Mwana wa Mu-iyana Wamasiye Oovenyi-iwa

Vevo wu Isaraeli waliathu ilala, Yehova oomuwandela Eliya ira: ‘Dowa wu Zarefati. Wewo muzimayi m’mo-iwa wamasiye unodowa auva-enga yodja.’ Eliya angafiile mu mzindoyo, oona muzimayi osauwa koma teto wamasiye asaelanga khuni. Liye oomuvepa ira amuva-ewo ma-inje. Vevo muzimayiyo adowa liye olanda ma-injayo, Eliya omuwandela teto ira: ‘Mundizelenawo teto yodja vang’ono.’ Koma muzimayiyo oonga ira: ‘Kandin’na yodja yoi ndinokoza uva-ani. ‘Ndikede kaana uthu vang’ono na makura oyi ndiphiyele yodja yokwakwanela miyo na mwananga ba-i.’ Koma Eliya oomuwandela ira: ‘Yehova uongile ira mwandiva-a yodja ineyo ndiuvepileni miyo, uthu na makurinyu kavinaza vimala mpakana zongwe ungarumbwile.’

Eno muzimayiyo oodowa phiya yodja nomuva-a namaongela wa Yehovoyo. Monga mwemo Yehova mwaongele liye, muzimayiyo na mwanaye kookaana yodja vathwi yetene yailaleyo. Suwae wa uthu koma teto wamakura wakeda kala ozaala.

Vanduli viwa vooireya vyongo vyovwi-a chisoni. Mwanole oobulela vinjinji mpakana tatiya. Eno muzimayiyo oomuvepa Eliya ira amukami-e. Eliya oomulanda mwana unoyo akhwileyo nomudowana musubi lamudimu. Oomugonati-a vabedi teto oopempela ira: ‘Yehova, ndinavepa ira mumuvenyi-e mwanola.’

Vyangaireile eno mwanole ookala teto na moyo moi oowambeela vuma. Eliya oomuwandela muzimayiyo ira: ‘Mwaninyule ula, uli moyo.’ Muzimayiyo oosangalala vinjinji moi oomuwandela Eliya ira: ‘Muli muthu wa Mulungu. Ndinaonga eno chifukwa munaongecha vyevyo Yehova uuwandeleni liye.’ Vyevyo Yehova apangile liyevi vyali vyodabwi-a vinjinji. Ninaonga eno chifukwa vathawiyo kavali muthu uliwetene unoyo avenyi-iwilevo. Koma teto muzimayila limo-i na mwanaeyo katali Aisaraeli.