N’nga Makhundo a M’Bayibulo Kananikhami-a Avi?

1. Mwasiwa ngwan’ni ninafuneela malango?

Namaphanduchi-u ngwa zelu khwaranya iyo. N’nga baba wa zivelo, liye unothamaala vya iyo. Mulungu kaniphanduchile ira niviimelelenga ekhi-u. (Yeremiya 10:23) Eno n’nga a-ima kanafuneela langiwa na babiwa, na-iyene ninafuneela langiwa na Mulungu. (Yesaya 48:17, 18) Mangano kanafwanyeya m’makhundo a m’Bayibulo chi yova-iwa yokhumela wa Mulungu. — Welengani 2 Timoteyu 3:16.

Malamulo na makhundo a Yehova kanonifunji-a mwemo ninakhaanele-iyo ingumi yaphama thawi ila, thetho kanonithonyi-eda mwemo ninafwanyele iyo marayeli-o oomala usogolowu. Voi Mulungu ooniphanducha, chi ya zelu nimuvwelenga thawi dethene. — Welengani Salimu 19:7, 11; Chivumbuluso 4:11.

2. N’nga makhundo a m’Bayibulo chin’ni?

Makhundo a m’Baibulo mbororomeleya thetho mbokhami-eda. Eno malamulo thawi dimo-i kanopangiwa ira ka-inde chito va vyoireya vimo-i. (Dotoronomo 22:8) Ninafuneela labi-eda dodoliso li-u loumbuwela ira nivwecheche mwemo nina-indi-edeleiyo mabasa makhundwala va vyoireya vya va ingumi-u. (Miyambo 2:10-12) Mwalifwanafwani-o, Bayibulo linonifunji-a ira ingumi chi yova-iwa yokhumela wa Mulungu. Likhundoli linoniva-a ndila yovithithi-edela nakhala umabasani, vande, na voyenda. — Welengani Vyoira Machitidwe 17:28.

3. N’nga mba makhundo menli avi anayo khali ofuneya vinjinji?

Yesu oonga makhundo menli anayo kali ofuneya vinjinnji. Lowambeela linothonyi-eda yolinga ilukhulu ya ingumi ya athu yeneyo ili iziwa Mulungu, muomeliwa no mulabela mororomeleya. Likhundo lowambeela leli linafuneela nili-indi-edenga chito nasakhulanga vyoira vyi-u. (Miyambo 3:6) Athu anayo kana-arela likhundo leli kanokhala va umweendi na Mulungu, kanokhaana murendele wa imbarimbari thetho kanoza kafwanye ingumi yo-omala. — Welengani Mateyu 22:36-38.

Likhundo lanambinli linera niwomeliwengana afwi-u n’nga n’naviwomeliwanaiyo ekhi-u. (1 Akorinto 13:4-7) Ari-eda makhundo anala unonikhami-a sazi-eda Mulungu mwemo munairela liye vyongo na athu. — Welengani Mateyu 7:12; 22:39, 40.

4. N’nga makhundo a m’Bayibulo kananikhami-a avi?

Makhundo a m’Bayibulo kanokhami-a mabanja ira kathonyi-edanenga zivelo. (Akolose 3:12-14) Mazu a Mulungu kanothithi-eda mabanja vowafunji-a likhundo loi: athu othelana kakhalenga limo-ive wa ingumiwa yethene. — Welengani Genesesi 2:24.

Na-arelanga makhundo a m’Bayibulo ninothithi-edeleya mwa uthuthuni na maumbuwelelo. Mwalifwanafwani-o alimba rayela kanoomeliwana muthu unoyo uli oona murima, ororomeleya noza olimbi-eda chito. (Miyambo 10:4, 26; Aheberi 13:18) M’mazu a Mulungu ninofunji-iwa khala aimwerumweru thetho kholeya na vyongo nin’na iyo. Nafunjedanga ninowona ira umweendi-u na Mulungu unokhala ofuneya khwaranya vyongo vyethene vya uthuthuni. — Welengani Mateyu 6:24, 25, 33; 1 Timoteyu 6:8-10.

Arela makhundo a m’Bayibulo unothithi-edela ingumi-u. (Miyambo 14:30; 22:24, 25) Mwalifwanafwani-o, arela malamulo a Mulungu va mwasa wong’wa vyolezeli-a unonithithi-edela u marenda okhwana, thetho na ngozi. (Miyambo 23:20) Yehova kananikhoondi-a ng’wa vang’ono, mbwenye liye kanafuna ira nilezelenga. (Salimu 104:15; 1 Akorinto 6:10) Makhundo a Mulungu kanonikhami-a rambela makhalelo na maumbuwelelo othakhala. (Salimu 119:97-100) Akiristu aimbarimbari katina-arela makhundo a Mulungu vofuna ira kafwanye ndalama. Mbwenye aluwa kano-arela makundo a m’Bayibulo ira kamurii-ede Yehova. — Welengani Mateyu 5:14-16.