yina ke kumina bantu yina ke kwenda na kento ya ndwenga ke ve faso mosi na bantu yina ke kwenda na kento ya zoba.

KUNDIMA VE KUKWENDA NA ‘KENTO YA ZOBA’

7. Faso ke lakisak’ yawu Bingana 9:13-18, yinki ke kumina ba yina ke ndima kukwenda na kento ya zoba? (Tala mpe kizizi.)

⁷ Beto tala faso ‘kento ya zoba’ ke na bokilá bantu. (Tanga Bingana 9:13-18.) Yandi ke na bokilá na ngolo bantu ya kukondwa mabanza ya mbote: ‘Kwiza awa’ samu na kusala feti. Yinki ke salama na manima? ‘Bantu yina me kondwa ngolo na lufwa kele kuna.’ Baverse ya nkaka ya Bingana ke sadilá mpe nzonzolo ya mutindu yayi. Ba me kebisa mpe beto na yina me tadila ‘kento ya yintu ngolo’ mpe ‘kento ya kinsuza.’ Beto ke tangaka: ‘Yinzo ya yandi ke kulumuka na lufwa.’ (Bin. 2:11-19) Bingana 5:3-10 ke na kebisá mpe beto na yina me tadila ‘kento ya yintu ngolo’ yina ‘makulu ya yandi ke kulumukaka na lufwa.’

8. Wapi mukanu beto nyonso me fwana kubaka?

⁸ Ba yina ke kuwá mambu ya ‘kento ya zoba’ me fwana kusoola: kukwenda to kukwenda ve? Beto mpe ke na mambu ya kusoola. Yinki beto ke sala kana ba ke na natá beto na kuvukisa nzutu na faso yina Yehova ke zolá ve? Yinki beto ke sala kana beto me kubwa na tele to na internet na bizizi ya yimbi to yina ke na lakisá bantu yina ke na vukisá nzutu?

9-10. Zonzila mwa bamambu yina zolá nata beto na kukima kuvukisa nzutu na faso ya yimbi.

⁹ Bamambu mingi lenda sadisa beto na kubwa ve na mutambu ya kuvukisa nzutu na faso yina Yehova ke zolá ve. ‘Kento ya zoba’ ke na zonzaka: ‘Maza ya kuyiba ke vandaka kitoko.’ Wapi yina ke ‘maza ya kuyiba’? Ntangu ya nkaka, Biblia ke fwanisá maza ya kitoko na kuvukisa nzutu ya kento na bakala yina ke ya kukwela. (Bin. 5:15-18) Bakala na kento yina ke ya kukwelana mutindu luyalu ke lombak’ yawu lenda kuzwa kilengi ntangu ba ke na vukisá nzutu na faso ya kulunga mpe yina Yehova ke ndimaka. Kasi ni yawu ve zola zonza ‘maza ya kuyiba.’ ‘Maza ya kuyiba’ zola zonza kuvukisa nzutu na muntu yina ke ve kento to bakala ya nge. Mingi-mingi bantu ke salak’ yawu na kinsweki mutindu bantu yina ke na labaka. Maza yango lenda talana kitoko samu ti ba ke kanisá ti ata muntu ke zaba yina ba me sala. Kyadi na bawu: ba ke vunamá samu ti Yehova ke talá nyonso. Ya ke ve na mambu yina me lutila yimbi na kuvanda dyaka ve na kindiku ya mbote na Yehova. (1 Ko. 6:9, 10) Kasi bamambu ya nkaka ya mpasi kele.

¹⁰ Muntu yina me vukisa nzutu na faso ya yimbi lenda vanda na nsoni na manima, lenda tala ti yandi ke kaka muntu ya mpamba, lenda kuzwa kivumu yina yandi vandá vingila ve to lenda mwangisa dikanda ya yandi. Muntu yina ke na mayela ke mangá kukota na ‘yinzo’ ya kento ya zoba mpe kudya kuna. Dyaka, bantu yina ke salak’ yawu ke kufwá na kimpeve mpe mingi na kati ya bawu ke kuzwá bimbevo yina ke natá bawu na lufwa na mbangu. (Bin. 7:23, 26) Bingana kikapu 9 verse 18 me manisa mutindu yayi: ‘Bantu yina yandi me bokila kele na bisika ya yinda ya Ndyamu.’ Samu na yinki bantu mingi ke ndimá mambu ya luvunu yina ke natina kak’ bawu bampasi mingi?​—Bin. 9:13-18.

11. Samu na yinki kutala bafoto mpe bavideo ya bantu yina ke kimpene to yina ke na vukisa nzutu ke mutambu ya nene?

¹¹ Kuwa banzimbu yina ke vumbulá nsatu ya kuvukisa nzutu to kutala bafoto mpe bavideo ya bantu yina ke kimpene to yina ke na vukisá nzutu ke mutambu ya nene. Bantu ya nkaka ke kanisá ti ya ke salá ata kima. Kasi, kifu yango ke yimbi ya kulutila, samu ti muntu yina ke salak’ yawu ke katulá buzitu ya yandi mosi mpe ya bantu ya nkaka. Dyaka, ya ke mpasi mingi na kubik’ yawu. Kifu yango ke katulá ve bansatu ya yimbi, kasi ya ke kulisá dyaka yawu. (Kol. 3:5; Zaki 1:14, 15) Ya tsyeleka, na manima ya kutala yawu, mingi ke kubwá na mutambu ya kuvukisa nzutu ya faso yina Yehova ke niminaka.

12. Samu na yinki beto me fwana kulosa bizizi yina lenda pesa muntu nsatu ya kuvukisa nzutu?

¹² Yinki beto bakristo me lunga kusala, kana beto me kubwa na telefone, tele to appareil ya nkaka na kizizi ya bantu yina ke na vukisá nzutu to yina ke kimpene? Na mbangu-mbangu, beto me fwana kukatula yawu. Mosi ya bamambu yina ke sadisa beto na kusala yawu ni kuzimbana ve ti kindiku ya beto na Yehova ke kima yina me lutila mfunu. Ya ke mpe na bizizi yina ke lakisá ve bantu yina ke na vukisá nzutu to yina ke kimpene, kasi yina lenda pesa muntu nsatu ya kuvukisa nzutu. Samu na yinki kulosa yawu? Samu beto zola ata fioti ve kusala kinsuza na kati ya ntima ya beto. (Mat. 5:28, 29) David, kuluntu mosi yina ke vandá na Thaïlande me zonza: “Mu ke yufulá na munu mosi: ‘Ata ti bizizi yina mu ke na talá ke na lakisá ve bantu yina ke na vukisá nzutu to yina ke kimpene, kasi Yehova ke kwandi na kilengi na yina mu ke na talaka?’ Kukanisa na yawu ke sadisá munu na kusala bamambu na mayela nyonso.”

13. Yinki ke sadisa beto na kusala bamambu na ndwenga nyonso?

¹³ Mosi ya bamambu yina lenda sadisa beto, ni kuvanda na boma ya kusala mambu yina lendá nyongisa Yehova. Boma ya Nzambi ke ‘kubanda ya ndwenga.’ (Bin. 9:10) Kubanda ya bingana kikapu 9, ke fwanisá ‘ndwenga ya tsyeleka’ na kento ya nkaka.

NDIMA KULANDA ‘NDWENGA YA TSYELEKA’

14. Na Bingana 9:1-6, nani ke na bokilá beto?

¹⁴ Tanga Bingana 9:1-6. Na baverse yayi ni Yehova muntu yina yidiká beto, mpe na yina ndwenga nyonso katuká ke na bokilá beto. (Bin. 2:6; Rom. 16:27) Kifwani yina ba me sadila awa, ke na lakisá yinzo ya nene yina ke na makunzi (to colonnes) ya nene 7. Ya ke na lakisá ti Yehova ke kabulá mpe ke yambá na ntima mosi bantu yina ke na nsatu ya kutambula na ndwenga nyonso na luzingu ya bawu.

15. Yinki Nzambi zola beto sala?

¹⁵ Na Bingana kikapu 9, ba ke na fwanisá ‘ndwenga ya tsyeleka’ na kento mosi. Kifwani yayi ke na lakisá ti Yehova ke na kifu ya kukabulá mpe yandi ke pesá beto bima mingi ya kitoko. Na baverse yayi, kento yango ke na bokilá bantu na kukwiza kudya madya mpe kunwa vinu. (Bin. 9:2) Na yawu, baverse 4 na 5 ke zonzaka: ‘Yandi ke tubila muntu yina me kondwa mabanza ya mbote ti: “Kwiza, kudya dimpa ya munu.”’ Samu na yinki kundima kukwenda na yinzo ya ‘kento ya ndwenga’? Samu beto ke bana ya yandi, Yehova zola beto tambula na ndwenga mpe mayela nyonso. Yandi zola ve ti beto sala bamambu yina ke talisa beto mpasi. Na yawu, ‘yandi ke bumbaka mbote-mbote mayela samu na bantu ya mbote.’ (Bin. 2:7) Ntangu beto ke vandá na boma ya Yehova, beto ke zolá kusala bamambu yina ke sepelisak’ yandi. Beto ke vandá na kilengi ya kuwa mpe kusadila malongi ya yandi.​—Zaki 1:25.

16. Wa’ faso boma ya Nzambi sadisá Alain na kubaka mukanu ya mbote, mpe wapi bambote ya nataka?

¹⁶ Beto tala wa’ faso boma ya Nzambi sadisá Alain na kubaka mukanu ya mbote. Kuluntu yayi ke longisá na lukolo mosi mpe yandi me zonza: “Ba yina ke salá na munu vandá kanisá ti ya ke ve yimbi na kutala bavideo ya bantu yina ke na vukisá nzutu samu ti ya lenda sadisa bawu na kuzaba bafaso ya kuvukisa nzutu.” Kasi Alain zabá ti ya ke yimbi. Samu yandi ke na “boma ya Nzambi,” yandi me zonza: “Mu mangá kusala faso bampangi ya munu ya kisalu. Mpe mu zonzilá bawu samu na yinki mu mangaka.” Yandi sadilá malongi ya ‘ndwenga ya tsyeleka,’ samu na ‘kutambula na nzila ya mayela ya kubakula mambu.’ (Bin. 9:6) Kutala faso ya Alain ya kutadila bamambu natá ba ya nkaka na kulongoka Biblia mpe na kukwenda na balukutakanu.

17-18. Wapi bambote ke kuzwá ba yina ke landá ‘ndwenga ya tsyeleka,’ mpe yinki ke na vingalá bawu na mantwala? (Tala mpe kizizi.)

¹⁷ Yehova me sadila bifwani ya bakento zole yayi samu na kulakisa beto faso ya kuvanda na kilengi na bilumbu yina ke kwiza. Ba yina ke ndimá kukwenda na ‘kento ya zoba’ ke kuzwá kilengi na kuvukisa nzutu na faso yina Yehova ke zolá ve. Kasi, ba ke talá kaka kilengi yina ba ke na zwá na ntangu yina, ba ke kanisá ve na yina ke kumina bawu na manima. Ya ke natá bawu na ‘bisika ya yinda ya Ndyamu.’​—Bin. 9:13, 17, 18.

¹⁸ Ya ke vanda ve faso mosi samu na ba yina ke ndima kulanda ‘ndwenga ya tsyeleka.’ Ba ke vanda na kilengi samu ba ke vanda na nyonso yina lenda sadisa bawu na kuvanda pene-pene na Yehova. (Iza. 65:13) Na nzila ya mbikudi Izaya, Yehova zonzaka: ‘Beno kuwa munu na dikebi nyonso, mpe beno kudya bima ya mbote, na yawu beno ke vanda na kyese ya mingi samu na bima yina kele ya mbote.’ (Iza. 55:1, 2) Beto ke na longoká kuzola bima yina Yehova ke zolá mpe kuyina yina yandi ke yinaka. (Nku. 97:10) Mpe beto ke na kilengi ya kubokila bampangi ya nkaka na kuzwa mpe bambote ya ‘ndwenga ya tsyeleka.’ Beto ke mutindu bisadi yina me ‘tuba na ndinga ya ngolo na bisika ya kunanguka ya mbanza ti: ‘Konso muntu yina me kondwa mayela, yandi kwiza awa.’ Bambote yina beto ke kuzwa ke ve kaka samu na bubu yayi. Samu beto ke “zinga” ntangu nyonso, beto ke bika ve ‘kutambula na nzila ya mayela ya kubakula mambu.’​—Bin. 9:3, 4, 6.

19. Mutindu Longi 12:13, 14 ke na zonzak’ yawu, yinki beto zolá sosa kaka kusala? (Tala mpe encadré “Bambote ya kuvanda na boma ya Nzambi.”)

¹⁹ Tanga Longi 12:13, 14. Bika ti boma ya Nzambi bumba bantima ya beto mpe sadisa beto na kuvanda na makanisi ya mbote mpe kuvanda kaka pene-pene na Nzambi. Boma yango ke pesa beto dyaka nsatu ya kubokila bantu ya nkaka na kutambula na ‘ndwenga ya tsyeleka’ mpe kuzwa bambote yina yawu ke nataka.