Mulili wa 10

Mose oomuwandela Farao ira kanaza adowa teto nawili dowa onana na liye. Koma kaanamaruwe, oomuwandela ira: ‘Peeno vaari vama-iyu a-ima etene aalombwana owambeela baliwa Aiguputo kanokhwa, ambeela mwana wa Farao mpakana a-ima aakapolo.’

Yehova oowawandela Aisaraeli ira kadje yodja yavadela. Oowawandela ira: ‘Musaele mwana wa khosa kapena wabudi. Akale walombwana koma teto wa chaka imo-i. Mumuphe teto magaziwa muwazoli-e vamafelemu a visewo vinyu. Nyamiwa muidje limo-i na mikate dookaana yofufumi-a. Mudje mwangawarile vyowara vinyu koma teto sapato vokozeela ulendo. Chifukwa ma-iyu adambo la peeno munokuma mu Iguputo.’ Kodi munaganiza ira Aisaraeli kavwile avi kangawandeliwe vyevi?

Vaari va ma-iyu, mgelo wa Yehova oodowa unyumba detene da Aiguputo. Nyumba iliyetene ineyo kayazoli-iwe magazi vafelemu, mwana oowambeela baliwa ookhwa. Koma mgeloyo kaaphile a-ima a nyumba dedo dazoli-iwe magazi vafelemu. M’banja lililetene la Aiguputo kaya lolemela kapena losauwa, mookhwa mwana oowambeela baliwa. Koma kalivo mwana ngakale m’mo-i wa Aisaraeli unoyo akhwile.

Moi mwana owambeela wa Farao ookhwa teto. Va pavevo makani etene a Farao kamaleleathu. Thawi ineyo Farao oomuwandela Mose na Aroni ira: ‘Dowangani. Muvenyewo uno. Dowani mwamulambele Mulungwinyu. Munokoza teto landa viweto vinyu.’

Ma-iyu anayo, Aisaraeli koomaruwa teto unde oowala vinjinji chifukwa ya mwedi. Mabanja koma teto mafuko kaendela limo-i. Vookala alombwana 600,000 koma teto a-iyana na a-ima anjinji. Vookala teto athu amitundu dimo-i anayo kadowile limo-i na Aisaraeli dowa lambelana limo-i Yehova. Va pavevo vamalele ukapolo wa Aisaraeli.

Vofuna umbuwela vyevyo Yehova apangile liye vowavulumucha, Aisaraelala koopanga mwambo wavadela chaka iliyetene. Mwambola kauromola ira Pasika.