Bileso yina beto lenda benda na mikanda zole yina Piere sonikaka

1. Wapi kisalu Yehova pesá Piere ata ti yandi vandá pene-pene na lufwa?

NTUMWA Piere vandá ya kukangama na Yehova na kati ya bamvula mingi. Yandi vandá samuná na Yesu, yandi bandá mpe kusamuna na ba yina vandá ve bazwife, mpe na manima yandi kumá mosi ya bampangi ya Kimvuka ya Bantwadisi. Piere zabá mpe ti lufwa ya yandi vandá dyaka ve ntama. Ata faso yina, Yehova bwelak’ yandi kisalu. Na mvula 62 ti na 64 N.B., Yehova sadilak’ yandi na kusonika mikanda zole ya Biblia: 1 na 2 Piere. Piere vandá na kivuvu ti mikanda zole yayi zolá sadisa bakristo na manima ya lufwa ya yandi.—2 Pi. 1:12-15.

2. Samu na yinki beto lenda zonza ti Piere soniká mikanda yayi na ntangu ya kulunga?

² Piere soniká mikanda yina, ntangu bampangi ya yandi vandá na “bantontolo ya konso mutindu,” yina vandá talisa bawu kyadi. (1 Pi. 1:6) Bantu ya yimbi vandá sosa kukotisa malongi ya luvunu mpe ndyatulu ya mvindu na kati ya kimvuka ya bakristo. (2 Pi. 2:1, 2, 14) Ya bikaná kaka mwa ntangu fioti samu “nsuka ya yinza” kumina bakristo yina vandá zinga na Yeruzalemi. “Nsuka ya yinza” awa ke ntangu basoda ya Roma mwangisá tempelo mpe bwala ya Yeruzalemi. (1 Pi. 4:7) Ntembe ve, mikanda yina Piere soniká sadisá bakristo na kuzaba yinki ya kusala samu na kukanga ntima na bampasi yina vandá na bawu. Ya sadisá mpe bawu na kubongama na bampasi yina zolá kumina bawu na mantwala.b

3. Samu na yinki beto me bonga kulongoka mikanda zole yina Piere sonikaka?

³ Ata ti Piere soniká mikanda yayi samu na bakristo ya ntete, Yehova zolá mpe ti ya vanda na kati ya Biblia samu beto kuzwa bambote ya yawu. (Rom. 15:4) Mutindu bakristo ya ntete, beto ke na zingá na yinza yina ke ya kufuluka na ndyatulu ya mvindu. Na yawu, beto ke kutaná na bampasi yina lenda sala ti ya vanda mpasi na beto na kusadila Yehova. Dyaka, ntangu fioti me bikana samu beto kutana na mpasi yina ke lutila mpasi yina bazwife vandá na yawu ntangu ba mwangisá Yeruzalemi na tempelo. Mikanda zole yina Piere soniká ke na bamambu ya mfunu samu na beto. Ya ke sadisa beto na kuvanda ya kukubama samu na kilumbu ya Yehova, kuvanda dyaka ve na boma na yina bantu ke kanisá na beto to yina ba lenda sala beto, mpe kuvanda na luzolo ya kulutila na bampangi ya beto. Bamambu yina ke na mikanda yango, lenda sadisa mpe bakuluntu. Ya ke lakisa bawu, wa’ faso ba lenda sadisa bampangi ya kimvuka ya bawu na kubikana ya kukangama na Yehova.

KUBIKA VE NA KUVINGILA

4. Faso me zonza 2 Piere 3:3, 4, yinki lenda lembisa kiminu ya beto?

⁴ Bubu yayi, beto ke zingá na bantu yina ke ndimá ve bambikudulu ya Biblia. Bantu mingi ke seká beto samu banda bamvula, beto ke zonzá ti nsuka ya yinza me kuma pene-pene. Bantu ya nkaka ke zonzá ti ya ke kwiza ata fioti ve. (Tanga 2 Piere 3:3, 4.) Kana beto kuwa bamambu yango na bantu yina ke salá na beto, yina beto ke samuná, to ya dikanda ya beto, ya lenda lembisa kiminu ya beto. Piere zonzilá bamambu yina lenda sadisa beto.

5. Yinki ke sadisa beto na kuvingila na ntima ya yinda nsuka ya yinza? (2 Piere 3:8, 9)

⁵ Bantu ya nkaka lenda kanisa ti Yehova ke na lutisá ntangu mingi samu na kufwa bantu ya yimbi mpe kumwangisa yinza yayi. Bamambu yina Piere zonzá lenda sadisa beto, samu ti ya ke na bambulá beto ti Yehova ke talá ve ntangu faso beto ke talak’ yawu. (Tanga 2 Piere 3:8, 9.) Samu na Yehova, kilumbu mosi ke mutindu bamvula 1 000. Yehova ke na ntima ya yinda. Yandi zola ata fioti ve ti muntu mosi kufwa. Ntangu kilumbu ya yandi ke kuma, ya ke vanda nsuka ya yinza. Kasi bubu yayi, beto ke na bweso ya kusadila ntangu yina me bikana, samu na kusamuna na bantu nyonso na ntoto.

6. Yinki lenda sadisa beto na kuzimbana ve kilumbu ya Yehova? (2 Piere 3:11, 12)

⁶ Piere zonzá na beto na kuzimbana ve kilumbu ya Yehova. (Tanga 2 Piere 3:11, 12.) Wa’ faso beto lenda sala yawu? Bilumbu nyonso, beto lenda kanisa na wa’ faso luzingu ya beto ke vanda na yinza ya malu-malu. Kusala mutindu beto ke na paradiso: beto ke na kuzwá mupepe ya kitoko, beto ke na kudyá madya yina ke mbote samu na mavimpi ya beto, beto ke na kilengi ya kutala ba yina beto ke zolá kuvumbuka na lufwa mpe beto ke na longá mambu ya Biblia na ba yina zingá bamvula mingi tekila kulungana ya bambikudulu ya Biblia. Ntangu nge ke yindula na bamambu yayi, ya ke sadisa nge na kuvingila na ntima ya yinda nyonso ntangu yango, mpe na kuvanda na kundima ti nsuka ya yinza me kuma pene-pene. Kana beto “zaba mambu nyonso” na yina me tadila bilumbu yina ke kwiza, ‘bayina ke zitisaka ve Nzambi ke vuna beto ve.’—2 Pi. 3:17.

KUKIMA VE BANTU

7. Yinki boma ya bantu lenda sala beto?

⁷ Samu beto zaba ti kilumbu ya Yehova me kuma pene-pene, beto zolá sala bangolo ya beto nyonso samu na kusamuna nsangu ya mbote na bantu ya nkaka. Kasi ntangu ya nkaka, beto lenda vanda na boma ya kusamuna bawu. Samu na yinki? Samu na yina ba lenda kanisa to na yina ba lenda sala beto. Ya kuminá mpe Piere. Na nkokila tekila lufwa ya Yesu, Piere vandá na boma ya kuzonza ti yandi vandá mosi ya bilandi ya Yesu mpe yandi zonzá ti yandi zabá ve Yesu. (Mat. 26:69-75) Kasi, Piere katulá boma ya yandi, mpe na manima yandi sonikaka: “Beno tala muntu boma ve, mpe beno vwanda ve na mabanza ya kidi-kidi.” (1 Pi. 3:14) Bamambu yina yandi zonzá ke na lakisá ti beto mpe lenda katula boma ya bantu.

8. Yinki ke sadisa beto na kuvanda dyaka ve na boma ya bantu? (1 Piere 3:15)

⁸ Yinki lenda sadisa beto na kukima ve bantu? Piere me zonzila beto: “Beno zitisa Klisto na bantima ya beno.” (Tanga 1 Piere 3:15.) Beto lenda bambuka ti Yesu Kristo ke Mfumu ya beto, mpe yandi ke na ngolo mingi. Kana beto ke na boma ntangu beto ke zonzá na muntu nsangu ya mbote, beto kanisa ti Mfumu ya beto Yesu ke na yalá na mazulu na bambazi mingi. Beto zimbana ve ti, yandi ke na “lulendo nyonso . . . na zulu mpe na ntoto.” Yandi ke vanda na “beto bilumbu nyonso tii na nsuka ya yinza.” (Mat. 28:18-20) Piere ke na zonzá na beto na “kuvwanda ya kukubama” samu na kunwanina kiminu ya beto. Yinki ke sadisa nge na kusamuna muntu yina ke salá na nge, yina ke kotá na nge, to bisika nyonso nge kele? Kanisa ntete na ntangu yina nge ke sala yawu, mpe yidika bamambu yina nge ke zonza. Sambila samu na kuzwa bukindi, tula ntima na Yehova samu yandi ke sadisa nge na kukatula boma ya bantu.—Bis. 4:29.

“BENO ZOLASANA MINGI”

9. Na wapi ntangu Piere lendá ve kulakisa luzolo na bampangi? (Tala mpe kizizi.)

⁹ Piere longoká faso ya kulakisa luzolo. Yandi vandá ntangu Yesu zonzaka: “Mu ke na kupesa beno musiku ya malu-malu: Beno zolasana beno na beno. Mutindu mu zolaka beno, beno zolasana beno na beno.” (Yoa. 13:34) Kasi na manima, yandi mangá kudya na bampangi ya yandi yina vandá ve bazwife samu yandi vandá na boma ya bakristo yina vandá bazwife. Ntumwa Polo zonzá ti Piere vandá sala “nsalulu ya bantima zole.” (Gal. 2:11-14) Piere ndimá masembo ya Polo, mpe yandi bendá kileso na yawu. Na mikanda zole yina yandi soniká, yandi zonzá ti beto zolá vanda ve kaka na luzolo na bampangi, kasi beto me lunga mpe kulakisa bawu luzolo yango.

10. Yinki ke sadisa beto na “kuzolasana na butsyelika mutindu bampangi?” Zonzila yawu. (1 Piere 1:22)

¹⁰ Piere zonzá ti beto me lunga “kuzolasana na butsyelika mutindu bampangi.” (Tanga 1 Piere 1:22.) Beto ke lakisa luzolo ya faso yayi ntangu beto ke tumama na malongi nyonso yina beto ke longoká na “butsyelika.” Na kati ya butsyelika yango, ya ke na malongi yina ke zonzá ti “Nzambi ke talaka bantu nyonso mutindu mosi.” (Bis. 10:34, 35) Kana beto lakisa luzolo na bampangi ya nkaka, kasi ve na bampangi nyonso na kimvuka, beto lenda zonza ve ti beto ke na tumamá na musiku ya Yesu na yina me tadila luzolo. Mutindu Yesu, ya lenda vanda ti, beto ke ya kulutila kuvanda pene-pene na bampangi ya nkaka na kimvuka. (Yoa. 13:23; 20:2) Kasi, beto zimbana ve yina Piere zonzá, beto me lunga kusala bangolo samu na “kuzolasana na butsyelika mutindu bampangi.” Beto me lunga kuzola bampangi ya beto nyonso, samu ti beto ke bantu ya dikanda mosi.—1 Pi. 2:17.

11. Yinki zola zonza “kuzolasana ya kulutila na ntima mosi” na bampangi?

¹¹ Piere pesá beto malongi ya “kuzolasana ya kulutila na ntima mosi.” Awa, “kuzolasana ya kulutila” zola zonza ti, ata ya ke mpasi na nge na kuzola muntu, zola kaka yandi. Na kifwani, yinki nge ke sala, kana mpangi me sala nge mambu ya yimbi to me lwalisa nge? Kima ya ntete yina lenda kwizila nge na yintu, ni kuvutula yandi yimbi yina yandi me sala nge na kisika ya kulakisa luzolo. Samu Piere vandá na Yesu, yandi kwizá longoka ti kuvutula yimbi na yimbi ke sepelisá ve Yehova. (Yoa. 18:10, 11) Yandi sonikaka: “Beno vutula ve yimbi na bayina ke salaka beno yimbi to bifingu na bayina ke fingaka beno. Kasi beno vutula: ‘Bika Nzambi kusakumuna beno!’” (1 Pi. 3:9) Kuvanda na luzolo ya kulutila, ke nata nge na kulakisa ntima ya mbote mpe na kuzola ata ba yina me sala nge mambu ya yimbi.

12. a) Yinki kuzolosana mingi ke sadisa beto na kusala? b) Faso me zonzila video Bumosi yina ke na kati ya beto ke ntalu, bumba yawu, wapi bangolo nge me lunga kusala?

¹² Na mukanda ya ntete yina Piere soniká, yandi zonzá ti kana beto “zolasana mingi,” beto ke lemvokila ve kaka mwa masumu, kasi mpe “lutangu ya nene ya masumu.” (1 Pi. 4:8) Ya lenda vanda ti Piere zimbaná ve kileso na yina me tadila kulemvokila yina Yesu lakisak’ yandi bamvula mingi na mantwala. Piere vandá kanisa ti kana yandi lemvokila mpangi “bambala sambwadi,” yandi ke lakisa yandi ntima ya mbote mingi. Kasi, Yesu longak’ yandi na kulemvokila “bambala makumi sambwadi [77].” Ya zole zonza ti ya ke ve na lutangu yina me lunga samu na kulemvokila. Malongi yayi ke na tadilá mpe beto. (Mat. 18:21, 22) Ata ya ke mpasi na nge na kusadila malongi yayi, kulemba ve, sala kaka bangolo. Bisadi ya Yehova nyonso ke bantu ya masumu mpe bantangu ya nkaka ya lenda vanda mpasi na beto na kulemvokila. Kasi, kusala nyonso yina nge lenda sala bubu yayi samu na kulemvokila mpangi ya nge, mpe kuvutukila kizunu na yandi ke kima yina me lutila mfunu.c

BAKULUNTU, BENO KEBA MAMEME MBOTE-MBOTE

13. Yinki lenda sala ti ya vanda mpasi na bakuluntu na kuzwa ntangu ya kukindisa bampangi ya bawu?

¹³ Piere zimbaná ata fioti ve yina Yesu zonzá na yandi na manima ya kumvubuka na lufwa: “Keba mameme ya munu.” (Yoa. 21:16) Kana nge ke kuluntu, nge zaba ti nge me lunga kusadila mpe mambu yina Yesu zonzá na Piere. Ya lenda vanda mwa mpasi na kuluntu na kuzwa ntangu samu na kusala kisalu ya yandi na faso ya mbote, samu ti kuluntu me lunga kukipe ntete bansatu nyonso ya dikanda ya yandi. Bantu nyonso ya dikanda ya yandi ke na nsatu ya kutala ti yandi ke zolá bawu mpe yandi ke sadisá bawu na kuvanda kaka pene-pene na Yehova. Bakuluntu me lunga kulakisa mpe kifwani ya mbote na kisalu ya kusamuna, na kubongisa bamambu yina ba ke longá mpe kulonga na faso ya mbote na balukutakunu ya kimvuka, ya circonscription mpe balukutakanu ya nene. Ba ya nkaka ke salá mpe na ba comités de liaison hospitaliers (CLH) to na service local de développement-construction (LDC). Ya ke na lakisá ti bakuluntu ke na kisalu mingi ya kusala.

14. Yinki lenda sala ti bakuluntu vanda na nsatu ya kukeba mbote mameme yina Nzambi me pesa bawu? (1 Piere 5:1-4)

¹⁴ Piere pesá malongi yayi na bakuluntu na ‘kukeba mbote nkonga ya mameme yina Nzambi me pesa bawu.’ (Tanga 1 Piere 5:1-4.) Kana nge ke kuluntu, beto zaba ti nge ke zolá bampangi ya nge mpe nge ke na nsatu ya kukeba bawu mbote. Bantangu ya nkaka nge lenda tala ti nge ke na mingi ya kusala mpe samu ti nge ke ya kulemba, nge lenda kanisa ti nge lenda lungisa ve kisalu ya nge. Na yawu yinki nge lenda sala? Fungula ntima ya nge na Yehova mpe zonzila yandi nsatu ya nge ya kusadisa bampangi. Piere sonikaka: “Muntu yina ke na dikabu ya kusadila bampangi, sadila yawu na ngolo yina Nzambi ke pesaka yandi.” (1 Pi. 4:11) Bampangi ya nge lenda kutana na bamambu mingi ya mpasi yina ba lenda yidika ve na yinza yayi. Kasi kuzimbana ve ti “Muvungi ya nene,” Yesu Kristo, lenda pesa bawu lubakusu yina nge lenda pesa ve bawu. Yandi lenda sala yawu bubu yayi mpe na yinza ya malu-malu. Nzambi zola ti bakuluntu zola bampangi ya bawu, keba bawu mbote mpe ba vanda na “nkadulu [ndyatulu] ya mbote yina nkonga ya mameme fwana kulanda.”

15. Yinki kuluntu mosi ke salá samu na kukipe mameme? (Tala mpe kizizi.)

¹⁵ William, mpangi mosi yina ke kuluntu banda bamvula mingi me kwiza zaba ti kisalu ya kukeba mbote mameme ke mfunu mingi. Ntangu kimbevo ya COVID-19 bandá, yandi na bakuluntu ya nkaka ya kimvuka vandá bokila balumingu nyonso mosi na mosi ya bampangi yina vandá na bimvuka ya bawu ya kusamuna. Yandi me zonza samu na yinki: “Bampangi mingi vandá kaka bawu mosi na yinzo, mpe makanisi ya yimbi lendá kwizila bawu na mbangu.” Ntangu mpangi mosi ya bakala to ya kento ke na mambu, William ke kuwa yandi mbote-mbote samu na kuzaba yinki ke kwamisá yandi mpe yinki yandi ke na yawu nsatu. Mpe yandi vandá sosa na kati ya mikanda to bavideo yina ke na jw.org, yinki yandi lenda sadila samu na kukindisa mpangi yango. Yandi me zonza: “Kisalu ya beto ya kukipe mameme ke kisalu mosi ya mfunu. Beto ke salá bangolo mingi samu na kusadisa bantu na kuzaba Yehova. Beto ke mpe na nsatu ya kusala bangolo yina, samu na kusadisa mameme ya Yehova na kubikana kaka na matsyeleka.”

BIKA YEHOVA LUNGISA NGE

16. Wa’ faso nge lenda sadila bileso yina beto me longoka na mikanda zole ya Piere?

¹⁶ Beto me zonzila kaka mwa bileso yina ke na mikanda zole ya Piere. Ya lenda vanda ti nge me tala mwa bamambu yina nge ke na nsatu ya kubongisa. Na kifwani, nge ke baká kwandi ntangu ya kukanisa na bambote yina nge ke kuzwa na yinza ya malu-malu? Nge me baka kwandi mukanu ya kusamuna na lukolo, na kisalu ya nge to na bisika ya nkaka? Nge me tala kwandi wa’ faso nge lenda lakisa luzolo ya kulutila na bampangi ya nge? Bakuluntu, beno ke salá kwandi bangolo na kukeba mameme ya Yehova na ntima mosi mpe na mbangu nyonso? Kuvunama ve nge mosi, kanisa na yinki nge lenda sala samu na kubongisa mwa bifu ya yimbi yina ke na nge mpe kulemba ve. “Mfumu kele mbote,” mpe yandi ke sadisa nge na kubongisa yawu. (1 Pi. 2:3) Piere me pesa beto malongi yayi: “Yandi mosi [Nzambi] ke lungisa beno, ke kindisa beno, ke pesa beno ngolo, mpe ke sala ti beno vwanda ya kusikama.”—1 Pi. 5:10.

17. Wapi bambote beto ke kuzwa kana beto bika ve kusadila Yehova mpe beto bika Yehova manisa kulonga beto?

¹⁷ Piere talá ti yandi lungá ve kuvanda na Mwana ya Nzambi. (Luke 5:8) Kasi, luzolo ya Yehova na ya Yesu salá ti yandi bika ve kulanda Yesu mpe bikana ya kukangama na yandi. Ya salá ti Yehova pesa yandi bweso ya kukota “na Kimfumu ya seko, ya Mfumu mpe Kivuukisi ya beto, Yesu-Klisto.” (2 Pi. 1:11) Ya vandá bweso ya nene. Kana nge bika ve mutindu Piere salak’ yawu mpe nge bika Yehova manisa kulonga nge, nge mpe ke kuzwa luzingu ya ntangu nyonso. Beno ke kuzwa “musendo [difuta] ya beno na kuvwanda na kiminu na Yesu-Klisto, ni yawu kele mpulusu [luvulusu] ya beno.”—1 Pi. 1:9.