Davide na Sauli

Davide angamuphile Goliyati, Mwene Sauli oomuwandela ira akale ndimuwa wa asilikali. Davide ookwaranya kondo dinjinji moi oochuka vinjinji. Awelangawo ukondo, a-iyana kooina koma teto imba ira: ‘Sauli upha adani masauzande koma Davide upha masauzande anjinji.’ Vyevi vyoopangi-a ira Sauli avye murima moi oowambeela funa mupha Davide.

Davide ooiziwa imba zeze. Dambo limo-i amuimbelanga Sauli nyimbo, Sauliyo oovoka mwalangwae ira amuphe. Davide oorambela mwalangoyo moi kwamulatile. Ambeela vevo, Sauli ooesaesa ira amuphe ba-i. Vi vyoopangi-a ira Davide atawele uipululu.

Sauli oolanda asilikali 3,000 nowambeela musaelasaela Davide. Eno dambo limo-i koovolowa mupanga mwemo mwali Davide na afwae. Afwae a Davidayo koomuwandela ira: ‘Ula-i ngu mwayawo ira umuphe Sauli.’ Davide ooenda mowambaza dowa dula yowara ya Sauli koma Sauliyo kaaiziwile iliyetene. Vyangaireile eno, Davide oodandaula vinjinji ira kaalemekezile mwene ozoziwa na Mulungu. Liye kaalolile ira afwayayo kamuphe Sauli. Vanduli viwa Sauli angakumile mupangamo, Davide ookuwa nomuwandela ira ndookaana mpata oyi ndookoza upha koma ndikede u-iya. Kodi Sauli oochenja maganizo?

Naari. Oopitilizave musaelasaela Davide. Dambo limo-i ma-iyu, Davide na balae zina lae Abisai koodowa vamalo anayo Sauli agonile liye na asilikalae. Kangafiile koomufwanya Abineri unoyo amuing’anela mwene naliyene teto agonanga. Eno Abisai oonga ira: ‘Mwai kunakwaranya veva. Bwanji nimuphe?’ Koma Davide oonga ira: ‘Naari. Unola unaza alangiwa na Yehova. Tiyemo nikede tukula mwalangwae na suwae wa ma-injola nidowenga.’

Vanduli viwa Davide oogwela vamwango umo-iwa wa vakwikwi nokuwa ira: ‘We Abineri! Unakeda gona m’malo momuteteza mwenoyo? Kodi mwalangwae na ma-injae vili waani?’ Sauli angavwile mawu a Davide oonga ira: ‘Mpata oyi undiphe ooufwanya koma ukede ndiomela murima. Ndiizindikila sopano ira weyo unoza ukale mwene wa Isaraeli.’ Va sopano Sauli oowelela waniwa. Koma kai athu etene a m’banja la Sauli anayo kaidana na Davide.