Yesu Ookala Mesiya

Yohani oolaleela ira: ‘M’mo-iwa mulukulu kwaranya miyo unanaza.’ Vevo Yesu an’na liye chaka 30 oodowa wu inje wa Yorodano wewo Yohani wabatiza liye athu. Vathawi inela Yesu akumela wu Galileya. Liye afuna ira Yohani amubatize koma Yohaniyo oonga ira: ‘Naari, miyo kandili ofwanelela ubatizani. Nyo ngunoyo uli ofwanelela ndibatiza miyo.’ Yesu oomuwandela ira: ‘Yehova unafuna ira undibatize.’ Eno oodowa mu-inje wa Yorodano moi Yohani oomubatiza Yesu vomubwini-a thuthu letene.

Yesu angakumilemo m’ma-injenimo oowambeela pempela. Eno udimu oo-uleya moi zimu wa Mulungu ooneya ngati kangaiwa ootita noza mubutela Yesu. Vanduli viwa Yehova oonga angali udimu ira: “Weyo uli mwananga oomeliwana, unondisangalasa vinjinji.”

Zimu wa Mulungu ungafiile va Yesu, Yesuyo ookala Kristu kapena ira Mesiya. Eno oowambeela inda chito ineyo Mulungu amurumile liye.

Yesu angakede batiziwa wene oodowa uipululu moi ookala wewo malambo 40. Angakumile muipululumo oodowa muona Yohani. Yohani angamuonile Yesu azanga oonga ira: ‘Ula ngu Mwanawakhosa wa Mulungu unoyo unachosa uchimo wa ilambo.’ Veva Yohani afuna ira athu kaiziwe ira Yesu ngu Mesiya. Koma kodi munoiziwa vyevyo vyaireile Yesu angali muipululu? Ninoona m’muru o-arela.