Chigumula Ya-anaireye, Kodi Mbaani Anayo Kavwele Mulungu? Nanga Mbaani Anayo Katavwele Mulungu?

Athu anjinji muthawi ya Nowa koopanga vyotakala. Genesesi 6:5

Adamu na Hava koobala a-ima, moi athu kooinjiva vailambo yavati. Vangavirile thawi, angelo amo-i koogwilizana na Satana nopanduwela Mulungu.

Angelwayo kooza vailambo yavati nowara mathuthu a athu na yolinga yoi katele a-iyana. A-iyanayo koobala a-ima odabwi-a anayo kali oopi-a koma teto akopolo.

Ilambo yoozaala na athu opanga vyotakala. Baibulo linaonga ira, ‘takala ooinjiva vailambo yavati, moi malingalilo etene a m’murimani mwa athu kali otakala thawi detene.’

Nowa oovwela Mulungu moi oopanga ngalawa. Genesesi 6:13, 14, 18, 19, 22

Nowa ali muthu wapama moi Yehova oomuwandela ira unoononga athu otakala na chigumula.

Mulungu oomuwandela Nowa ira apange ngalawa ilukulu ira liye limo-i na banja lae vamo-i na vinyama vya tundu uliwetene kavolowemo.

Nowa oochenjeza athu ira unoza chigumula, koma athwayo katamuvwele. Amo-i koomuteya teto amo-i kooidana na liye.

Nowa angamari-ile panga ngalawa, oovolochi-amo vinyama.