Pitilizani Kozeela Dambo la Yehova

1. Kodi ninafuneela panga n’ni ira nize nivulumuwe va dambo la Yehova?

BAIBULO laonganga vya “dambo la Yehova,” linatapulela dambo lelo Yehova unaze liye aononge adanae novulumucha athwae. Mundulimu, thawi dimo-i Yehova oowononga adanae. (Yes. 13:1, 6; Ezek. 13:5; Zef. 1:8) Malambwano, “dambo la Yehova” linaza liambeela noonongiwa wa Babulo Mulukulu teto linoza lifiye vachimake va khondo ya Aramagedo. Ira nize nivulumuwe ‘va damboli’, ninafuneela kozeela vathawiila. Yesu oofunji-a ira, kaninafuneela keda kozeela “chisauso ilukulu” koma ninafuneela teto pitilizave ‘kala okozeya.’ — Mat. 24:21; Luk. 12:40.

2. Kodi buku la 1 Atesalonika linanikami-e avi?

² Mukalatae yowandeliwa yowambeela ineyo alembele liye Akiristu a wu Tesalonika, namarumiwa Paulo oo-indi-eda chito mafanizo angasene vofuna akami-a ira kapitilize kozeela dambo lilukulu la Yehova. Liye ooiziwa ira damboli kalali vakwikwi va thawi ineyo. (2 Ates. 2:1-3) Komave, oowalimbikisa abalayayo ira kakozeelenga damboli ngati linaza mechelo, moi iyo teto ninafuneela indi-eda chito malangizwayala. Tiyemoni nikambirane mwemo afotokozele liye vyongo vyo-arelavi: (1) mwemo dambo la Yehova linazeathu lifiyele, (2) anayo katinaza kavulumuwa va damboli koma teto (3) mwemo ninakozeele iyo ira nize nivulumuwe.

KODI DAMBO LA YEHOVA LINAZA LIFIYA AVI?

3. Kodi dambo la Yehova linaza lifiya avi ngati mbava ma-iyu? (Onani teto ithuzithuzi.)

³ “Ngati mbava ma-iyu.” (1 Ates. 5:2) Ala mbamawu owambeela mwa mawu mararu ofotokoza mwafanizo vyoza wa dambo la Yehova. Thawi dinjinji mambava kanopanga vyongo mombaraanya koma teto ma-iyu, vathawi yoi athu katinaembekezela. Mofwanafwana na vyevi, dambo la Yehova linaza lifiya mo-oembekezeleya moi vyevi vinoza virurumuche athu anjinji. Ngakale Akiristu oona kanoza kadabwe chifukwa ya mwemo vyongo vinazeathu viireele mombaraanya. Koma mo-iyana na athu otakala, iyo kaninaza niwonongiwana.

4. Kodi dambo la Yehova linafwanafwana avi na vyovoreya vya vobala?

⁴ “Monga vyovoreya vya vobala vya mu-iyana wavambani.” (1 Ates. 5:3) Mu-iyana oembekezela kanavaela iziwa thawi ineyo unabale liye mwana. Koma liye kanakaikela ira thawi yobaleyo inofiya. Thawiyo inofiya morurumucha, unovwa ululu ulukulu koma teto kilivo ineyo unaire liye ira vyevi kaviireye. Mofwanafwana na vyevi, iyo teto kaninaiziwa thawi ineyo dambo la Yehova linazeathu liambeele. Komave, kaninakaikela ira linoza lifiye, koma teto ira chiweluzo ya Mulungu wa athu otakala inaza ikala yorurumucha koma teto yo-opeweya.

5. Kodi chisauso ilukulu inafwanafwana avi na m’bandakucha?

⁵ Ngati m’bandakucha. Fanizo lanararu la Paulo linaonga teto vya mambava anayo kanaba ma-iyu. Koma vathawila, liye uchenja mwemo munafotokozela liye fanizoli moi unafwanafwani-eda dambo la Yehova na m’bandakucha. (1 Ates. 5:4) Athu oba ma-iyu, kanokoza tanganisiwa na vyevyo kanairaathu moi unde unokoza achela morurumucha, vyevyo vinapangi-e ira athu kaaone. Mofwanafwana na vyevi, va chisauso ilukulu, athu anayo kali ngati mambava teto kali mudima vopitilizave panga vyongo vyevyo Mulungu kanasangalalana, kanoza kaoneele. Mo-iyana na athu anala, iyo ninokoza kala okozeya vopewa makalelo anayo Yehova kanasangalalana nopanganga “iliyetene yapama na iliyetene yolungama na yoona.” (Aife. 5:8-12) Vanduli viwa, Paulo ooromola teto mafanizo ambin’li ofwanafwana vofotokoza vya athu anayo katinaza kavulumuwa.

KODI MBAANI ANAYO KATINAZA KAVULUMUWA VA DAMBO LA YEHOVA?

6. Kodi athu anjinji kanagona mundila yoi avi? (1 Atesalonika 5:6, 7)

⁶ “Ogona.” (Welengani 1 Atesalonika 5:6, 7.) Paulo oofwanafwani-eda anayo katinaza kavulumuwa va dambo la Yehova na athu anayo kanagona. Aluwa katinaiziwa vyevyo vinaireya kapena teto ira thawi inanavira. Eno, katinazindikile vyongo vyofuneya vyevyo vinaireya kapena teto iravo yongo. Malambwano, athu anjinji kananagona mwauzimu. (Arom. 11:8) Aluwa katinaroromela umboni woi ninakala ‘m’malambo omari-a’ koma teto ira chisauso ilukulu inowambeela chineneveva. Vyoireya vilukuluvilukulu vya muilambwela, vinokoza pangi-a ira athu amo-iwa kavenye mwauzimu nowambeela panga chidwi na uthenga wa Umwene. Komave anjinji kanowambeela gona akoka m’malo mokalave maso. Ngakale amo-iwa anayo karoromela ira ukala dambo la chiweluzo, kanoona ira lili undendai vinjinji. (2 Pe. 3:3, 4) Komave iyo, dambo lililetene ninozindikila ira malangizo oyi nikaleve maso, mbofuneya vinjinji.

7. Kodi athu anayo kanaembekezela mkwiyo wa Mulungu kanafwanafwana avi na olezela?

⁷ “Anayo kanalezela.” Namarumiwola oofwanafwani-eda athu anayo kanaembekezela mkwiyo wa Mulungu na olezela. Muthu unoyo ulezelile unodimbeliwa zindikila vyongo moi kanasakula vyoira mwazelu. Mofwanafwana na vyevi, athu otakala katinavwela machenjezo a Mulungu. Aliwa kanosakula panga vyongo vyowaonongi-a. Koma Akiristu kanowandeliwa ira kanafuneela kalave maso ira kakale oganiza pama. (1 Ates. 5:6) Kaswiri m’mo-iwa wa Baibulo oofotokoza ira ganiza pama wewu “kukaana maganizo odeka na ootekenyeya koma teto fwanafwani-eda pama vyongo, vyevyo vinakami-a ira muthu asakule pama vyoira.” Chifukwa n’ni ninafuneela kaana maganizo odeka koma teto ootekenyeya? Kaana maganizo oyi eni, unokoza nikami-a ira kanivolowelenga ndale kapena vyoireya vya muilambwela. Vevo dambo la Yehova linaandamelaathu, ninerenga kanyi-ediwa vinjinji ira nipangengana vyongo vyevi. Komave, kaninafuneela kumbanya ira ninaza niira avi naza nigumana na vyevi. Zimu wa Mulungu unoza unikami-e kaana maganizo odeka koma teto ootekenyeya moi ninoza nisakule vyoira mwazelu. — Luka 12:11, 12.

KODI NINAKOZEELE AVI DAMBO LA YEHOVA?

8. Kodi lemba la 1 Atesalonika 5:8, linatonyi-eda avi makalelo anayo kananikami-e kalave oganiza pama? (Onani teto ithuzithuzi.)

⁸ “Niware yovitetezela vamirima . . . na . . . chisoti.” Paulo unonifwanafwani-eda na asilikali anayo kali cheru moi koowara vyowara vyaukhondo. (Welengani 1 Atesalonika 5:8.) Msilikali unoyo uli vachitwae, thawi detene unokalecha okozeya vaza khondo. Chimozimozi teto na iyo. Ninopitiliza kozeela dambo la Yehova vowara yovitetezela vamirima yairoromelo na chikondi koma teto chisoti yachipulumuso. Makalelo anala kanokoza nikami-a vinjinji.

9. Kodi iroromelo yi-u inaniteteza avi?

⁹ Yovitetezela vamirima yooteteza murima wa msilikali. Iroromelo koma teto chikondi, vinoteteza murimi-u opipirisa. Makalelo anala kanonikami-a ira nipitilize tumikela Mulungu koma teto musazi-eda Yesu. Iroromelo inonikami-a kala osimikiza ira Yehova unoza aniva-e mphoto chifukwa yomusaelasaela na murima wetene. (Aheb. 11:6) Inonikami-a teto kalave ororomeleya wa Msogoleli-u, Yesu, ngakale vevo ninagumana iyo na mavuto. Ninokoza limbi-a iroromelo yi-u ira nivilele mavuto, voganizela visazo vya malambwano vya athu anayo kakalileve ororomeleya ngakale ira koozuzumi-iwa kapena koogumana na mavuto avyachuma. Ninokoza pewa msampha oomeliwana chuma vosazi-eda athu anayo kasakulile kaana moyo o-oulela vinjinji nayolinga yoi ka-elenga vyongo vya Umwene vamalo owambeela.b

10. Kodi muwomeliwana Mulungu koma teto athu, unanikami-a avi ira nivilelenga?

¹⁰ Chikondi chofuneya ira nikaleve maso koma teto niganizenga pama. (Mat. 22:37-39) Muwomeliwana Mulungu unonikami-a ira nivilelenga na-indanga chito yolaleela ngakale vevo panga vyevi unanizi-edeathu mavuto. (2 Tim. 1:7, 8) Chifukwa yowaomeliwana athu anayo katinatumikela Yehova, ninopitilizave laleela mugawo li-u ngakale teto laleela zela va foni koma teto volemba makalata. Kaninafooka chifukwa ninoembekezela ira dambo limo-i, athu anala kanoza kachenje nowambeela panga vyongo vyapama. — Ezek. 18:27, 28.

11. Kodi awomeliwana Akiristu afwi-u unanikami-a avi? (1 Atesalonika 5:11)

¹¹ Awomeliwana athu unotangani-avo omeliwana Akiristu afwi-u. Ninotonyi-eda chikondila ‘vomiyali-ana nolimbikisana.’ (Welengani 1 Atesalonika 5:11.) Mofwanafwana na asilikali, anayo kanakami-ana vathawi ya khondo, iyo teto ninolimbikisana. Pivyoona ira msilikali unokoza porecha msilikali fwae vathawi ya khondo, koma kanapange vyevi mwadala. Mofwanafwana na vyevi, iyo teto kaninakumudwi-e mwadala abali na arangoli-u kapena aweli-eda vyotakala. (1 Ates. 5:13, 15) Ninotonyi-eda teto chikondi volemekeza abali anayo kanasogolela mupingo. (1 Ates. 5:12) Vevo Paulo alemba liye kalatela, vali va-anamale chaka kumela vevo pingo wau Tesalonika wagarati-iweathu. Abali anayo kasogolela, mwina kali ka-anaiziwe vinjinji koma teto mwina koolakwi-a vyongo vimo-i. Komave, aliwa kafuneela lemekeziwa. Kwaranya wale letene, vevo chisauso ilukulu inazeathu iambeele, ninaza nifuneela roromela vinjinji malangizo anayo andimuwa m’mipingo di-u kanazeathu kaniva-e. Mwina vathawiyo kaninaza niwanda wachela malangizo kumela wu likulu kapena wu ofesi ya thambi, eno pivyofuneya funjeda omeliwana koma teto lemekeza andimuwa vathawiila. Kaya vyongo vinaza vikala avi, tiyemoni nipitilize kala oganiza pama, kanikedenga ganizela vyevyo aliwa kanalakwi-aathu koma niganizelenga likundo loi Yehova zela mwa Kiristu, unosogolela alombwana ororomeleya anala.

12. Kodi idedi-edo inateteza avi maganizwi-u?

¹² Monga mwemo chisoti inatetezelaathu muru wa msilikali, idedi-edo yi-u yachipulumuso inoteteza maganizwi-u. Chifukwa yokaana idedi-edo yolimba, ninoiziwa ira vyevyo ilambwela inapelekaathu, pivyo-okaana chito. (Afil. 3:8) Idedi-edo yi-u inonikami-a kala odeka koma teto ootekenyeya. Mu pumwemo vyaliliathu na Wallace na Laurinda, anayo kanatumikela wu Africa. M’milungu taaru doka, uliwetene oowachela uthenga woi likolo lae litatiya. Koma chifukwa ya mulili wa COVID-19, aliwa katawandile dowa waniwa ira kakale limo-i na abaliwa vathawi ya malilo. Wallace alembile ira: “Idedi-edo yoi okhwa kanoza kavenye, inondikami-a ira kandiganizelenga mwemo vyaliliathu m’malambo omari-a amoywiwa, koma mwemo vinazeathu vikalele m’malambo owambeela amoywiwa muilambo isha. Idedi-edo inela inondikami-a ira murimanga ukalenga m’malo ndavuteyanga na chisoni.”

13. Kodi ninaire avi ira niwachelenga zimu owela?

¹³ “Kamutimi-e mulo wa zimu.” (1 Ates. 5:19) Paulo oofwanafwani-eda zimu owela na mulo unoyo unakale ngati uli muwari mwi-u. Nakaana zimu wa Mulungu, ninokala atindi koma teto ofunechecha panga vyofwanelela moi ninokaana kopolo dotumikela Yehova. (Arom. 12:11) Kodi ninaire avi ira niwachelenga zimu owela? Niuvepenga, funjeda Mawu a Mulungu koma teto kala mugulu losogoleliwa na zimu wa Mulungu. Panga vyevi, unokoza nikami-a kaana “makalelo anayo zimu owela unakumi-aathu.” — Agal. 5:22, 23.

14. Kodi ninafuneela pewa n’ni ira nipitilize wachela zimu wa Mulungu? (Onani teto ithuzithuzi.)

¹⁴ Mulungu aniva-a zimwae owela, ninafuneela samala ira ‘kanitimi-e mulo wa zimu.’ Mulungu unopeleka zimwae wa athu oka anayo kanapitilizave ganizela vyofwanelela koma teto kaana makalelo apama. Liye unokoza iya niva-a zimwae akala ninapitiliza ganizela nopanga vyongo vyotakala. (1 Ates. 4:7, 8) Ira nipitilize wachela zimu owela, ‘kaninyozenga mawu aulosi.’ (1 Ates. 5:20) Vavesili “mawu aulosi,” kanaimelela mauthenga opelekiwa na Mulungu tangani-avo okuza dambo la Yehova koma teto ira dambolo lili vakwikwi. Thawi detene ninoumbuwela vya damboli teto kaninaganiza ira Aramagedo kinaza ifiya muthawi-u. M’malomwiwa, dambo lililetene ninotonyi-eda ira ninoliganizela koma teto embekezela ira linofiya chineneveva, vopitiliza kaana makalelo apama koma teto tanganisiwa na ‘chito dotonyi-eda ira nili ovipeleka wa Mulungu.’ — 2 Pe. 3:11, 12.

“SIMIKIZELANI VYONGO VYETENE”

15. Kodi ninapewe avi pusi-iwa na makundo achinyengo koma teto vyonama vya viwanda? (1 Atesalonika 5:21)

¹⁵ Chineneveva athu anayo kanaruni-a Mulungu, kanoza kalengeze ira: “Bata na murendele!” (1 Ates. 5:3) Vyonama vya viwanda vinaza vikala valivetene vailambwela moi vinoza vidimeeli-e athu anjinji. (Chiv. 16:13, 14) Nanga bwanji iyo vano? Kaninaza nipusi-iwa akala ‘ninasimikizela vyongo vyetene [kapena shisha] vyongo vyetene.’ (Welengani 1 Atesalonika 5:21.) Mawu Achigiriki anayo kaatapuleleathu ira ‘simikizela,’ ka-indi-ediwa chito vofotokoza ndila ineyo athu ka-indi-edaathu chito voshisha visulo vyantengo wavadimu. Eno, ninafuneela shisha vyevyo ninavwa iyo kapena viwelenga ira nisimikizele akala vili vyoona. Panga vyevi wali wofuneya vinjinji wa Akiristu a wu Tesalonika, moi unoza ukale wofuneya vinjinji wa iyo vevo chisauso ilukulu inaandamelaathu. M’malo mokedanga roromela vilivyetene, nino-indi-eda chito luso li-u loganiza ira nifwanafwani-ede vyevyo niwelengile iyo kapena vwa na vyevyo Baibulo koma teto gulu la Yehova linaongaathu. Napanganga vyevi, kaninaza nipusi-iwa na vyonama vya viwanda. — Miya. 14:15; 1 Tim. 4:1.

16. Kodi nin’na idedi-edo yosimikizeleya iivi, nanga nili osimikiza panga n’ni?

¹⁶ Monga gulu, atumiki a Mulungu kanoza kavulumuwe va chisauso ilukulu. Komave, uliwetene vaeka kanaiziwa vya mechelo. (Yak. 4:14) Koma teto kaya ninaza nikala nangan’na moyo vathawiyo kapena ninaza nikala nangakhwile, ninoza niva-iwe mphoto ya moyo o-omala akala ninakaleve ororomeleya. Ozoziwa kanaza kakala na Kiristu udimu. A khosa dimo-i kanaza kakala m’Paradaiso vailambo yavati. Tiyemoni etene iyene niganizelenga vinjinji vya idedi-edo yi-u yosangalasela koma teto pitiliza kozeela dambo la Yehova.