E Vuvu Kimosi Kaka!
“Konso ona mpe win’o moyo, okwikilang’omu mono, kefwa nkutu ko yakwele mvu.”—YOANE 11:26.
1. Mazunda ma wantu bafwa befulwa muna zingila ku nkia fulu?
VAV’O mazunda ma wantu befulwa muna lufuluku, ke betwaswa mu nza yankatu ko. (Mavangu 24:15) Besikama muna nza yawete yavelela yo wana e fulu kiavuvama yo ulolo wa madia mekubikwa muna kuma kiau. Nga nani okubika mawonso mama? Kieleka, vekala yo nkangu uzingila muna nz’ampa una ke vayantikidi o lufuluku ko ova ntoto. Kansi, aki nani?
2-4. Nki i vuvu bavwidi awaya bezingang’omu “lumbu yambaninu”?
2 E ndungana ungunza wa Nkand’a Nzambi isonganga vo “mu lumbu yambaninu” a nza ya tandu kiaki tuzingilanga.a (2 Timoteo 3:1) Ke kolo ko o Yave wa Nzambi osingika mambu ma wantu yo fokola o umpumbulu ova ntoto. (Nkunga 37:10, 11; Ngana 2:21, 22) Muna ntangwa yayina, adieyi dibwila awaya besadilanga Nzambi kuna kwikizi kiawonso?
3 O Yave kefwasa wantu ambi kumosi ko ye ansongi. (Nkunga 145:20) Kasidi dio vangila nkutu ko, ye ke vanga dio ko vava keveleles’e nza muna bi wandi wawonso. (Tezanisa ye Etuku 18:22, 23, 26.) Ikuma vo, o nkand’a nsuka muna Nkand’a Nzambi uyikanga “ndong’ayingi, ina ilembi tangakana kwa muntu, yatuka muna zula yawonso, yo makanda, ye nsi, ye ndinga,” betuka muna “mpasi zayingi.” (Lusengomono 7:9-14) Elo, ndong’ayingi ivuluka muna mpasi zayingi ezi zisukisa o mambi ma nza ya tandu kiaki, yo kota muna nz’ampa ya Nzambi. O kwakuna, o nkangu alemvoki i bevwila mvimba e nkubika z’esivi za Nzambi zavevol’o wantu mun’esumu yo lufwa. (Lusengomono 22:1, 2) Ozevo, “ndong’ayingi” ke besa yeleka lufwa ko. Nkia mpila vuvu!
4 Nga tulenda kwikila muna vuvu kiaki ki’esivi? Kondwa lukatikisu! O Yesu Kristu yandi kibeni wavova vo vekala ye ntangwa ina vo o wantu bezinga lembi fwa diaka. Vava kafula Lazaro wa nkundi andi, o Yesu wavova kwa Mareta vo: “Konso ona mpe win’o moyo, okwikilang’omu mono, kefwa nkutu ko yakwele mvu.”—Yoane 11:26.
Ongeye mpe Olenda Zinga Yakwele Mvu
5, 6. Ovo ozolele zinga yakwele mvu muna Paradiso ova ntoto, adieyi ofwete vanga?
5 Ng’ozolele zinga yakwele mvu muna Paradiso ova ntoto? Nga una y’etima dia mona diaka azodi aku? Ozevo, ofwete vwa o zayi wakieleka mu kuma kia Nzambi yo lukanu lwandi. Vava kasamba kwa Nzambi, o Yesu wavova vo: “I wau wuwu o moyo a mvu ya mvu, bazaya ngeye vo i Nzambi aludi, yo Yesu Kristu mpe ona watuma.”—Yoane 17:3.
6 I luzolo lwa Nzambi vo o “wantu [ampila zawonso, NW] bavuluzwa, yo luaka muna visa kia zay’e ludi.” (1 Timoteo 2:3, 4) Eyayi i ntangwa ya zaya vo aweyi ongeye, kumosi ye mazunda m’akaka bevangang’o luzolo lwa Nzambi, nulenda zingila yakwele mvu muna Paradiso ova ntoto. A Mbangi za Yave bena yo luzolo lwa kusadisa muna zaya diaka mayingi mu kuma kia Nzambi y’oma kevavanga. Ekuma olembi kubavavila kuna Eseka dia Kintinu kuna ozingilanga yovo soneka muna sadila e nzila zisongelo muna lukaya lulende?
[Mvovo ku yanda dia lukaya]
a Tala o nkanda wa Zayi Ufilanga Ku Moyo a Mvu Ya Mvu lukaya lwa 98-107, wamwangwa kwa Watchtower Bible and Tract Society of New York, Inc.
[Foto ina muna lukaya 31]
“Ndong’ayingi” ke besa yeleka nkutu lufwa ko