DISOLO YA KULONGOKA 51
Sepela na kivuvu yina ke vuná ve
“Kivuvu yayi lenda kuvuna beto ve.”—ROM. 5:5.
NZIMBU 142 Tenons ferme notre espérance
YINA BETO KE LONGOKAa
1. Samu na yinki beto lenda zonza ti Abrahami vandá kwikilá kaka na kivuvu ya yandi?
YEHOVA pesá nsilulu na ndiku ya yandi Abrahami ti ni na nzila ya mwana ya yandi makanda nyonso ya ntoto zolá kuzwa lusakumunu. (Kub. 15:5; 22:18) Samu ti kiminu ya Abrahami vandá ngolo, yandi vandá na kundima ti ya zolá salama. Ata ti Abrahami kumá na bamvula 100, mpe Sara vandá na bamvula 90, bawu zole butá ntete ve. (Kub. 21:1-7) Ata faso yina Biblia ke zonzaka: “Na kusala kivuvu sika yina ba lendaka sala ve kivuvu, Abalami kwikilaka mpe kumaka ‘tata ya makanda mingi ya bantu’ mutindu Nzambi zabisaka yandi yawu.” (Rom. 4:18) Ni yawu salamaka. Abrahami kumá tata ya mwana yina yandi vingilá bamvula mingi. Samu na yinki Abrahami vandá na kundima ti Yehova ke lungisa nsilulu ya yandi?
2. Samu na yinki Abrahami vandá na kundima ti Yehova ke lungisa nsilulu ya yandi?
2 Samu ti Abrahami vandá na kindiku ya ngolo na Yehova, “yandi zabaka ti ya tsyelika, Nzambi ke na lulendo ya kusala mambu yina yandi pesaka nsilulu.” (Rom. 4:21) Samu na kiminu ya yandi, Yehova ndimak’ yandi mpe bokilak’ yandi muntu ya lunungu. (Zaki 2:23) Mutindu ke zonzilak’ yawu Baroma 4:18, kiminu na kivuvu ya Abrahami vandá kwelana. Awa beto tala wa’ faso ntumwa Polo ke na zonzilá kivuvu na Baroma kikapu 5.
3. Yinki Polo zonzá na yina me tadila kivuvu?
3 Ntumwa Polo zonzá samu na yinki beto lenda vanda na kundima ti “kivuvu ya beto lenda vuna beto ve.” (Rom. 5:5) Yandi sadisá mpe beto na kubakula wa’ faso beto lenda kulisa kivuvu ya beto. Ntangu beto ke na longoká bamambu yina ke na kati ya Baroma 5:1-5, kanisa na faso kiminu ya nge me kula na kati ya bamvula. Kusala yawu ke sala ti nge vanda na kundima ti kivuvu ya nge ke na kwendá kaka na mantwala. Na disolo yayi, beto ke tala wa’ faso beto lenda kumisa kivuvu ya beto ngolo kulutila na ntama. Beto zonzila ntete kivuvu ya kitoko yina Polo zonzá ti ya ke vuná ve.
KIVUVU YA KITOKO
4. Yinki Baroma 5:1, 2 ke zonzilaka?
4 Baroma 5:1, 2 ke zonzaka: “Mutindu Nzambi me ndima beto bantu ya kudedama samu na kiminu ya beto, beto ke na kuzinga ntangu yayi na kizunu na yandi samu na Yesu-Klisto, Mfumu ya beto. Na lusalusu ya Yesu-Klisto, beto me lenda na kuzwa na kiminu dikabu yina Nzambi ke pesaka ya mpamba. Ni na yawu beto ke na kuzinga ya kukwikama ntangu yayi, mpe mambu yina ke kuyangidika beto, ni kivuvu ya kukota na nkembo ya Nzambi.” Polo soniká bamambu yayi na kimvuka ya Roma. Bampangi ya kento na ya bakala yina vandaka kuna kwikilá na bamambu yina ba kuwá na yina me tadila Yehova na Yesu mpe kumá Bakristo. Nzambi ndimaka bawu mutindu “bantu ya kudedama samu na kiminu ya [bawu],” mpe yandi tulá bawu mafuta na nzila ya mpeve ya santu. Ni yina salá ti ba kuzwa kivuvu ya kitoko yayi.
5. Wapi kivuvu ba yina ba tulá mafuta ke na yawu?
5 Na mantwala Polo soniká na Bakristo ya Efeze yina ba tulá mafuta samu na kivuvu yina Nzambi pesá bawu. Ba ke kuzwa ‘difuta yina yandi ke pesa bantu ya santu.’ (Ef. 1:18) Polo zonzá na Bakristo ya Kolose ti “kivuvu ya bawu ke lungana na mazulu.” (Kol. 1:4, 5) Samu na Bakristo yina ba tulá mafuta, ba ke vumbula bawu na lufwa samu ba kuzwa luzingu ya ntangu nyonso na zulu, kisika yina ba ke yala na Yesu.—1 Tes. 4:13-17; Luz. 20:6.
Mpangi F. W. Franz vandá zonzila mutindu Bakristo yina ba tulá mafuta ke na kundima ti kivuvu ya bawu ke lungana (Tala paragrafe 6)
6. Yinki mpangi mosi zonzá na yina me tadila kivuvu ya yandi?
6 Bakristo yina ba tulá mafuta ke sepelá mingi na kivuvu yina ke na bawu. Mpangi Frederick Franz, yina vandá mosi ya bawu zonzaka: “Kivuvu ya beto ke ya tsyeleka mpe beto nyonso ba 144 000 ke kuzwa kivuvu yina Nzambi pesá beto nsilulu, mpe difuta ya beto ke kima ya kulutila kitoko na nyonso yina beto ke na yawu.” Na manima ya kusadila Yehova na kukwikama nyonso na kati ya bamvula mingi, na mvula 1991 mpangi Franz zonzaka: “Kivuvu ya [beto] ke ntalu mingi na meso ya beto. . . . Ata ti beto ke na kulutisá bantangu mingi na kuvingila yawu, beto ke na kilengi ya kusala yawu. Ya ke kima yina beto me lunga kuvingila. Bubu yayi kulutila na ntama, mu ke sepelá na kivuvu yina ke na munu.”
7-8. Wapi kivuvu bisadi ya nkaka ya Yehova ke na yawu? (Baroma 8:20, 21)
7 Bakristo mingi yina ke na sadilá Yehova bubu yayi ke na kivuvu mosi na Abrahami, ya kuzwa luzingu ya ntangu nyonso na ntoto na yisi ya Kimfumu ya Nzambi. (Ebr. 11:8-10, 13) Polo soniká bambote yina ke na vingilá bawu samu na kivuvu ya bawu. (Tanga Baroma 8:20, 21.b) Ntangu nge longoká bansilulu ya Biblia na yina me tadila mantwala, yinki simbá ntima ya nge? Ya ke kwandi ntangu nge zabá ti nge ke vanda dyaka ve na masumu? To ya simbá ntima ya nge ntangu nge longoká ti bantu yina nge fwidilaka ke vutuka na luzingu na paradiso awa na ntoto? Ya ke na pesá nge nsatu ya ngolo ya kuvingila “samu na kivuvu.”
8 Kana beto ke na kivuvu ya kuzinga na mazulu, to awa na ntoto, beto sepela na bweso yina beto ke na yawu. Bamambu yina Polo soniká na mantwala ke na lakisá wa’ faso beto lenda kumisa ngolo kivuvu ya beto. Beto tala mambu yina yandi soniká na yina me tadila kivuvu ya beto. Bamambu yayi ke sadisa beto na kuvanda na kundima ti ya ke lungana.
MUTINDU YA KUKULISA KIVUVU
Bakristo nyonso lenda kutana na bamambu ya mpasi (Tala baparagrafe 9-10)
9-10. Kaka faso ke na lakisak’ yawu kifwani ya Polo, yinki lenda kumina Bakristo? (Baroma 5:3) (Tala mpe bizizi.)
9 Baroma 5:3, 4 ke zonzaka: “Beto ke yangalalaka mpe na kati ya bampasi ya beto, kasi beto zaba ti bampasi ke pesaka mvibudulu, mpe mvibudulu ke nataka muntu na kuvwanda ya kukwikama ata yandi ke na kutala mpasi. Kuvwanda ya kukwikama na kati ya bampasi ke pesaka kivuvu.” Ya ke na kamwisá kwandi nge na kuzaba ti bampasi lenda kumisa kivuvu ya nge ngolo? Kifwani ya Polo ke na lakisá beto ti bisadi nyonso ya Yesu lenda kutana na bampasi. Yandi zonzá na Bakristo ya Tesalonika: “Ntangu beto vwandaka na sika ya beno, beto zabisaka beno ti bantu ke talisa beto mpasi. Ni mambu yina me salama.” (1 Tes. 3:4) Mpe yandi soniká na Bakristo ya Bakorinto: “Bampangi, beno fwana kuzaba wapi mutindu kele bampasi yina beto talaka . . . Beto vwandaka banza ti beto ke kufwa.”—2 Ko. 1:8; 11:23-27.
10 Bubu yayi mpe Bakristo lenda kutana na bampasi ya mutindu na mutindu. (2 Tim. 3:12) Ya me kuminá nge na kukutana na bampasi samu ti nge ke na kiminu na Yesu mpe nge ke na landak’ yandi? Bandiku to bantu ya dikanda ya nge lenda seka nge, mpe ba lenda nyokola nge. Samu ti nge ke na nsatu ya kusala bamambu nyonso na faso ya mbote, ya me natiná nge mindondo na kisalu? (Ebr. 13:18) Bantu ya luyalu me nimina nge na kuzonzila kivuvu ya nge na bantu ya nkaka? Ata faso yina, Polo me zonza na beto na kuyangalala. Samu na yinki?
11. Samu na yinki beto ke na nsatu ya kukanga ntima na mantwala ya bampasi?
11 Mutindu Baroma 5:3 ke zonzaka, “bampasi ke pesaka mvibudulu.” Ni na yawu ntangu beto ke na mambu ya mpasi, beto lenda vanda na kilengi samu ti ya ke pesa beto mvibudulu. Mpe samu ti Bakristo nyonso ke kutaná na bampasi, bawu nyonso me lunga kuvanda na mvibudulu. Beto ke kuzwa difuta samu na kivuvu ya beto kaka kana beto kanga ntima, mpe beto bika ve kusadila Yehova. Beto ke ve na nsatu ba fwanikisa beto mutindu bantu yina Yesu vandá kanisa ntangu yandi zonzilá kifwani ya bambuma yina kubwá na ntoto ya matadi. Bantu yayi ke ndimá matsyeleka na kilengi nyonso. Kasi ntangu ba ke kumá na bampasi to ba ke talisá bawu mpasi samu na mambu ya Nzambi, ba ke vandá dyaka ve na kilengi. (Mat. 13:5, 6, 20, 21) Ya tsyeleka bampasi ke sepelisá beto ve, kasi beto ke kuzwá bambote ntangu beto ke kangá ntima na mantwala ya yawu mpe ke biká ve kusadila Yehova. Wa’ faso?
12. Wapi bambote kukanga ntima lenda natina beto?
12 Zaki zonzilá bambote yina beto ke kuzwá ntangu beto ke kangá ntima na mantwala ya bampasi. Yandi sonikaka: “Kasi mvibudulu ya beno fwana kuvwanda ya kulunga. Na yina, beno ke vwanda bantu ya kulunga mpe ya kudedama, mpe beno ke kondwa kima ve.” (Zaki 1:2-4) Zaki ke na zonzá ti mvibudulu ke na kisalu ya kusala. Ya lenda sadisa nge na kukulisa bifu mingi mutindu: ntima ya yinda, kiminu mpe kutula ntima na Yehova. Kasi beto lenda kuzwa bambote ya nkaka.
13-14. Yinki mvibudulu ke natá muntu, mpe yinki ya ke salá na kivuvu ya yandi? (Baroma 5:4)
13 Baroma 5:4 ke zonzaka: “Mpe mvibudulu [kukanga ntima] ke nataka muntu na kuvwanda ya kukwikama ata yandi ke na kutala mpasi. Kuvwanda ya kukwikama na kati ya bampasi ke pesaka kivuvu.” Ntumwa Polo zonzá ti mvibudulu ke natá na “kuvwanda ya kukwikama.” Samu ti Yehova ke zolá bantu yina ke ya kukwikama, mvibudulu ya beto ke salá ti Yehova ndima beto. Ya zola zonza ve ti Yehova ke sepelá ntangu beto ke kutaná na bampasi. Kasi ya ke ti ni nge ke sepelisá Yehova. Beto ke kuzwá bambote mingi ntangu beto ke kangá ntima, mpe ni yina ke salá ti beto vanda ya kundimama na Nzambi.—Nku. 5:12.
14 Beto ke na zabá dyaka ti Abrahami kangá ntima na kati ya bankwamusu mpe vandá na kilengi ti Nzambi ke ndima yandi. Yehova talak’ yandi mutindu ndiku ya yandi mpe bokilak’ yandi muntu ya lunungu. (Kub. 15:6; Rom. 4:13, 22) Yehova lenda bokila beto mpe faso yina. Ya kele ve ni bisalu mingi yina beto ke salá to kisika yina beto ke sadilak’ yandi ke sepelisá Yehova. Yandi ke sepelá na beto ntangu beto ke vandá ya kukangama na yandi ata ti beto ke na lutisá bantangu ya mpasi. Ata bamvula yina ke na beto, bamambu beto ke na yawu, to mayela yina ke na beto, beto nyonso lenda kanga ntima. Bilumbu yayi, ya ke kwandi na mambu yina ke na kwamisá nge? Kana ni yawu, zaba ti nge ke sepelisá ntima ya Yehova. Kuzaba ti Nzambi me ndima beto lenda natina beto bambote mpe ya lenda kumisa ngolo kivuvu ya beto.
KIVUVU YA NGOLO
15. Yinki Polo zonzá na Baroma 5:2 mpe wapi kyuvu ya lenda nata?
15 Yehova ke sepelá ntangu beto ke vandá ya kukwikama na yandi mpe ke kangá ntima na mantwala ya bankwamusu. Tala wa’ faso Polo ke zonzilá dyaka yawu: “Kuvwanda ya kukwikama na kati ya bampasi ke pesaka kivuvu. Kivuvu yayi lenda kuvuna beto ve.” (Rom. 5:4, 5) Na Baroma 5:2, ntumwa Polo zonzá ti Bakristo ya Roma vandá na kivuvu, ni “kivuvu ya kukota na nkembo ya Nzambi.” Na yawu muntu lenda yufula, ‘kana Bakristo vandá na kivuvu, samu na yinki ntumwa Polo zonzilá dyaka kivuvu na mantwala?’
Kivuvu yina vandá kaka fioti na kubanda me kula mpe me kuma ngolo (Tala baparagrafe 16-17)
16. Wa’ faso kivuvu ya nge bandá kukula? (Tala mpe bizizi.)
16 Beto lenda bakula mambu yina Polo zonzá kana beto zimbana ve ti kivuvu ke kima yina ke kulaka. Samu na kuzaba yawu, nge na zabá dyaka mbala ya ntete yina nge kuwá bansilulu ya Biblia? Ya lenda vanda ti na ntangu yina, nge kanisá ti kuzinga ntangu nyonso na zulu ya ntoto ke kaka luvunu. Kasi na mantwala, nge bandá kulongoka dyaka mingi na yina me tadila Yehova mpe bansilulu ya Biblia mpe ni yawu salá ti nge vanda na kundima ti ya ke lungana.
17. Na manima ya kukipesa na Yehova mpe kuzwa mbotokolo, wapi mutindu kivuvu ya nge me kula?
17 Ata na manima ya kukipesa na Yehova mpe kuzwa mbotokolo, kivuvu ya nge me bika ve kukula samu nge me longoka kuzaba dyaka mingi Yehova, mpe nge me kula na kimpeve. (Ebr. 5:13–6:1) Ya lenda vanda ti bamambu yina ba ke na zonzá na Baroma 5:2-4 me lungana na luzingu ya nge. Ata ti nge ke na lutisá bampasi ya mutindu na mutindu, nge ke ya kukangama na Yehova, mpe Yehova me lakisa nge ti yandi ke na sepelá na nge. Samu Yehova ke zolá mpe me ndima nge, ya ke bamambu yina ke na natá nge na kukwikila dyaka na bansilulu ya yandi. Kivuvu ya nge ke dyaka ve faso ya vandá na ntama. Ya me kula. Ya me simba ntima ya nge mpe ya me kuma butsyeleka na meso ya nge. Dyaka, ya me soba bamambu mingi na luzingu ya nge mutindu faso ya nge ya kukipe dikanda ya nge, faso ya nge ya kubaka mikanu mpe faso ya kusadila ntangu ya nge.
18. Wapi nsilulu Yehova me pesa beto na yina me tadila kivuvu?
18 Ntumwa Polo bwelá ti ya ke na kima ya nkaka ya mfunu mingi na yina me tadila kivuvu na manima ya kundimama na Yehova. Yandi zonzá ti kivuvu ya nge ke lungana. Wa’ faso nge lenda vanda na kundima ti ya ke salama? Ntumwa Polo zonzá na bakristo: “Kivuvu yayi lenda kuvuna beto ve samu ti Nzambi tulaka luzolo ya yandi na kati ya bantima ya beto na ngolo ya [mpeve ya santu] yina yandi pesaka beto.” (Rom. 5:5) Ntembe ve, beto lenda vanda na kundima ti kivuvu ya beto ke ya tsyeleka.
19. Na yinki beto lenda vanda na kundima na yina me tadila kivuvu ya beto?
19 Abrahami yindulá na bansilulu ya Yehova mpe talá wa’ faso Yehova ndimak’ yandi mpe kumá ndiku ya yandi. Kivuvu yina vandá na Abrahami vandá ve ya mpamba. Biblia ke zonzaka ti “Abalami vingalaka na mvibudulu nyonso, mpe kuzwaka nyonso yina Nzambi pesaka nsilulu.” (Ebr. 6:15; 11:9, 18; Rom. 4:20-22) Yandi vandá na kundima ti, ya zolá lungana. Na yawu, beto lenda vanda na kundima ti kana beto vanda ya kukangama, beto ke kuzwa difuta ya kivuvu ya beto. Beto ke na bamambu mingi yina lenda nata beto na kusepela samu beto me zaba ti kivuvu ya beto ke ya tsyeleka mpe ya ke vuna ve beto. (Rom. 12:12) Polo sonikaka: “Bika Nzambi yina ke pesaka kivuvu, kufulusa beno na kilengi mpe kizunu samu na kiminu yina beno ke salaka na yandi. Na yina, beno ke vwanda ya kufuluka na Kivuvu na ngolo ya [mpeve ya santu].”—Rom. 15:13.
NZIMBU 139 Imagine-toi dans le monde nouveau
a Na disolo yayi, beto ke zonzila kivuvu yina ke na Bakristo mpe samu na yinki beto lenda vanda na kundima ti ya ke lungana. Buku ya Baroma kikapu 5 ke sadisa beto na kutala na wapi mutindu kivuvu yina beto ke na yawu bubu yayi ke ve faso mosi na yina beto vandá na yawu ntangu beto bandá kulongoka matsyeleka.
b Baroma 8:20, 21 ke zonzaka: “Ya tsyelika, yinza me kuma na lutumu ya mambu yina ke na mfunu ve. Yawu kele mutindu yina, samu ti yawu kele luzolo ya Nzambi, kasi ya yinza ve. Ata yawu kele mutindu yina, yinza ke na kivuvu na dyambu yayi: Kilumbu kele, Nzambi ke kuula yinza na bundongo ya mambu yina ke mwangisaka yawu, mpe ke pesa yawu kimpwanza mpe nkembo yina yandi ke pesa na bana ya yandi.”