MURU 22

Vyevyo Vyaireile va Nyanja Yofiila

Farao angavwile ira Aisaraeli koodowa, oochenja maganizo. Oowawandela asilikalae ira: ‘Landani magaleta akondo, nia-arele. Kanialole ira kadowe.’ Eno Farao na asilikalae koowambeela atamangela Aisaraeli.

Yehova oosogolela athwae. Mutana ooi-indi-eda chito murambo teto ma-iyu ooi-indi-eda chito mulo. Aisaraeli kangafiile va Nyanja Yofiila, Yehova oowawandela ira kamange misasa.

Vanduli viwa Aisaraeli koona ira Farao na asilikalae kanaa-arela. Aluwa katan’na otawela chifukwa usogolo uwa ookala nyanja teto unduli uwa kuwewo wazela asilikalayo. Aluwa koova vinjinji teto koomuulela Mose ira: ‘Nikhwa ba-i bola wakede ni-iya wu Iguputo weule.’ Koma Mose oowawandela ira: ‘Kamuove! Yehova unonivulumucha.’ Va Mose ootonyi-eda ira oororomela vinjinji Yehova.

Eno Yehova oowawandela Aisaraeli ira kamaruwe. Ma-iyu anayo, Yehova oopangi-a ira murambole ukale vaari va Aisaraelayo na Aiguputo. Vyevi vyoopangi-a ira umbali ya Aiguputo ukale isi ilukulu, vevo umbali ya Aisaraeli oowala.

Yehova oomuwandela Mose ira atonye va nyanja yofiila na ndanda lae. Moi Yehova oopangi-a ira va nyanjavo vakale lipevo lakopolo ma-iyu etene. Vanduli viwa, nyanjeyo yoogawaneya teto ma-inje kooimela ngati machisi mbali detene. Aisaraeli koolambuwa vouma nodowa kombela imo-iwa ya nyanjeyo.

Aisaraeli kanalambuwa va nyanja moi ma-inje koimela ngati machisi m’mbali mwiwa

Asilikali a Farao koodowa volowa vaari va machisi ama-injayo. Vyangaireile eno Yehova oopangi-a ira asilikayo kasokonezeye. Mateyala amagaletiwa koowambeela gujuwa. Kangaonile vyevi asilikalayo kookuwa ira: ‘Tiyemoni nitawe! Yehova unowavazela kondo.’

Vanduli viwa Yehova oomuwandela Mose ira: ‘Tonya na ndanda lawo va nyanjavo.’ Thawi ineyo ma-inje koowelela m’malo mwiwa nomida asilikali etene a Aiguputo. Farao na asilikalae kookhwela vevo. Kalivo ngakale m’mo-i unoyo avulumuwile.

Aisaraelayo kangaonile ira koovulumuwa kootamanda Mulungu voimba ira: “Ndinoimbeela Yehova, voi liye ngwavadimu. Uvokeda munyanja mahatchi na ogwela vamahatchayo.” Voimba nyimbwela, azimai kooina teto amo-iwa kooimba maseche. Uliwetene oosangalala vinjinji.

“Nikale olimba murima teto nionge ira: ‘Yehova ngunoyo unandikami-a. Kandinaza ndiova. Muthu unandipange n’ni?’” — Aheberi 13:6