Yehova Oonikami-a ‘Ulukula Valivetene Vevo Nazaliwa iyo’

Banja la Kassholms loovolowa sukula ya Giliyadi mu 1979, moi va chaka detene dedi aluwa kookala “kazaliwanga,” kapena dowa tumikela vilambo vimo-i monga Iran, Zaire, Uganda, Tanzania, Mauritius, na Myanmar. Aluwa kangali wu Giliyadi, m’bali Jack Redford unoyo ali mulangiziwa oopeleka malangizo anayo kakalile kaakami-anga va thawi yetene ineyo kakalileathu “kazaliwanga,” “duliwa,” “nozaliwa” teto ndila dinjinji. Tiyemoni nialole ira kanifotokozele ekiwa vyevyo vyaireile.

A Mats, yowambeela niwandeleni mwemo mwafunjedele nyo choonadi.

Mats: Va thawi yakondo yanambiili, ababanga kakala wu Poland moi koona vyachinyengo vyevyo Chalichi ya Ikatolika yapangaathu. koma aluwa koonga ira, “Vinaoneya ira choonadi ikalavo ndithu.” Vangavirile thawi ndoosimikizela ira choonadi ikalavo. Ndoogula mabuku anjinji awale moi limo-i lali la tundu wa buluwi la muru oyi Choonadi Ineyo Inasogolela wu Moyo Oomala. Murula oondisangalasa moi ndooliwelenga ma-iyu etene. Vofiya mamawa ndoosimikizela ira ndifwanya choonadi.

Ambeela mu Epulo 1972, ndoowelenga mabuku anjinji a Mboni da Yehova moi ndoofwanya vyosomeda vya vyofuka vyevyo ndan’na miyo. Ndoovwa ngati wa malonda wa m’fanizo la Yesu unoyo afwanyile ngale, liye angafwanyile ngaleyo ooguli-a iliyetene ira adowe aigule. Namiyene teto ndoo-iya mapulananga etene odowa wu yunivesite ira ndapange maphuzilo awu dokotala nayolinga yoi ndidowe ndagule ngale ineyo ndafwanyile miyo. (Mat. 13:45, 46) Eno ndoobatiziwa va 10 Dizembala mu 1972.

Chaka ineyo, makolwanga limo-i nachimwenanga koofunjeda choonadi moi koobatiziwa . Mu Julayi 1973, ndoowambeela utumiki wa thawi detene. Ann Catrin ali m’mo-i mwa apainiya atindi mu pingo mwi-u. Liye ali oriya moi oomuomeluwana vinjinji Yehova. Noowambeela omeluwana moi nootelana mu 1975. Va chaka 4 do-arela nakala mu tauni yoria ya Strömsundwu Sweden wewo athwiwa kapanga chidwi na uthenga wa m’Baibulo.

Ann-Catrin: Ababanga koofunjeda choonadi kanga-alile vang’ono mari-a maphuzilwiwa awu yunivesite awu Stockholm. Va thawi inela ndana medi diralu koma aluwa koondilanda kadowanga umisonkano koma teto kadowanga olaleela. Am’manga katasangalala na vyevi moi kooesaesa ira kafwanye vyevyo a Mboni da Yehova kanalakwiaathu, koma katavifwanyile. Eno vangavirile thawi naaluwene teto koobatiziwa. Miyo ndoobatiziwa ndangaana chaka 13 moi ndoowambeela upainiya ndangaana chaka 16. Ndoodowa wu Umeå wewo wafuneya olaleela anjinji, moi vanduli viwa ndookala mpainiya wavadela.

Nangatelanile na Mats, noowakami-a athu anjinji funjeda choonadi tangani-avo sikana m’mo-iwa zina laye Maivor unoyo ali kaswili opanga masika amo-iwene. Liye oololela iya panga masikayo nayolinga yoi apangenga vinjinji vomutumikela Yehova, moi apanga upainiya limo-i na ng’onong’onwanga. Aluwa koovolowa sukulu ya Giliyadi mu 1984 moi mba amishonale wu Ecuador.

Muvilambo vyetene vyevyo mukalile nyo mutumikelanga, kodi mwa-arela avi malangizo oyi “muulukulenga vevo muzaliwenyo”?

Mats: Utumiki-u ukala uchenjachenjanga. Koma nooesaesa ulukula mwauzimu, mwa Kristu vomusazi-eda kala oviyevi-a. (Akol. 2:6, 7) Mwaisazo, m’malo moembekezela ira abali na arongola kachenje, nooesaesa iziwa chifukwa iwa kanapanga vyongo mundila imo-iwene. Noofunechecha vwechecha mwemo kanaganizelaathu koma teto ikalelwiwa. Naesaesanga musazi-eda Yesu, noona ira nizaliwa m’bali mwangalande dama-inje ira niulukule pama uliwetene wewo kananitumizeathu. — Sal. 1:2, 3.

Ann-Catrin: Tengo waduleliwa unofuneela zuwa ira uulukule, eno Yehova uli ngati ‘zuwa’ wa iyo. (Sal. 84:11) Liye ooniva-a abali na arongola achikondi. Mwaisazo, nangali mupingo ung’onong’ono wu Tehran, Iran, aluwa kooniwachela pama koma teto niva-a vyongo. Vyevi vyooniumbucha mwemo athu kawachelanelaathu mu thawi da m’Baibulo. Noomeluwa kalave wu Iran koma mu Julayi 1980, boma looruni-a chitwi-u muilambweyo moi noowandeliwa ira nivenyemo vaanavire maola 48. Eno nootumiziwa wu Zaire (vathawiila unaromoliwa ira wu Congo) wu Africa.

Ndangavwile ira ninadowa natumukelenga wu Africa, ndooula. Ndangavwile vyoi wu Africa ukala nyowa koma teto marenda ndoova vinjinji. Koma afwi-u amo-iwa anayo katumikeleo wa thawi indendai kooniwandela ira: “Kamuove nyo kamunadowewo wu Africa koma ninoiziwa ira mwadowao munosangalala.” Moi abalala kaonga vyoona. Abali na arongola awewo mbosangalala koma teto achikondi. Moi vanduli va chaka 6, chitwi-u yangaruni-iwe noniwandela ira nivenyemo muilambweyo, ndooteya chifukwa ndoozindikila ira vathawiila ndamuvepa Yehova ira, “Choonde nikami-eni kanivenyewo wu Zaire.”

Pivyongo viivi vyevyo musangalalilena nyo va chaka detene dedi?

Mats: Noowambeela gwilizana na amishonale okumela mu vilambo vyo-iyana-iyana. Muvilambo vimo-iviwa noofunjeda na athu anjinji moi muthu m’mo-i ookwakwani-a kaana maphuzilo a Baibulo 20. Abali awu Africa kanowachela pama alendo moi kandinaza ndidiwala. Naendelanga mipingo wu Tanzania, afwi-u kooniva-a vyongo vinjinji ngakale ira kookaana vyongo vyoyeva. Koonizelana vyongo vagalimotwi-u ineyo naimecha iyo vambali va nyumba diwa. Galimotweyo yali ngati subi li-u. (2 Akor. 8:3) Thawi imo-iwa yosangalasa yakala vevo miyo na Ann-Catrin nawandelana iyo vyevyo viireile dambo letene moi noomutokoza Yehova chifukwa yokala na iyo.

Ann-Catrin: Wa miyo, ineyo inandisangalasa kuiziwana na abali na arongola amuvilambo vyo-iyana-iyana. Noofunjeda vikalelo vyo-iyana-iyana koma teto viongelo monga Farsi, French, Luganda, na Swahili. Noofunjeda na athu asha, noofwanya afwi-u asha koma teto noo-inda chito mogwilizana votumikela Yehova.— Zef. 3:9.

Nikala teto nionanga vyongo vyoriya vyevyo Yehova alengile liye. Utumiki-u wachenja, nakeda vivwa ngati nili va ulendo odowa ona malo, moi Yehova ngunoyo unanisogolela. Ninokoza onga ira Yehova unioni-a vyongo vyevyo kanakwakwani-e viona vaeki-u.

Kodi mugumanile na mavuto oyi avi, nanga chin’ni ineyo yaukami-ileni vilela?

Mats: Thawi dimo-i noobulela marenda o-iyana-iyana tangani-avo malungo, moi Ann-Catrin koomupanga upaleshoni maulendo angasene. Nookumbanyela teto makolwi-u okalamba, koma ninowayamikela abali-u anayo kawasamalela. Aluwa koowasamalela mwachikondi koma teto moleza murima. (1 Tim. 5:4) Komave thawi dimo-i noovuteya na maganizo oona ira nookoza panga vinjinji vowakami-a nangali vakwikwi.

Ann-Catrin: Mu 1983, nitumikelanga wu Zaire, ndoobulela marenda akolela. Dokotala oomuwandela Mats ira, “Muesaese venyawo wuno peeno.” Dambo lo-arela, noovenyi-ana nodowa wu Sweden va ndege yotukula katundu chifukwa chiyoka ineyo yalivo.

Mats: Noona ngati utumiki-u umalele vevo eno nooula vinjinji. Mo-iyana na vyevyo dokotalole aongile liye, Ann-Catrin oochila. Moi chaka yo-arela noowelela wu Zaire, va thawi inela nootumiziwa mupingo ung’onong’ono wa Chiswahili wu Lubumbashi.

Ann-Catrin: Nitumikelanga wu Lubumbashi, ndookala oembekezela koma vanduli viwa ndoovira vachabe. Ngakale ira kanaembekezela kaana a-ima, vyevi vyoonivoreya vinjinji. Koma vathawi yorucha vinjinjila, Yehova ooniva-a mphaso imo-i ineyo kanaiyembekezela. Noowambeeli-a maphuzilo a Baibulo anjinji moi vaanavire chaka, ofalisa kooenjedeleya kuma va 35 fiya va 70 koma teto osonkana kooenjedeleya kuma va 40 fiya va 220. Nootanganisiwa vinjinji muutumiki moi Yehova oodalisa tindi li-u, vyevyo vyanikami-ile ira nisangalalenga. Komave thawi na thawi ninoganizela koma teto kambilana vyokuza mwani-u moi ninodedi-edela za wona mwemo Yehova munaze liye mumali-ele chisoni-u.

Mats: Va thawi imo-iwa, Ann-Catrin oovuteya na nkhawa. moi miyo koondifwanyana khansa eno ndoofuneya pangiwa upaleshoni ilukulu. Va thawiila ndili pama, moi naliyene Ann-Catrin unopanga vyevyo unawande liye vomutumikela Yehova.

Va thawiila ndizindikila ira iyo kanili eki-u anayo ninagumana na mavuto. Vanduli va khondo ilukulu ya mu 1994 wu Rwanda, noodowa endela abali na arongola anayo kali umalo osungelao athu othawa khondo. Nangaonile iroromelo iwa, vilela uwa koma teto kaana murima ofuna kami-a athu amo-i, noona ira Yehova unosamalela athwae va mavuto alietene.— Sal. 55:22.

Ann-Catrin: Noogumana teto na vuto limo-i liwa lilukulu mu 2007, nikumelanga umwambo wo-ulela ofesi ya thambi ya wu Uganda. Nawelela wu Nairobi wu Kenya moi nalivo amishonale na abali ava Beteli otamangela 25. Naanafiye m’malile a ilambo ya Kenya minibasi imo-iwa yoomba basi-u. Diraiva na athu amo-iwa 5 kookwela vevo, moi murongola m’mo-iwa ookwela uchipatala. Ninolakalaka vinjinji za onana na afwi-u anala. — Yobu 14:13-15.

Vang’ono na vang’ono mabalanga koowambeela chila. Koma miyo na Mats nali mugulu la athu anayo kavuteile vinjinji chifukwa yangoziyo. Miyo ndoovuteya na nkhawa simbwasimbwa ma-iyu. Ndoolepela gona moi ndoovwa vizindikilo vya murima. Vyali vyoopi-a vinjinji koma pempela kumela vati vamurima koma teto welenga mavesi anayo ndaaomeluwana miyo, oondikami-a ira ndivwengao pama. Noowachela teto likami-edo kumela wa madokotala anayo kanaiziwa pama vya marenda ankhawa. Va thawiila kaninakala teto na nkhawa vinjinji moi ninopitilizave muvepa Yehova ira akami-enga koma teto limbikisa afwi-u anayo kanavuteyave na nkhawa.

Vofotokoza mwemo mwavilelile nyo, moonga ira Yehova oowutukulani “ngati mabonje.” Kodi munatapulela n’ni?

Mats: Vikala mawu amu Chiswahili anayo kanaonga ira “Tumebebwa kama mayai mabichi,” kapena ira “Nootukuliwa ngati mabonje.” Mofwanafwana namwemo muthu munatukulela liye mabonje mosamala, Yehova ukala anikami-anga moona murima va utumiki-u uliwetene. Thawi detene kanisauwelevo yongo ilietene. Yehova ukala teto anitonyi-edanga chikondi nonikami-a zela mwa abali a m’Bungwe lolamulela anayo kakalile kapanganga na iyo vyongo mooma murima.

Ann-Catrin: Ndinafuna ndifotokoze isazo imo-i yotonyi-eda mwemo Yehova mukalile liye anikami-anga. Dambo limo-i ndooimbeliwa foni yondiwandela ira ababanga kanaabulela moi kali uchipatali ya wu Sweden. A Mats kali kangakede chila wene wu marenda a malungo, koma teto kanaana ndalama dogwelela ndege. Eno nooganiza vyoi niguli-e galimotwi-u. Vanduli viwa ndooimbeliwa mafoni meeli. Imo-iwa yali yokumela wu banja limo-i lelo langaiziwile vya vuto li-uli loonilivelela ndalama dogwelela ndege. Ndooimbeliwa teto na murongola m’mo-iwa okalamba unoyo asunga ndalama m’bokosi laye lelo alembile liye ira “Wa anayo kanafuneya likami-edo.” M’maminisi oyeva, Yehova oopangi-a ira ulendwi-u uwandeye. — Aheb. 13:6.

Kodi mufunjedile n’ni wa chaka 50 dedo mukalilenyo mupanganga utumiki wa thawi detene?

Ann-Catrin: Ndifunjeda ira ninokala akopolo “nakala ofaasa koma teto natonyi-edanga ira ninomuroromela Yehova.” Namuroromelanga liye unonivazela kondo. (Yes. 30:15; 2 Lim. 20:15, 17) Chifukwa yomutumikela movipeleka va utumiki-u uliwetene, nifwanya madaliso anjinji anayo kanaafwanya uliwetene.

Mats: Likundo lilukulu lelo ndifunjedile miyo kumuroromela Yehova va iliyetene noonanga mwemo munandikami-ela liye. (Sal. 37:5) Liye kanalepelevo kwakwaneli-eda malonjezwae, ninoona vyevi vevo ninapanga iyo utumiki-u wa va Beteli wu Myanmar.

Ninororomela teto ira Yehova unoza adalise azombwe anjinji anayo kanafuna panga vinjinji vomutumikela. Kaninakaikela ira vyevi vinoza viwandeye akala aluwa kanalola ira Yehova aakami-e ulukula vamalo alietene anayo kanazeathu kazaliwe.