Ngakale Ira Ndali Muthu Onyaswa, Ndookala M’mishonale

Miyo ndabaluwe mu 1951, wu Vienna muilambo ya Austria, moi makolwanga kali a Ikatolika. Miyo ndali muthu onyaswa koma ndoororomela Mulungu teto ndoopempela vakwikwi vakwikwi. Ndangaana chaka 9, ababanga koambeela funjeda Baibulo na Mboni da Yehova moi vangavirile thawi yoeva am’manga teto naaluwene koowambeela funjeda Baibulo.

Vaanavire thawi indendai noowambeela sonkana mupingo wa Döbling wu Vienna. M’banja li-u noopangela limo-i vyongo vinjinji. Noowelenga koma teto funjeda Baibulo, fwanyeya va misonkano da pingo koma teto noovipeleka inda chito do-iyana-iyana va misonkhano yadela. Ambeela ndangali mwana, ababanga koondikami-a ira ndimuomeluwengana Yehova. Moi thawi detene koopempela ira miyo limo-i na dimbilanga nize nikale apainiya. Koma va thawi ineyo, inela kayali yolinganga.

NDOOWAMBEELA UTUMIKI WA THAWI DETENE

Ndabatiziwe mu 1965, ndangaana chaka 14. Komave vyoondirucha laleela wa athu oyi kandaaiziwa. Ndoolimbana teto na maganizo oviona ngati otita moi ndoofunechecha ira azombwe amo-iwa kandiomeluwengana. Eno vaanavire thawi indendai kumela vevo ndabatiziwe miyo, ndooambeela aleda na athu anayo katamutumikela Yehova. Ngakale ira ndoosangalala ndaaledanga na aluwa, ikumbumtimanga yoondivuti-a chifukwa thawi dinjinji ndakala na athu anayo kai a Mboni. Koma ngakale vyali eno vyoondirucha ira ndichenje. Ndiye kodi chin’ni ineyo yandikami-ile?

Va thawi ineyo murongola m’mo-iwa wa chaka 16 zina lae Dorothée ooambeela sonkana mupingwi-u. Ndoopanga chidwi na liye chifukwa ooiomeluwana chito yolaleela nyumba na nyumba. Miyo ndali ndimuwa kwaranya liye koma kandaiomeluwana vinjinji chito yolaleela. Ndiye ndooganiza ira: ‘Makolwanga mba Mboni, koma Dorothée abalae etene kai a Mboni. Unakala na am’mae anayo kanabulela, koma thawi detene unodowecha olaleela.’ Isazo yae yoondilimbikisa ira ndiambeele panga vinjinji vomutumikela Yehova. Vaanavire thawi indendai, miyo na Dorothée noowambeela upainiya. Voambeela napanga upainiya okami-a moi vanduli viwa noowambeela upainiya ogarateya. Chifukwa yoi Dorothée ooiomeluwa vinjinji chito yolaleela, na miyene teto ndoowambeela iomeluwana chitwela. Liye oondikami-a ira ndiambeeli-e phuzilo la Baibulo langa lowambeela. Vangavirile thawi ndooambeela kala omasuwa laleela wa athu mu nyumba diwa, laleela museu koma teto m’malo ofwanyeya athu anjinji.

Muchaka ineyo ndaambeele miyo upainiya, m’bali m’mo-iwa wau Austria ooza mupingo mwi-u. Zina lae ali Heinz moi oofunjeda choonadi vevo adowile liye wu Canada dowa aleda wa nchimwenae unoyo ali wa Mboni. Heinz ootumiziwa mupingwi-u wu Vienna ngati mpainiya wavadera. Ndangakede muona ndooambeela muomeluwana. Liye oofuna za panga umishonale koma miyo kandana yolinga inela. Eno vowambeela kandafunile ira aiziwe ira ndoomufuna. Komave vangavirile thawi nooambeela imweendi, vanduli viwa nootelana moi noopangela limo-i upainiya wu Austria.

NDOOWAMBEELA KAANA YOLINGA YOFUNA PANGA UMISHONALE

Thawi na thawi mamunanga Heinz oondiwandela vya yolingae yofuna za panga umishonale. Ngakale ira liye kaandikanyi-eda, oondifuka vyofuka vyolimbikisa monga vyoi: “Voi kanina a-ima, kodi kaninapange vinjinji vomutumikela Yehova?” Chifukwa yoi miyo vano ndili muthu onyaswa, ndoova kala m’mishonale. Pivyoona ira ndapanga upainiya, koma ndaganizela vya umishonale ndoova vinjinji. Komave Heinz oopitiliza ndikami-a moleza murima ira ndikaena yolinga inela. Oondikami-a teto ira ndiganizelenga vinjinji vyokami-a athu amo-iwa m’malo moganizelanga vinjinji vya miyo. Malangizwae koondikami-a vinjinji.

Vang’ono na vang’ono ndooambeela funa chito ya umishonale, eno noosaina ma fomu ofukedela sukulu ya Giliyadi. Koma mtumiki wa thambi oondiwandela ira ndifunjede onga Ingelezi. Vangavirile chaka taaru ndifunjedanga Ingelezi, noodabwa wachela kalata yoniwandela ira nidowe natumikelenga mu pingo waiongelo ya wu Yugoslavia unoyo wali wu Salzburg, wu Austria. Nootumikela mu gawo leli wa chaka 7 moi wa chaka imo-i nootumikela monga oing’anela dela. Iwongelo ya wewo yali yorucha koma nookaana maphuzilo a Baibulo anjinji.

Mu 1979, noovepiwa ira nidowe [naone malo muilambo ya] Bulgaria. Wewo chito yolaleela yali yoruni-iwa. Eno vathawi yetene ineyo nali iyo wewo kanalaleela. Komave nookwakwani-a tukula mabukwi-u ang’onong’ono anayo nadowile iyo ava-a arongola 5 anayo kakala mumzinda wa Sofia, wewo ku ulikulu la ilambwela. Ndoova vinjinji koma Yehova oondikami-a ira ndi-inde chito yosangalasela. Aona arongolala ira kali olimba murima koma teto ira kali osangalala ngakale ira kookoza mangiwa thawi iliyetene, oondikami-a ira ndipangenga vyetene vyevyo ndinawande miyo va utumiki uliwetene unoyo gulu la Yehova linandiva-eathu.

Vangavirile thawi noosaina teto mafomu ofukeda sukulu ya Giliyadi moi vathawi ila kooniitana. Nooganiza ira nadowa napangele maphuzilwala wu United States mu Ingelezi. Koma mu Novembala 1981, gulu looambeela teto kaana makalasi a sukulu inela wu thambi ya wu Wiesbaden, muilambo ya Germany. Eno nookaana mwai oitaniwa ira nidowe napangele maphuzilo anala muiongelo ya Igeremani, ineyo kayali yorucha wa miyo. Koma kodi vanduli viwa natumiziwe waani?

NOOTUMIZIWA IRA NATUMIKELENGA MUILAMBO INEYO MWAIREYA KONDO

Nootumiziwa ira nidowe natumikelenga muilambo ya Kenya. Koma ofesi ya thambi ya wu Kenya yoonivepa ira akala ninaomeluwe nidowe natumikelenga muilambo yoandamanana ya Uganda. Chaka dokwaranya 10 mundulimu, asilikali kali kangawakile boma mosogoleliwa na ndimuwa wa kondo zina lae Idi Amin. Muchaka do-arela, ulamulilwae wakhaza oopangi-a ira athu anjinji kaphiwe koma teto mamilioni anjinji kavuteyenga. Eno mu 1979, adanae a Idi Amin koomutamangi-a muilabweyo nomali-a ulamulilwae. Ndiye va mwina munokoza vwechecha chifukwa iwa ndaova dowa tumikela muilambo ineyo mwali kondo. Koma sukulu ya Giliyadi yoonikozeeli-a ira nimuroromelenga vinjinji Yehova. Eno noosomedela dowa.

Moyo wawu Uganda wali orucha vinjinji. M’buku lavachaka la 2010, Heinz oofotokoza mwemo moyo waliliathu. Liye aongile ira: “Vyongo vinjinji, . . . vyoosokonezeya. Maendelo kali orucha teto ma-inje kali osauweleya. . . . Athu kakeda ombelana, ookala umbava koma teto vyongo vyachiwawa vyooireya valivetene ma-iyu. . . . Uliwetene akeda kala m’mba, moi ma-iyu athu kakeda pemphela ira bola unde uche.” Ngakale ira vookala mavuto etene anala, abali na arongola amuilambwela koomutumikela Yehova mosangalala.

Mu 1982, miyo na Heinz noofiya muzinda wa Kampala, wewo ku ulikulu la ilambo ya Uganda. Medi 5 doambeela nakala wu nyumba ya Sam na Christina Waiswa, anayo kakala na a-imiwa 5 koma teto abaliwa 4. Banja la Waiswa ladja ndila imo-i vadambo moi vyali vyopangi-a chidwi ira kooniwachela. Va thawi ineyo miyo na Heinz nakala iyo wa Waiswa, noofunjeda vyongo vinjinji vyevyo vyanikami-ile va utumiki-u wa umishonale. Mwaisazo, noofunjeda indi-eda chito ma-inje oyeva vo-amba koma teto u-wa uchumbuzi vo-indi-eda chito ma-inje ochapela. Mu 1983, miyo na Heinz noofwanya nyumba mudela limo-i liwa lotetezeya vang’ono wu Kampala.

Noosangalala vinjinji na chito yolaleela. Ndinoumbuwela ira mwedi umo-i noogawela magazini okwaranya 4,000. Chifukwa athu a wewo koonisangalasa vinjinji. Aluwa koomulemekeza vinjinji Mulungu teto koomeluwa kambilana khani da m’Baibulo. miyo na mamunanga Heinz, uliwetene ookaana maphuzilo a Baibulo 10 kapena 15. Moi noofunjeda vinjinji wa athu anayo naafunji-a iyo. Mwaisazo, mulungu uliwetene aluwa kooenda wavati voza umisonkano koma katadandaula moi kooteelela thawi detene.

Mu 1985 na mu 1986, wu Uganda ooireya teto kondo maulendo amo-iwa men’li. Thawi dinjinji noona a-ima anayo ka-indi-ediwa chito ngati asilikali kangatukulile futi noimela m’malo anayo apolisi kanaimelaathu ka-indanga magalimoto. Va thawi ineyo noomuvepha Yehova ira aniva-e zelu koma teto anikami-e ira nikale athu ofaasa vevo nasaela iyo athu achidwi ira nialaleele. Yehova oosomeda mapemphelwi-u. Thawi dinjinji ova wi-u ooyeva nagumana na muthu unoyo afuna vuruwana uthenga wa Umwene.

Noosangalala teto laleela athu okumela muvilambo vimo-i. Mwaisazo, noofunjeda Baibulo na Murat na Dilbar Ibatullin, banja lelo lakumele wu Tatarstan wu Russia. Murat ali dokotala. Banjali looambeela choonadi moi likala litumikelanga Yehova mororomeleya mpakana vano. Vanduli viwa ndoogumana na muzimai m’mo-iwa wa wu Ukraine zina lae Tetjana Vileyska, unoyo an’na khawa vinjinji moi oofuna vipha. Liye angabatiziwe oowelela wu Ukraine moi oo-inda chito yotapulela mabukwi-u.a

NOOGUMANA NA MAVUTO AMO-IWA

Mu 1991 miyo na mamunanga Heinz nangali ovuma wu Austria, ofesi ya thambi yoonivepa ira nidowe natumikelenga wu Bulgaria. Ulamulilo wa chikomiyonizimu wangamalile mu vilambo vimo-iviwa wu Europe, a Mboni da Yehova koololiwa ira ka-indenga chito yolaleela wu Bulgaria. Monga ndafotokozele miyo, mundulimu miyo na Heinz noodowanao mabukwi-u mobisa va thawi ineyo chitwi-u yaliathu yoruni-iwa. Koma va thawi ila nootumiziwa ira nidowe natumikelenga wewo.

Noowandeliwa ira kaniwelele wu Uganda. Eno kanaweleleo dowa tukula vyongo vi-u mu nyumbi-u ya amishonale kapena dowa sazikana na afwi-u. M’malomwiwa noodowa wu Beteli ya wu Germany moi kooniva-a Galimoto vanduli vuwa noodowa wu Bulgaria. Noovepiwa ira nidowe nasonkhanenga limo-i na gulu la ofalisa la athu otamangela 20 wu Sofia.

Wu Bulgaria noogumana teto na mavuto amo-iwa. Yowambeela, kanaiziwa iwongelo ya wewo. Enjedela vevo, mabuku anayo kalivo mu iongelo ya wu Bulgaria kali Choonadi Chimene Chimatsogolera ku Moyo Wamuyaya na Buku Langa la Nkhani za M’Baibulo. Eno vyali vyorucha ira niambeele funjeda na athu. Koma ngakale vali mavuto anala, gulu li-u loomeluwa laleela vinjinji. Athu a chalichi ya Orthodox koona vyevi moi veva pavevo vaambeeleile mavuto anjinji.

Mu 1994, boma la muilambweyo loo-iya awona a Mboni da Yehova ngati ipembedzo yosomedeleya. Abali-u amo-iwa koomangiwa. Ofalisa khani koolemba vyonama vyokuza Mboni da Yehova. Aluwa koonga ira a Mboni da Yehova kanopha a-imiwa vokoonda ira kati-eliwe magazi koma teto kanolimbikisa Akristu afwiwa ira kaviphenga. Eno miyo na mamunanga Heinz vyoonirucha ira nilaleelenga. Thawi dinjinji nalaleelanga noogumana na athu auwali anayo kaniongela monyanyuwa, niitanela apolisi koma teto nivocha mabwe. Vyali vyorucha ira niwachelenga mabuku muilambwela moi panga lendi malo oyi nipangelengavo misonkano wali worucha. Thawi imo-iwa apolisi koosokoneza sonkanwi-u wachigawo. Miyo na mamunanga Heinz kanalemeele kala na athu ookaana chikondi ngati anala. Athwala kali o-iyana na athu a wu Uganda anayo kaomeluwa funjeda Baibulo. Ndiye kodi chin’ni ineyo yanikami-ile ira nilimbanenga na mavuto anala?

Aleda na abali na arongoli-u kuwewo wanikami-ile vinjinji. Aluwa koosangalala vinjinji ira koofwanya choonadi koma teto kooyamikela vyevyo napanga iyo vowakami-a. Abali na arongolala koogwilizana koma teto kookami-ana. Moi iyo noofunjeda ira ninokoza sangalalanga na utumiki uliwetene akala ninaomeluwana athu.

Koma vangavirile thawi vyongo vyoochenja. Mu 1998, gulu li-u loosomedeliwa na boma moi mabuku koowambeela tapuleliwa mu iwongelo ya Ibugariya. Mu 2004, woomangiwa ofesi ya thambi. Va thawi ila wu Bulgaria uli mipingo 57 koma teto ofalisa 2,953. Mu 2024, athu okwaranya 6,475 koofwanyeya va Chikumbuso. Va thawi imo-iwa wu Sofia wali arongola 5 okha, koma va thawiila uli mipingo 9. Niona ‘mung’onong’ono ainjivanga mpakana fiya athu 1,000.’— Yes. 60:22

MAVUTO OKUZA THANZI LI-U

Va moywanga ndikala ndigumanga na mavuto anjinji okuza thanzi. Va chaka diviriledi ndikala ndivuteyanga na vyozimba, tangani-avo yozimba ineyo yali m’muru. Ndoowachela likami-edo la mirombwe lakopolo lelo lapangi-ile ira yozimbeyo inyale. Koma teto ndoodowa wu chipatala ya wu India wewo ndapangiwe miyo opaleshoni ya maola 12, moi kookwakwani-a chosa mbali ilukulu ya yozimbeyo. Vanduli va opaleshoniyo nookala wu thambi ya wu India, moi ndangaambeele fwanyao pama noowelela wu utumiki-u wu Bulgaria.

Vaanavire thawi indendai, mamunanga Heinz ooambeela bulela marenda amo-iwene ailendo, anayo kapangi-a ira alepelenga onga ngakale teto enda. Vevo marendayo kaulukulaathu ndoofuneya ira ndimukami-enga va vyongo vinjinji. Thawi dinjinji ndookala ogoma koma teto ndookaana nkhawa ira mwina kandinawandenga musamalela. Koma muzombwe m’mo-iwa zina lae Bobi thawi dinjinji oomulanda Heinz adowanga olaleela. Bobi kaanyaswa na mwemo mamunanga Heinz mwaongela liye kapena teto chifukwa yoi oolepela enda. Thawi detene ndoororomela ira Bobi unondikami-a vathawi ineyo ndaona miyo ira kandinakwakwani-e musamalela mamunanga Heinz. Ngakale ira miyo na Heinz noosakula ira kanikaena a-ima, noona ira Yehova univa-a Bobi ngati mwani-u. — Maliko 10:29, 30.

Mamunanga Heinz oofwanyeya teto na marenda a khansa, moi pi vyovwi-a chisoni ira mamunanga oomeluwanola ookhwa mu 2015. Ndinomusauwela vinjinji mamunangola chifukwa ngu liye unoyo andikami-a ira kandikumbanyenga vinjinji, moi vyoondirucha vinjinji roromela ira liye kaliwo. Koma ndinomuganizela vinjinji moi wa miyo vinakala ngati liye uli moyo. (Luka 20:38) Dambo lililetene ndinoganizela mawu ooma murima anayo aonga liye wa miyo koma teto malangizo apama anayo andiva-a liye. Ndinoyamikela ira wa chaka dinjinji nootumikela limo-i Yehova mororomeleya.

NDINOMUYAMIKELA YEHOVA IRA UNONDIKAMI-A

Yehova undikami-a vilela maeselwanga etene. Liye oondikami-a ira ndilimbane na vuto langa lonyaswa lile nokala mmishonale owaomeluwana vinjinji athu. (2 Tim. 1:7) Ndinomuyamikela vinjinji Yehova ira miyo vano na ng’onong’onwanga nili mu utumiki wa thawi detene. Vathawiila liye na mamunae kanatumikela monga oing’anela dela moi kanatumikela m’mipingo da iwongelo ya Chisebia wu Europe. Yehova oosomeda mapemphelo a babanga anayo kapelekaathu nangali a-ima.

Funjeda Baibulo unondikami-a ira ndikaena murendele wa m’maganizo. Vevo ndigumanile miyo na mavuto, ndifunjeda pempela “na murimanga wetene” ngati mwemo Yesu mwapangela liye. (Luka 22:44) Ndila imo-i ineyo Yehova unasomedela liye mapempelwanga, ku zela mwa afwanga amu pingo wa Nadezhda Sofia, anayo kananditonyi-eda chikondi nooma murima. Aluwa kanondiitana ira naaledele limo-i moi thawi dinjinji kanondiyamikela, vyevi vinondipangi-a ira ndisangalalenga vinjinji.

Thawi dinjinji ndinoganizela vya idedi-edo yi-u yoi okhwa kanoza kavenye. M’maganizo mwanga, ndinoona makolwanga kangaimelile vasogolo va nyumbi-u, kaoneyanga oriya ngati mwemo kaoneelaathu kangakede telana wene. Ndinomuona dimbilanga aphiyanga yodja. Ndinomuona teto mamunanga Heinz angaimelile vakwikwi na hatchae. Ganizela vyevi unondikami-a ira kandikaena nkhawa moi ndinomuyamikela vinjinji Yehova.

Ndaganizela vyevyo Yehova undipangele liye vamoywanga koma teto vyevyo unaembekezela liye ndipangela usogolo, ndinovivwa ngati Davide, unoyo va Salimo 27:13, 14 aongile ira: “Kodi ndakale waani aakale ira kandina irorormelo yoi ndinoza ndione upama wa athu a Yehova muilambo ya athu amoyo? Embekezela Yehova. Limba murima moi upange vyongo mwakopolo. Ee, embekezela Yehova.”