Yehova Oomulimbikisa Eliya

Yezebeli angavwile vyevyo vyaaireile anamaongela a Baala, oolunduwa vinjinji. Vanduli viwa ootumiza uthenga wa Eliya oyi: ‘Mechelo nawen’ne teto unokhwa ngati mwemo kakhweleathu anamaongela a Baala.’ Eliya angavwile vyevi oova vinjinji moi ootawela uipululu. Wewo oopempela ira: ‘Yehova ndiigoma na vyevyi vinaireyavi. Ndiloleni ira ndikede khwa.’ Chifukwa yogoma Eliya oogona vati vatengo.

Eno ooza mgelo nomuvenyi-a moi oomuwandela ira: ‘Venya udje.’ Eliya angaing’anile, oona suwo wa ma-inje koma teto mkate ungali va mabwe okaa-a. Oodja mkateyo nong’wa ma-injayo vanduli viwa oogona nawili. Vangavirile thawi, mgelole oowela za muvenyi-a nawili nomuwandela ira: ‘Tiye udje nawili ira ufwanye kopolo chifukwa unoenda ulendo olapa.’ Eno Eliya oovenya nodja nawili. Vanduli viwa ooenda wa malambo 40, tana na ma-iyu mpakana dowa fiya vamwango wa Horebe. Eno oovolowa upanga nogona. Koma Yehova oomufuka ira: ‘Eliya unafunawo n’ni uno?’ Eliya oosomeda ira: ‘Aisaraeli kootwa pangano liwa na nyo. Koogwi-a maguwinyu asembe, teto koopha anamaongelinyu. Vathawi ila kanafuna teto kandiphe miyo.’

Koma Yehova oomuwandela ira: ‘Dowa waimele vamwango.’ Eno voomba lipevo novira vamulango wapangalo. Vanduli viwa ooireya ivomelezi moi vanduli va ivomeleziyo oobuwa mulo. Vyangaireile eno Eliya oovwa mawu oongiwa mwavativati. Angavwile mawayo oobisa kovae na yowara yae moi ookuma noimela vamulango wapangalo. Yehova oomufuka nawili ira: ‘Unafunawo n’ni uno?’ Eliya oosomeda ira: ‘Ndikede ala meka.’ Koma Yehova oomuwandela ira: ‘Kuli weka mu Isaraeli mukala teto athu amo-iwa okwakwana 7,000 anayo kanandilambela. Dowa wamuzoze Elisa ira aze avolowe m’malo mwawo.’ Thawi ineyo Eliya oodowa panga vyevyo Yehova amuwandele liyevyo. Kodi munaganiza ira na nyen’ne teto Yehova unokoza ukami-ani mwapanganga vyevyo unafuna liye? Mookaikela unokoza ukami-ani. Sopano tiyemoni nione vyevyo vyaireile vathawi ya ilala.