Mu-indenga Chito Yolaleela Mwatindi Ngati Yesu

1. Kodi chiyongo iivi ineyo ina-iyani-a atumiki a Yehova na athu amo-iwa?

YONGO ineyo ina-iyani-a atumiki a Yehova na athu anayo kanaonga ira mba Akristu, ti tindia lelo kanatonyi-edaathu va chito yolaleela. (Tito 2:14) Thawi dimo-i munokoza onanga ira chito yolaleela kinausangalasani. Mwina thawi dimo-i munokoza vivwa ngati mwemo mwavwela liye ndimuwa m’mo-iwa unoyo ali watindi. Liye aongile ira: “Thawi dimo-i ndinakeda ona ira kandinafuna laleela.”

2. Kodi pivyongo viivi vyevyo thawi dimo-i vinanipangi-e ira kanisangalalenga na chito yolaleela?

² Mwina munokoza sangalalanga panga mautumiki amo-i iyana no-inda chito yolaleela. Chifukwa n’ni ninaonga eno? Ninaonga eno chifukwa na-indanga chito yomanga nosakaeda nyumba da mugululi, no-indana chito yopeleka likami-edo vangozi koma teto limbikisa abali, ninokoza onanga mombaraanya vyo-arelavo viwa. Ninoona murendele na chikondi na-indanga chito na abali-u moi ninoiziwa ira kanoyamikela vyevyo ninapanga iyo. Koma thawi dimo-i ninokoza laleelanga gawo limo-ive lelo wa chaka dinjinji koma oofwanya athu achidwi kapena teto ninokoza gumana na athu anayo kanakoonda uthengi-u. Ninoiziwa teto ira vevo mapeto kanaandamelaathu athu anjinji kanerenga runi-a uthengi-u. (Mat. 10:22) Ndiye kodi chin’ni inanikami-e ira nipitilizeve omeliwana chito yolaleela koma teto i-inda mwatindi?

3. Kodi lemba la Luka 13:6-9 linatonyi-eda avi tindi lelo Yesu an’na liye?

³ Ganizela isazo ya Yesu unokoza nikami-a ira nipangenga tindi va chito yolaleela. Angali va ilambo yavati liye ka-iile inda chito mwatindi. Moi oopitiliza panga tindi mpakana umapeto wautumikae. (Welengani Luka 13:6-9.) Yesu ali ngati wosamalela munda wa mpesa unoyo asamalela tengo wa nkuyu wa chaka taaru koma tengoyo kuva-a vipaso. Yesu oolaleela wa a Yuda wa chaka dotamangela taaru koma anjinji mwa aluwa katavuruwana uthengae. Komave Yesu ka-iile laleela. Liye oopanga vyongo mofwanafwana na osamalela mundole unoyo ka-iile usamalela tengoyo, moi liye oodedi-edela ira thawi imo-i unoza uva-e vipaso. Yesu oowenjedela panga tindi vofuna akami-a Ayudayo ira karoromele uthenga wapama.

4. Kodi pivyongo 4 viivi vyevyo ninakambilane iyo mukhanila vyokuza Yesu?

⁴ Mukhanila ninokambilana mwemo Yesu mwatonyi-edele liye tindi simbwasimbwa va medi 6 dogomi-eda da utumikae. Kambilana vyevyo afunji-ile liye koma teto vyapanga liye, unokoza nikami-a ira na-iyene nipitilize panga tindi malambwano. Ninoona mwemo ninamusazi-edele iyo m’mbali 4 di: (1) Liye ooganizela vinjinji vyopanga ifunelo ya Yehova, (2) oopanga chidwi na maulosi, (3) oororomela Yehova ira unomukami-a, koma teto ya (4) oororomela ira athu amo-i kanomuvuruwana.

OOGANIZELA VYEVYO YEHOVA UNAFUNA LIYE

5. Kodi Yesu atonyi-edile avi ira panga ifunelo ya Mulungu kofuneya?

⁵ Yesu oolaleela mwatindi “uthenga wapama wa Umwene” chifukwa ooiziwa ira pivyevyo Mulungu unafuna liye ira apange. (Luka 4:43) Yesu oona ira chito yolaleela yali yofuneya vinjinji vamoywae. Ngakale umapeto wa utumikae, liye ooenda “m’mizinda na m’mavande” nofunji-a athu. (Luka 13:22) Oofunji-a teto ofunjeda anjinji ira ka-indengana chito yolaleela. — Luka 10:1.

6. Kodi vali gwilizana woi avi vaari volaleela na chito dimo-i dedo dinaireya mugululi? (Onani teto ithuzithuzi.)

⁶ Malambwano teto, laleela uthenga wapama chichito ilukulu ineyo Yehova na Yesu kanafunaathu ira nii-indenga. (Mat. 24:14; 28:19, 20) Vikala gwilizana vaari va chito yolaleela na mautumiki amo-iwa a mu gulu la Mulungu. Mwaisazo, ninomanga nyumba da Umwene kapena tumikela va Beteli vokami-a va chito yolaleela. Nino-inda chito yopeleka likami-edo wa abali na arongola vaireya ngozi vofuna akami-a ira kaambeele teto panga vyongo vyokuza lambela vyevyo vinatangani-avo indana chito yolaleela. Nazindikila funeya wa chito yolaleela koma teto umbuwela ira chichito ilukulu ineyo Yehova unafuna liye ira nii-indenga, ninolimbikisiwa inda chito inela thawi detene. Ndimuwa m’mo-iwa wau Hungary zina lae János aongile ira: “Ndinoviumbucha ira kavali chito iliyetene mugululi ineyo inavolowe m’malo mwa chito yolaleela, moi chito inela chiyofuneya vinjinji.”

7. Chifukwa n’ni Yehova unafuna ira nipitilize laleela? (1 Timoteyu 2:3, 4)

⁷ Ninokoza pitiliza panga tindi va utumiki-u naonanga athu ngati mwemo Yehova unaaonela liye. Liye unafuna ira athu anjinji kavwe uthenga wapama nokala atumikae. (Welengani 1 Timoteyu 2:3, 4.) Eno unonifunji-a mwemo nina-indele iyo pama chito yofunji-a athu. Mwaisazo, borosha loi Mukondenga athu— Muwafunji-enga linoniva-a malangizo apama anayo kananikami-e ira nikambilanenga na athu nayolinga yowakami-a ira kakale ofunjeda a Yesu. Ngakale athu katinavuruwane vathawiila, mwina kanoza kakaena mwai wofunjeda vya Yehova muwari mwa isauso ilukulu mapeto kaanafiye. Mwina kanoza kaumbuwele vyevyo ninaawandela iyo vathawiila nowambeela funa tumikela Yehova. Moi vyevi vinokoza andeya akala ninapitilize laleela.

OOPANGA CHIDWI NA MAULOSI A M’BAIBULO

8. Kodi iziwa maulosi wamukami-ile avi Yesu iziwa mwemo una-indi-edele liye chito pama thawae?

⁸ Yesu ooiziwa mwemo maulosi amo-i a m’Baibulo kanazeathu kakwakwaneli-ediwe. (Dan. 9:26, 27) Liye ooiziwa ira unaza akeda panga utumikae wachaka taaru na hafu. (Luka 18:31-34) Ooiziwa teto vyevyo maulosi kaongileathu vyokuza mwemo unaze liye akhwele koma teto thawiwa. Vyevi vyoomukami-a ira a-indi-ede chito pama thawae. Eno oolaleela mwatindi nayolinga yoi amari-e chito ineyo ava-iwe liye.

9. Kodi maulosi a m’Baibulo kananilimbikisa avi ira nilaleelenga mwatindi?

⁹ Vwechecha maulosi a m’Baibulo unokoza nikami-a ira nilaleelenga mwatindi. Ninoiziwa ira vyoireya koma teto ikalelo ya athu malambwano pivyevyo Baibulo laongileathu ira vinoza viireye m’malambo omari-a. Ninoiziwa teto ira ndunyanandunyana wewo ulivo vaari va ulamulilo wakopolo vailambo yetene wa Britain na America koma teto ilambo ya Russia na vilambo vimo-i vyogwilizanana, vinana kwakwaneli-eda ulosi woonga vya mwene waumpoto na mwene waum’mwela “muthawi yamapetwela.” (Dan. 11:40) Ninovwechecha teto ira ulamulilo wa Britain na America unaimeleliwa namanyalo aifwanafwani-edo yoromoliwa va Daniyeli 2:43-45. Kaninakaikela ira mofwanafwana na mwemo ulosila wafotokozeleathu, vachineneeva Umwene wa Mulungu unoononga maboma aathu. Maulosi etene anala kanonikami-a iziwa thawi ineyo ilivo moi kanonilimbikisa ira nilaleelenga mwatindi.

10. Kodi maulosi a m’Baibulo kananilimbikisa mundila dimo-i diivi ira nilaleelenga mwatindi?

¹⁰ Maulosi a m’Baibulo kokaana uthenga wapama unoyo ninafuneela iyo wandela athu amoi-wa. Murongola m’mo-iwa wau Dominican Republic, zina lae Carrie, aongile ira: “Malonjezo osangalasa a Yehova oonga vya sogolo lapama kanondilimbikisa ira ndiwandelenga amo-iwa uthenga wapama.” Liye oowenjedela teto ira: “Ndaonanga mavuto anayo athu kanagumananaathu malambwano ndinozindikila ira malonjezo anala katinakuza miyo meka, koma kanokuza teto aluwa.” Maulosi a m’Baibulo kanonilimbikisa ira nipitilizeve inda chito yolaleela chifukwa ninoiziwa ira Yehova ngunoyo unanikami-a. Leila, unoyo unakala wu Hungary aongile ira: “Lemba la Yesaya 11:6-9 linondilimbikisa ira ndilaleelenga uthenga wapama ngakale wa athu anayo kanaoneya ngati katinavuruwane. Ndinoiziwa ira uliwetene unokoza chenja akala unakami-iwa na Yehova.” M’bali m’mo-iwa wau Zambia, zina lae Christopher, aongile ira: “Mogwilizana na lemba la Maliko 13:10, uthenga wapama unana laleeliwa va ilambo yetene moi ndinoona ira ngu mwai ulukulu kwakwaneli-edana ulosi unola.” Kodi mba maulosi a m’Baibulo aavi anayo kanaulimbikisani nyo ira mupitilize laleela?

OOROROMELA IRA YEHOVA UNOZA AMUKAMI-E

11. Chifukwa n’ni Yesu afuneya muroromela Yehova ira unerenga mukami-a ira apitilize laleela mwatindi? (Luka 12:49, 53)

¹¹ Yesu oororomela ira Yehova unerenga mukami-a ira apitilize laleela mwatindi. Ngakale ira Yesu ali waluso, ooiziwa ira athu kanoza kalunduwe chifukwa ya uthenga wapama wa Umwene koma teto pangi-a ira aruni-iwenga vinjinji. (Welengani Luka 12:49, 53.) Eno chifukwa yoi oo-inda chito yolaleela, asogoleli aipembezo kooidana na liye moi moweli-edaweli-eda koofuna mupha. (Yoh. 8:59; 10:31, 39) Komave liye oopitiliza laleela chifukwa ooiziwa ira Yehova ali na liye. Liye aongile ira: “Liye kandi-iile meka chifukwa ndinopanga vyongo vyevyo vinamusangalasa thawi detene. . . . .” — Yoh. 8:16, 29.

12. Kodi Yesu aakozeeli-ede avi ofunjedae ira kapitilizeve laleela ngakale vevo karuni-iwaathu?

¹² Yesu oowaumbucha ofunjedae ira karoromelenga ira Yehova unoza aakami-e. Moweli-edaweli-eda, liye oowasimikizela ira Yehova unoza aakami-e ngakale vevo kanazuzumi-iwaathu. (Mat. 10:18-20; Luka 12:11, 12) Eno oowalimbikisa ira kakalenga osamala. (Mat. 10:16; Luka 10:3) Oowalangiza teto ira katikanyi-edenga athu anayo katinafuna vuruwana. (Luka 10:10, 11) Oowawandela teto ira katawenga athu amo-iwa kaazuzumi-anga. (Mat. 10:23) Ngakale ira Yesu ali watindi koma teto oororomela Yehova, kaapanga mwadala vyongo vyevyo vya-ele moywae vangozi.— Yoh. 11:53, 54.

13. Chifukwa n’ni kaninafuneya kaikela ira Yehova unoza anikami-e?

¹³ Malambwano ninofuneya teto ira Yehova anikami-enga ira nilaleelenga mwatindi ngakale vevo ninaruni-iwa iyo. (Chiv. 12:17) Chifukwa n’ni kaninafuneya kaikela ira Yehova unoza anikami-e? Kaganizelani pempelo la Yesu lelo linafwanyeya va Yohani chaputala 17. Yesu oovepa Yehova ira aing’anelenga anamarumiwae, moi Yehova oosomeda pempeloli. M’buku la vyoira linofotokoza mwemo Yehova mwakami-ele liye anamarumiwa ira kalaleelenga mwatindi ngakale vevo kazuzumi-iwaathu. M’pempelo lae, Yesu oovepa teto Yehova ira aing’anelenga athu anayo kanavuruwane uthenga unoyo anamarumiwa kalaleelaathu. Athu anala kanotangani-avo teto nyo. Yehova ka-iile someda pempelo la Yesu. Liye unoza aukami-eni teto nyo ngati mwemo mwakami-ele liye anamarumiwa. — Yoh. 17:11, 15, 20.

14. Kodi ninaiziwa avi ira ninokoza pitilizave laleela mwatindi? (Onani teto ithuzithuzi.)

¹⁴ Vevo mapeto kanaandamelaathu, thawi dimo-i vinokala vyorucha laleela uthenga wapama mwatindi. Ngakale vili eno, ninokoza fwanya likami-edo lelo ninafuneela iyo. (Luka 21:12-15) Mofwanafwana na Yesu na ofunjedae, ninowalola athu sakula ekiwa akala kanafuna vuruwana kapena naari moi ninopewa akanyi-eda. Ngakale muvilambo mwemo chitwi-u chiyoruni-iwa, abali-u kanopitiliza laleelave uthenga wapama chifukwa kanororomela Yehova ookala kopolo diwa. Mofwanafwana na mwemo Yehova mwapelekele liye kopolo wa atumikae muthawi ya anamarumiwa, malambwano teto unoniva-a kopolo ira nipitilize inda chito yolaleela mombaraanya mogwilizana na vyevyo unafuna liye. (2 Tim. 4:17) Eno kamunafuneya kaikela ira mwaroromelanga Yehova munoza mupitilizeve laleela mwatindi.

OOROROMELA IRA ATHU AMO-I KANOZA KAVURUWANE

15. Kodi chin’ni inatonyi-eda ira Yesu oororomela ira athu kanoza kavuruwane uthengae?

¹⁵ Yesu kaakaikela ira athu amo-i kanoza kavuruwane uthenga wapama. Vyevi vyoomukami-a ira asangalalenga na utumikae. Mwaisazo, umapeto wachaka ya 30 C.E., Yesu oona ira athu anjinji kali okozeya ira kavuruwane uthenga wapama moi oowaerekezela na munda unoyo mbewu diwa diwaraalile. (Yoh. 4:35) Vangavirile chaka imo-i liye oowawandela ofunjedae ira: “Vikala vyongo vinjinji vyofuneya anda.” (Mat. 9:37, 38) Va-anavire thawi indendai ooweli-eda teto ira: “Vikala vyongo vinjinji vyofuneya anda. . . vepani mwinyailo wamunda ira atumize achito ira kadowe wo-anda.” (Luka 10:2) Yesu ka-iile roromela ira athu kanoza kavuruwane uthenga wapama moi oosangalala aluwa kavuruwananga. — Luka 10:21.

16. Kodi mafanizo a Yesu katonyi-edile avi ira athu amo-i kanoza kavuruwane uthenga wapama? (Luka 13:18-21) (Onani teto ithuzithuzi.)

¹⁶ Yesu oofunji-a o-arelae ira kaonengave utenga unoyo kalaleelaathu kala wofuneya. Vyevi vyoowalimbikisa ira kapitilizeve panga tindi. Mwaisazo, tiyemoni nione mafanizo men’li anayo aafotokozile liye. (Welengani Luka 13:18-21.) Yesu oo-indi-eda chito kongolo ya mpilu vofuna funji-a ira uthenga wa Umwene unoza umwadeye modabwi-a moi kalivo unaze alepeli-e vyevyo. Koma teto oo-indi-eda chito yofufumi-a votonyi-eda mwemo uthenga wa Umwene unazeathu umwadeele nokami-a athu ira kachenje, ngakale ira chenjawo kunaoneele mombaraanya. Vyo-arelavo viwa Yesu ookami-a ofunjedae iziwa ira uthenga unoyo kanalaleelaathu unoza ukami-e athu anjinji.

17. Kodi nin’na vifukwa viivi vyonipangi-a pitiliza inda chito yolaleela?

¹⁷ Ninolimbikisiwa indana chito yolaleela mwatindi naonanga mwemo inakami-elaathu athu vailambo yetene. Chaka ilietene, athu mamilioni anjinji kanofiya va Chikumbuso koma teto kanowambeela funjeda Baibulo. Koma teto athu amo-iwa masauzande anjinji kanobatiziwa nowambeela indana chito yolaleela. Kaninaiziwa ira mbaathu oinjiva moi avi anayo kanavuruwane uthengi-u, koma ninoiziwa ira Yehova unopitiliza sonkani-a khamu lilukulu lelo linaze livulumuwe va isauso ilukulu. (Chiv. 7:9, 14) Mwinyailo wamunda unoiziwave ira vikala chito ilukulu yo-anda, eno nikaana vifukwa vyonipangi-a pitiliza laleela.

18. Kodi ninafuna ira athu amo-iwa kaniona kazindikilenga nin’ni?

¹⁸ Thawi detene ofunjeda a Yesu kooiziweya chifukwa ya tindi liwa lolaleela. Athu kaona limba murima wa anamarumiwa volaleela, “koozindikila ira kanaenda na Yesu.” (Vyo. 4:13) Na-iyene teto athu kaonanga limba murima wi-u volaleela kanozindikila ira ninamusazi-eda Yesu.