Davide Oomupha Goliyati

Yehova oomuwandela Samueli ira: ‘Dowa unyumba ya Jese. Mwanae m’mo-iwa unoza akale mwene wa Isaraeli.’ Samueli oodowa moi angakede muona mwana owambeela wa Jese ooganiza ira: ‘Unoyo unaze akale mwenele ngunola.’ Koma Yehova oomuwandela Samueli ira kai unola. Vanduli viwa oomuwandela teto ira: ‘Miyo ndinoona murima wa muthu ookala vyevyo athu kanaonaathu.’

Jese oozana a-imae amo-iwa 6 koma Samueli oonga ira: ‘Va kalivo uliwetene unoyo Yehova umusakulile liye. Kodi ukaana mwana m’mo-iwa?’ Jese oosomeda ira: ‘Ukede ala m’mo-i mung’onong’ono vinjinji. Zina lae Davide. Uli odji-a khosa.’ Davide angafiile, Yehova oomuwandela Samueli ira: ‘Unoyo ndimusakulile miyo ngunola.’ Samueli oo-ela makura va muru va Davide. Vyevi vyatapulela ira umuzoza ira aze akale mwene wa Isaraeli.

Vathawi imo-iwa, Aisaraeli kawana na Afilisiti. Eno umbali ya Afilisitayo ookala muthu mulukulu koma teto wakopolo vinjinji zina lae Goliyati. Dambo lililetene, Goliyati oowanyoza Aisaraeli. Aonga ira: ‘Sakulani muthu oyi awane na miyo. Andigonji-a iyo ninokala akapolwinyu. Koma miyo ndamugonji-a, nyo munokala akapolwi-u.’

Davide oofiya vamalo vevo vali asilikali Aiisaraeli na yolinga yoi apeleke yodja wa abalae. Angali wewo, oovwa vyevyo Goliyati aonga liye. Eno Davide oonga ira: ‘Miyo ndinodowa ndawane na liye.’ Mwene Sauli angavwile vyevi oonga ira: ‘Uli mwana.’ Koma Davide oosomeda ira: ‘Yehova unondikami-a.’

Sauli oomuwandela Davide ira alande vida na vyowara vyae koma liye oonga ira: ‘Kandinakwakwani-e vaza kondo na vyongo vyetene vyevi.’ Eno akede tukula yongo yovokela mabwe yoromoliwa legeni notitela u-inje. Vanduli viwa oododa mabwe apama okwakwana 5 nowa-ela muchikwama mwae. Vanduli viwa oowambeela tamangela wewo wali Goliyati. Goliyatiyo angamuonile oonga ira: ‘We mwanawe! Za uno ndiuphe moi unokala yodja ya mbalame na nyama.’ Davide kaaovile. M’malo mwiwa oomusomeda ira; ‘Weyo unaza na supada koma teto mwalango koma miyo ndinaza mu zina la Yehova. Kunawana na iyo naari koma na Mulungu. Peeno uliwetene unoiziwa ira Yehova ngwakopolo kwaranya supada na mwalango. Liye unonikami-a ira niugonji-eni etene nyen’ne.’

Vanduli viwa Davide oo-ela libwe mulegenae nolivoka mwakopolo vinjinji. Yehova oomukami-a moi libwelo lootamanga dowa povola muru wa Goliyati vainji. Thawi ineyo Goliyati oogwa vati nokhwa. Afilisiti kangaonile vyevi koowambeela tawa. Kodi nyo munomuroromela Yehova ngati mwemo Davide mwapangela liye?