Byuvu ya ba yina ke tangaka mikanda ya beto

Na wapi ntangu kusamuna nsangu ya mbote ke manisa?

Yesu zonzaka: “Ba ke samuna nsangu ya mbote yayi ya Kimfumu na ntoto nyonso, samu na kimbangi ya makanda nyonso. Mpe na manima, nsuka ke kwiza.” (Mat. 24:14) Na ndinga ya Kigreke nzonzolo “nsuka” na verse yayi mpe na baverse 6 na 13 kele teʹlos. Ba ke sadilaka yawu samu na kuzonzila nsuka ya yinza ya Satana na Armagedoni. (Luz. 16:14, 16) Kasi, beto ke tatamana na kusamuna nsangu ya mbote tekila Armagedoni banda. Ya ke na sobaka faso beto vanda bakulaka yawu na ntama.

Na ntama, beto vanda bakulaka ti ntangu mpasi ya nene ke banda na kumwangana ya Babiloni ya nene, beto ke samuna dyaka ve nsangu ya mbote. (Luz. 17:3, 5, 15, 16) Beto vanda kwikilaka ti ntangu mpasi ya nene ke banda, Yehova ke pesa dyaka ve bantu bweso ya kuzaba nsangu ya mbote. (Iza. 61:2) Beto vanda kanisaka mpe ti bantu yina zola vuuka na mpasi ya nene zola lakisa kukwikama ya bawu na Yehova tekila ya salama. Beto vanda fwanisaka bantu yayi na Bazwife yina vuukaka, tekila ba mwangisa Yeruzalemi na 607 T.N.B. Bazwife yayi, ba tulaka bawu kidimbu ya kuvuuka tekila ba mwangisa Yeruzalemi samu ti ba vanda sambilaka Yehova mpe vandaka yiinaka mambu ya yimbi. (Ezek. 5:11; 9:4) Kasi, kifwanusu yayi ke na kwelanaka ve na mambu yina Yesu zonzaka na Matayi 24 verse 14 yina ke na lakisaka ti bantu lenda kuzwa bweso ya kuwa nsangu ya mbote tekila nsuka ya yinza na Armagedoni.

Samu ti beto me bakula mbote-mbote mambu yina ke na Matayi 24 verse 14, beto me fwana mpe kubongisa faso ya beto ya kubakula mambu yina ke na Luzabusu 16 verse 21 yina ke zonzilaka mvula ya matadi ya nene. Na manima ya kufyongonina mbote-mbote baverse zole yayi, beto me kwiza tala ti ya ke kwelanaka. Wapi mutindu? Mvutu kele na mutindu bantu ke yamba nsangu ya Kimfumu. Ntumwa Polo sonikaka, na kati ya “bantu yina ke na vuukaka,” nsangu ya mbote ya Kimfumu ke mutindu “mananasi ya luzingu.” Kasi samu na bambeni ya Nzambi, ya kele nsangu ya yimbi samu ti ya ke na “nsunga ya lufwa.” (2 Kor. 2:15, 16) Ba ke yiinaka nsangu ya Kimfumu samu ti ya ke lakisaka ti yinza yina ba ke zolaka ke yimbi samu ni Satana ke na yalaka mpe ntangu me bikana fioti samu ba mwangisa yawu.—Yoa. 7:7; 1 Yoa. 2:17; 5:19.

Beto zimbana mpe ve ti mvula ya matadi ya nene mpe ya dema ke vanda na “mpasi ya kulutila ngolo.” Yawu zola zonza ti na kati ya mpasi ya nene, kisalu ya kusamuna lenda vanda mpasi ya kulutila, samu ti ya ke vanda ntangu yina nkumbu ya Yehova ke zabana kulutila bubu yayi. (Ezek. 39:7) Na ntangu yina, na manima ya kumwangana ya Babiloni ya nene, ya ke vanda kwandi na bantu yina nsangu ya mbote ke benda mutindu mananasi ya nsunga ya kitoko? Ya lenda salama. Ba lenda bambuka mpe kulongoka ti bamvula mingi Bambangi ya Yehova vanda zonzaka ti ba ke mwangisa Babiloni ya nene mpe ya ke na lunganaka na meso ya bawu.

Ya ke mutindu mambu yina salamaka na Ezipte na ntangu ya bampasi 10. Na manima ya kufundisa “binzambi-nzambi nyonso ya Ngipiti,” “bantu mingi ya bandinga ya nkaka” bwelamaka na kati ya dikanda ya Yehova. (Bas. 12:12, 37, 38) Ya lenda vanda ti ba soolaka kukwenda na dikanda ya Yehova, ntangu ba talaka kulungana ya bampasi 10 yina Moyize zonzaka.

Konso muntu yina ke kota na dikanda ya Yehova na manima ya kumwangana ya Babiloni ya nene, ke vanda na bweso ya kusadisa bakristo yina ba tulaka mafuta yina ke vanda ntete awa na ntoto. (Mat. 25:34-36, 40) Bweso ya kuvanda dimeme ke suka ntangu fioti tekila Armagedoni, ntangu bakristo yina ba tulaka mafuta yina ke vanda ntete awa na ntoto ke kuzwa bweso ya kukwenda zinga na mazulu.

Kubakula bamambu mutindu yayi ke na lakisaka beto luzolo ya mingi mpe ntima ya kyadi ya Yehova. Ya tsyeleka, yandi “zola ve ti ata muntu mosi kufwa, kasi yandi zola ti bantu nyonso balula ntima.”—2 Pi. 3:9.