Milili Miraalu Dowambeela

Aiguputo koowakanyi-eda Aisaraeli ira ka-indenga chito ngati akapolo. Yehova oomutumiza Mose na Aroni wa Farao dowa muwandela ira: ‘Yehova uongile ira ulole athwae kadowenga uipululu ira kamulambele.’ Koma Farao oosomeda mwaibewe voonga ira: ‘Vyevyo Yehova uongile liyevyo kavina chito. Kandinalola ira Aisaraeli kadowenga.’ Angairile eno Farao ooenjedela chito ineyo Aisaraeli ka-indaathu. Eno Yehova afuna ira Farao aiziwe ira liye ngu Mulungu mulukulu kwaranya milungu detene. Kodi munoiziwa vyevyo apangile liye? Oozana wu Iguputo milili 10. Yehova oomuwandela Mose ira: ‘Farao kanafuna ndivwela. Mechelo mamawa unakala angali wu-inje wa Nailo. Udowe wamuwandele ira voi kunafuna ira athwanga kadowenga, ma-inje etene a mu-inje wa Nailo kanotanduwa magazi.’ Mose oomuvwela Yehova moi oodowa wa Farao. Wewo Aroni oovaza na imwiri ma-inje a m’mu-inje wa Nailo, Farao aonanga. Ma-injayo kootanduwa magazi teto koowambeela nuka. Somba detene dookhwa moi athu koosauwela ma-inje ong’wa. Koma Farao kalolileve ira Aisaraeli kadowenga.

Vangamalile malambo 7, Yehova oomuruma nawili Mose wa Farao dowa muwandela ira: ‘Wa-alole ira athwanga kadowenga, mu ilambo ya Iguputo munoza mukale anapulwe valivetene.’ Aroni oogweli-a imwirae mudimu, moi anapulwe koowambeela zaala muilambo yetene. Koofwanyeya m’mba, vabedi, mumbale, nikede onga ira valivetene. Vyevi vyangaireile, Farao oomuwandela Mose ira adowe avepe wa Yehova ira muliliyo umale moi oolonjeza ira unowa-iya Aisaraeli ira kadowenga. Eno Yehova oomali-a muliliyo teto anapulwayo koowambeela khwa. Aiguputo koowagudela anapulwayo kamba kamba moi ilambo yetene yakeda nuka. Koma Farao angaonile ira muliliyo umala, kalolileve ira Aisaraeli kadowenga.

Eno Yehova oomuwandela Mose ira: ‘Aroni avaze vati na imwiri moi tumbulu linotanduwa ngwilisi doluma.’ Aroni oopanga vyevi moi mu ilambomo moowambeela mulili wa ngwilisi doluma. Aiguputo amo-i koomuwandela Farao ira: ‘Mulilila ukumele wa Mulungu.’ Koma Farao kalolileve ira Aisaraeli kadowenga.