Yesu Oomusakula Saulo

Saulo ali Muroma moi abaluwele wu Tariso. Liye ali Mfarisi teto ooiziwa pama Ilamulo ya Mose koma ooidana vinjinji na Akristu. Oowa-inda nowadowangana undende. Liye ookalavo teto vevo athu auwali kamuvokaathu Sitefano na mabwe mpakana mupha.

Koma Saulo kakede manga Akristu awu Yelusalemu oka ba-i. Eno oovepa ilolezo wa ndimuwa wa asembe ira a-inde teto Akristu a muzinda wa Damasiko. Koma anga-alile vang’ono fiya muzindoyo, mwazizizi oona wala moi oogwa vati. Vanduli viwa oovwa mawu oonga ira: ‘Saulo kodi unandizuzumi-ela n’ni?’ Saulo oofuka ira: ‘Muli mbaani?’ Mawale koovweya teto nawili ira: ‘Ndili Yesu. Dowa wu Damasiko moi unodowa wawandeliwe vyofwanelela panga wewo.’ Thawi ineyo Saulo oo-iya oona moi kerile mu-inda ndanda musogolelanga.

Wu Damasiko ookala Kristu m’mo-iwa ororomeleya zina lae Hananiya. Yesu oomuwandela Hananiya ira: ‘Dowa wu sewu oongowa teto wafiye vanyumba ya Yudasi nofukeda vya muthu oromoliwa Saulo.’ Koma Hananiya oonga ira: ‘Mbwiyeni, muthu unoyo ndimuiziwa pama. Uno-inda ofunjedinyu nowa-eelanga mundende.’ Yesu oonga ira: ‘Dowa. Ndimusakula Saulo ira alaleelenga uthenga wapama wa athu amitundu dinjinji.’

Hananiya oodowa moi angamu- fwanyile Saulo oomuwandela ira: ‘Balanga Saulo, Yesu undiruma ira ndize ndi-ule maswawo.’ Thawi ineyo Saulo oowambeela ona. Ooiziwa vya Yesu moi ookala ofunjedae. Anga- batiziwile oowambeela laleela mu- sunagoge. Ayuda koodabwa vinjinji kangaonile ira Saulo uwambeela funji-a athu vya Yesu. Aluwa koofuka ira: ‘Ula kai muthu unoyo a-inda ofunjeda a Yesule?’

Saulo oofunji-a athu wu Damasiko wa chaka taaru. Koma Ayuda kooidana vinjinji na liye moi koopanga vyoi kamuphe. Abali kangavwile vyevi koomu-ela mu dengu nomukumi-ela valuwindo la mpanda.

Saulo angafiile wu Yelusalemu oofuna ira akalenga limo-i na Abali. Koma Abalayo koomuova. Vanduli viwa ofunjeda m’mo-iwa zina lae Baranaba oomuomela murima moi oomudowana wa anamarumiwa nowafotokozela ira Sauloyo oochenja vinjinji moi sopano ngu Kristu. Saulo oowambeela laleela limo-i na mpingo wau Yelusalemu. Vanduli viwa oowambeela iziweya na zina loi Paulo.