Ekuma Tufwilanga?
“Van’ebata dia mongo va vuvama vena, ke vewakananga ndinga ko; e nuni zamana leka muna nti: vingila; ke kolo ko ongeye mpe olavalala nze i yau.”—JOHANN WOLFGANG VON GOETHE, NTOZI A NKUNGA A ALEMANHA.
1, 2. (a) O wantu nkia luzolo bavangilwa? (b) Nkia mpila zingu kiadi kala ye yakala yo nkento antete?
O NZAMBI wavang’o wantu y’etima dia zinga yakwele mvu. I kuma, o Nkand’a Nzambi uvovanga vo “osidi mpe [e ngindu zakwele mvu, NW] muna ntima miau.” (Kimpovi 3:11) Kansi o Nzambi wavanga edi disundidi ke luzolo lwa zinga mvu ya mvu kaka ko kavana kwa wantu. Wabavana mpe elau dia lenda wo.
2 O Adami yo Eva, amase meto mantete, wantu alunga bavangwa ke bakala y’edi diayiva ko muna ngindu ye muna nitu. (Nsiku 32:4) Se badiki—kondwa yimbevo ilembi sasuka ye mpasi, kondwa wonga ngatu ntelamw’o ntima! Vana ntandu, o Nzambi wabasia muna paradiso yambote kikilu. I kani dia Nzambi vo o muntu kazinga yakwele mvu, oku kwakwiziwa, e nza yadi zadiswa ye mbongo au alunga. (Etuku 1:31; 2:15) Ozevo, ekuma tufwilanga e?
Kolama Kwatwasa Lufwa
3. Nki kiavavwanga kwa Adami muna vwil’o moyo akwele mvu?
3 O Nzambi wakanikina Adami vo: “Konso nti wina muna mpatu, di’odia; vo i nti a zayila wete yo bi, kudie wo ko: kadi muna lumbu odia wo, fw’ofwa.” (Etuku 2:16, 17) Ozevo, muna vwa e zingu kiakwele mvu; diambu diavavwanga kwa Adami yo Eva, dia lemvokela Nzambi.
4. Vav’o Adami yo Eva basumuka, ekuma bavidisila e zingu kiau kiakwele mvu muna Paradiso?
4 Dia nkenda kikilu vo, o Adami yo Eva bakolamena o nsiku a Nzambi. (Etuku 3:1-6) Muna vangu diadi bakituka se asumuki, kadi “esumu i umpumbulu.” (1 Yoane 3:4) E mfoko, o Adami yo Eva ke bakala diaka ye vuvu kia zingu kiakwele mvu ko. Mu nkia kuma? Ekuma kadi “e mfutu esumu fwa.” (Roma 6:23) Ikuma vo, vava kasia e nzengo kwa Adami yo Eva o Nzambi owu kavova: “U ntoto wina, mu ntoto ovutuka.” Amase meto mantete bavaikiswa muna lumbu luau lwa Paradiso. Tuka kiakina basumuka, o Adami yo Eva bayantik’o kwenda fioti fioti muna nzila fwa.—Etuku 3:19, 23, 24.
‘O Lufwa Luayandangiana Muna Wantu Awonso’
5. O lufwa aweyi lwayandangyanina kwa wantu awonso?
5 Esumu diakota muna nitu Adami yo Eva. Ke balendi wuta mbongo alunga ko, nze i una e fulu kiatekama ke kilendi vaikisa má kiasingama ko. (Yobi 14:4) Ozevo, konso ndiona owutuka olenda dio kwikanisa vo amase meto mantete bavidisa o vimpi walunga yo moyo a mvu ya mvu a yau kibeni ye mbongo au mpe. O Paulu wa ntumwa Nkristu wasoneka vo: “Wau vo muna muntu mosi i mwakotel’esumu muna nza, o lufwa mpe mun’esumu; i ngyandangiana luayandangian’o lufwa muna wantu awonso, wau yawonso basumuka.”—Roma 5:12; tezanisa ye Nkunga 51:5.
6. Ekuma tufwilanga e?
6 O unu akwa ngangu za nza kebezayanga ko ekum’o wantu benuninanga yo fwa. Kansi tu, o Nkand’a Nzambi usasilanga vo edi tufwilanga kadi mun’esumu twawutukila, twavwila e nkal’a yayi s’efwa kwa mase meto mantete. Kansi nga adieyi dikutubwilanga vava tufwanga?