Milili Dimo-i Diwa 6

Mose na Aroni koodowa wa Farao dowa muwandela uthenga okumela wa Mulungu ira: ‘Akala kunalola ira athwanga kadowenga, ndinotumiza muilambwela vilombo ving’onong’ono vyoyamwa magazi.’ Eno vilombovyo vyoozaala m’manyumba etene Aiguputo, olemela na osauwene moi vyakede mbwee valivetene. Koma wu Goseni wewo Aisaraeli kakalaathu vilombovi kavyaliwo. Ambeela va mulili wanambala 4 unola, mililidi dakeda akuza Aiguputo oka. Eno Farao oomuvepa Mose ira: ‘Wandivepele wa Yehova ira amali-e vilombovi. Vyaera eno ndinoulolani ira mudowenga.’ Koma Yehova angakede mali-a mulili wa vilombovyo, Farao oochenja maganizo. Liye kaafunjedilevo yongo.

Yehova oonga ira: ‘Akala Farao kanalola ira athwanga kadowenga, viweto vya Aiguputo vinowambeela bulela nokhwa.’ Dambo lo-arela, viweto vya Aiguputo vyoowambeela khwa. Koma viweto vya Aisaraeli kavyakhwile. Ngakale vyali eno, Farao kaalolileve ira Aisaraeli kadowenga.

Vanduli viwa Yehova oomuwandela nawili Mose ira adowe wa Farao teto avokede dora mudimu. Doralo lootanduwa tumbulu teto tumbululo loozaala ilambo yetene ya Iguputo. Tumbululo lamorela vathuthu la muthu kapena iweto, loowambeeli-a mabala ovoreya vinjinji. Komave Farao, kaalolile Aisaraeli ira kadowenga.

Yehova oomurumave Mose ira adowe wa Farao dowa muwandela ira: ‘Kodi kunafunave a-iya athwanga ira kadowenga? Mechelo ndinorumbwi-a zongwe wa maralaza.’ Dambo lo-arela, Yehova oorumbwi-a zongwe wa maralaza, mabingu na mulo. Wu Iguputo wali wa-anarumbwe zongwe ngati unoyo. Zongweyo oononga mitengo koma teto mbewu detene patulavo wu Goseni. Eno Farao oomuwandela Mose ira: ‘Wandivepele wa Yehova ira amali-e zongwela moi ndinoulolani ira mudowenga.’ Koma Yehova angakede mali-a zongweyo Farao oochenja teto maganizo.

Vanduli viwa Mose oomuwandela Farao ira: ‘Sopano unoza mulili wa aserebo moi kanoza kadje vyomela vyetene vyevyo kavyaonongiwe na maralaza.’ Eno ooza mulili wa aserebo anjinji moi koodja mbewu detene koma teto matakuru etene a mitengo. Farao oomuvepa nawili Mose ira: ‘Wandivepele wa Yehova ira amali-e mulilila.’ Koma Yehova angamali-ile muliliyo, Farao ookoondave alola Aisaraeli ira kadowenga.

Yehova oomuwandela Mose ira: ‘Tapula ndanda lawo teto utonye udimu.’ Thawi ineyo udimu ookala isi ilukulu. Wamalambo maralu, Aiguputo katakwakwani-a ona muthu uliwetene kapena yongo iliyetene. Koma m’manyumba a Aisaraeli, moowala.

Vyangaireile eno Farao oomuwandela Mose ira: ‘Dowangani, koma viweto vinyu muvi-iye.’ Koma Mose oomusomeda ira: ‘Ninovilanda chifukwa ninafuna napeleke sembe wa Mulungwi-u.’ Farao oolunduwa vinjinji noonga ira: ‘Uvenyevo va! Kandize ndiuona nawili. Moi ndakeda za uona ndinoza ndiuphe.’