Athu Amitundu Dimo-i Koovwa Uthenga Wapama

Anamarumiwa koovwela lamulo la Yesu loi uthenga wapama ulaleeliwe va ilambo yetene. Mu 47 C.E., abali awu Antiyokeya koomutumiza Paulo na Baranaba ira kalaleele. Athu ambilala kooendaenda wu Asia Minor teto koofiya wu Debe, wu Lusitara, na wu Ikoniyo.

Paulo na Baranaba koolaleela wa muthu uliwetene mo-olandela ira ngolemela kapena osauwa, ndimuwa kapena mwana. Athu anjinji koovuruwana. Paulo na Baranaba kalaleelanga wa bwanamkubwa m’mo-iwa zina lae Serigio Paulo, muthu m’mo-iwa wamasenga oofuna asokoneza. Eno Paulo oomuwandela ira: ‘We Yehova unoulanga.’ Thawi ineyo muthuyo oo-iya ona. Bwanamkubole angaonile vyevi oowambeela roromela vyevyo Paulo na Baranaba kamufunji-aathu.

Paulo na Baranaba koolaleela munyumba da athu, m’misika, m’misewu, koma teto m’masunagoge. Kangafiile wu Lusitara koomuili-a muthu m’mo-iwa orangala. Eno athu kangaonile vyevi koofuna alambela voganiza ira aluwa ti milungu. Koma Paulo na Baranaba koowawandela ira: ‘Athu nyo, iyo teto nili athu ngati nyen’ne. Mulambelenga Mulungu eka.’ Koma vanduli viwa ooza Ayuda anayo kasokonezile maganizo a athwayo. Thawi ineyo athwayo koowambeela muvoka Paulo na mabwe vanduli viwa koomukokela unde wa mzinda voganiza ira ukhwa. Koma Paulo ali angali moyo. Vyangaireile eno, abali koodowa mulanda nomudowana mumzinda. Vangavirile thawi Paulo oowelela wu Antiokeya.

Mu 49 C.E., Paulo oouwambeela teto ulendo umo-i. Angakumile wu Asia Minor, oodowa laleela wu Ulaya. Liye oofiya wu Atene, wu Filipi, wu Tesalonika koma teto madera amo-i. Vaulendola ali na Sila, Luka koma teto zombwe m’mo-iwa zina lae Timoteyu. Aluwa koo-indela limo-i chito yogarati-a mipingo koma teto ilimbikisa. Paulo ookala wu Korinto wachaka imo-i na hafu na yolinga yoi alimbikise abali awewo. Liye oolaleela, funji-a koma teto lemba makalata odowa wu mipingo do-iyana-iyana. Koma teto oo-inda chito yopanga matenti ira afwanyengawo ndalama. Vanduli viwa Paulo oowelela wu Antiokeya.

Mu 52 C.E., Paulo oouwambeela ulendo wanaralu. Angakumile wu Asia Minor oofiya wu Filipi, wewo ku umpoto, moi vanduli viwa oodowa wu Korinto. Liye ookala wu Efeso chaka dingasi dene. Wewo oofunji-a, ili-a athu koma teto kami-a mipingo dawewo. Dambo lililetene ookamba khani muholo yava sukulu imo-iwa. Athu anjinji koovuruwana uthengae moi koochenja makalelwiwa. Paulo angalaleele madera anjinji oodowa wu Yelusalemu.