Muumbuwelenga Pempelela Athu Amo-iwa

1. Kodi ninaiziwa avi ira mapempelwi-u mbofuneya vinjinji wa Yehova?

PEMPELO chimpaso yavadela vinjinji. Kaganizelani likundoli: Yehova oopeleka chito dimo-i waangelo. (Sal. 91:11) Koma teto oomuva-a mwanae maudindo ofuneya vinjinji. (Mat. 28:18) Koma kodi udindo ovuruwana mapempelwi-u ooupeleka teto wa uliwetene? Naari. Yehova oosakula ira udindo unola ukale waaye ba-i. Yehova, “ngovwa pempelo,” liye unavuruwanecha yeka mapempelwi-u. — Sal. 65:2.

2. Kodi namarumiwa Paulo apelekile isazo yoi avi va khani yopempelela athu amo-iwa?

² Ninokoza pempela wa Yehova nomuwandela mavuto anayo kananipangi-a ira nikumbanyenga. Komave nipempelelenga teto athu amo-iwa. Vyevi pivyevyo namarumiwa Paulo apangile liye. Mwaisazo, liye oolembela pingo wau Efeso ira: “Ndinopitilizave upempelelani.” (Aife. 1:16) Paulo oopempelela teto athu o-iyana-iyana. Mwaisazo, liye oomuwandela Timoteyu ira: “Ndinomuyamikela Mulungu, . . . moi kandinadiwala uromola m’mapempelwanga opembezela mutana na ma-iyu.” (2 Tim. 1:3) Paulo ookaana mavutwae anayo afuneela liye ira aapempelelenga. (2 Akor. 11:23; 12:7, 8) Komave ngakale vyali eno, liye oofwanya thawi yowapempelela athu amo-iwa.

3. Kodi pivyongo viivi vyevyo vinanipangi-e ira nidiwale apempelela athu amo-iwa?

³ Thawi dimo-i ninokoza diwalanga pempelela athu amo-iwa. Chifukwa n’ni vyevi vinaireya? Murongola m’mo-iwa zina lae Sabrinaa ooromola yongo imo-i ineyo inapangi-a vyevi. Liye aongile ira: “Malambwano iyo athu ninotanganisiwa vinjinji. Ninokoza ganizelanga vinjinji vyokuza mavutwi-u, moi ninokoza kedanga pempelela vyokuza iyo ba-i.” Kodi na nyen’ne teto thawi dimo-i vyevi vinouireelani? Akala chi eno, khanila inoukami-ani vinjinji. Khanila inofotokoza (1) Chifukwa iwa ninafuneela pempelelanga athu amo-iwa koma teto (2) mwemo ninapangele iyo vyevyo.

CHIFUKWA N’NI NINAFUNEELA PEMPELELANGA ATHU AMO-IWA?

4-5. Kodi mapempelo anayo ninaapempelela iyo athu amo-iwa ‘kana-inde avi chito mwakopolo vinjinji?’ (Yakobo 5:16)

⁴ Mapempelo anayo ninapempelela iyo athu amo-i “kano-inda chito mwakopolo vinjinji.” (Welengani Yakobo 5:16.) Kodi vyongo vinokoza chenja vamoyo wa muthu m’mo-iwene chifukwa yoi nimupempelela? Ee vinokoza chenja. Yesu angaiziwile ira Petulo unomukoonda vaanavire thawi indendai, oomuwandela ira: “Miyo ndiupempelela ira iroromelwao kimale.” (Luka 22:32) Naliyene teto Paulo ooiziwa ira pempelela athu amo-iwa, unokoza pangi-a ira vyongo vichenje vamoywiwa. Angamangiwe wu Roma, liye oomuwandela Filimoni ira: “Ndinororomela ira chifukwa ya mapempelwinyu, ndinomasuliwa ira ndize ndiutumikelengani.” (Filim. 22) Vyevi pivyevyo vyaireile. Vaanavire thawi indendai, Paulo ookumi-iwa mundende moi oowambeela teto laleela.

⁵ Komave vyevi kavinatapulela ira napempelanga, ninakala nimukanyi-edanga Yehova ira apange vimo-iviwa vyene. Liye unoona vyevyo vinapangi-a ira atumikae kakumbanyenga moi thawi dimo-i unosakula panga vyevyo kamuvepileathu. Iziwa vyevi unokoza nikami-a ira nipempelenga wa Yehova moweli-edaweli-eda vya vuto lelo nin’na iyo nororomelanga ira unonisomeda mundila yofwanelela. — Sal. 37:5.

6. Kodi pempelela athu amo-iwa unakuza avi mwemo ninaaonela iyo? (1 Petulo 3:8)

⁶ Napempelelanga amo-iwa, vinonikami-a ira nikaengana “chifundo ilukulu.” (Welengani 1 Petulo 3:8.) Muthu wachifundo unozindikiza mavuto anayo amo-iwa kanagumananaathu moi unoesaesa fwanya ndila oyi aakami-e. (Maliko 1:40, 41) M’bali m’mo-iwa unoyo ngu ndimuwa zina lae Michael aongile ira: “Ndapempelelanga athu amo-i , nomuwandela Yehova vyevyo kanafuneelaathu, vinondikami-a iziwa mavuto anayo kanalimbananaathu moi vinopangi-a ira ndiaomeluwengana vinjinji. Ndinowaona ira mba afwanga avamurima ngakale ira aluwa katinaiziwa vyevi.” M’bali Richard unoyo teto ngu ndimuwa mupingo oofotokoza upama umo-iwa. Liye aongile ira: “Napempelela muthu m’mo-iwene pavevo teto ninakala iyo ofunechecha mukami-a.” Liye oowenjedela teto ira: “Namukami-a muthu m’mo-iwene unoyo nimupempelele iyo, vinakala ira nikami-ana someda pempelo lelo namupempelele iyo.”

7. Kodi pempelela athu amo-iwa unanikami-e avi ira kanikedenga ganizela vya mavutwi-u? (Afilipi 2:3, 4) (Onani teto vithuzithuzi.)

⁷ Napempelelanga athu amo-iwa, vinonikami-a ira nionenga mavutwi-u mofwanelela. (Welengani Afilipi 2:3, 4.) Uliwetene wa iyo unolimbana na mavuto amo-iwene chifukwa yoi ninakala muilambo ineyo inalamuleliwa na Mdjerekezi. (1 Yoh. 5:19; Chiv. 12:12) Thawi detene napempelelanga amo-iwa, niumbuwelenga ira “abali-u va ilambo yetene kanogumana teto na mavuto ngati anayo.” (1 Pe. 5:9) Murongola m’mo-iwa unoyo ngu mpainiya zina lae Katherine aongile ira: “Ndapempelelanga athu amo-iwa, ndinoumbuwela ira athu amo-iwa teto kanolimbana na mavuto. Likundo leli linondikami-a ira kandikedenga ganizela vinjinji vya mavutwanga.”

NIPEMPELELENGA ATHU AMO-IWA

8. Pelekani visazo vya athu anayo ninaapempelele iyo.

⁸ Kodi mba athu aavi anayo ninaapempelele iyo? Ninokoza pempelela athu amagulu o-iyana-iyana. Mwaisazo, ninokoza pempelela athu anayo kanabulela, azombwe anayo kanaruni-iwa na afwiwa, anayo kanakanyi-ediwa ira kapange vyotakala usukulu, kapena teto anayo kanagumana na mavuto chifukwa yokalamba. Akristu anjinji kanozuzumi-iwa na abaliwa kapena maboma. (Mat. 10:18, 36; Vyo. 12:5) Abali na arongola amo-iwa kootawa munyumba diwa chifukwa yamavuto oza chifukwa ya vyandale. Koma amo-iwa kanovuteya chifukwa ya mavuto amuilengedwe. Pivyoona ira abali na arongola anala kaninaaiziwa. Komave naapempelelanga ninotonyi-eda ira ninovwela lamulo lelo Yesu aniva-ile liye loi “muomeluwanenga.” — Yoh. 13:34.

9. Chifukwa n’ni ninafuneya pempelelanga abali anayo kanasogolela mugulu la Yehova koma teto a-iyaniwa?

⁹ Ninokoza teto pempelela abali anayo kanasogolela mugulu la Yehova. Abali anala kanotangani-avo abali a m’Bungwe Lolamulela koma teto anayo kanaakami-a, abali a m’Makomiti a Thambi, abali anayo mboing’anela madipatimenti wu maofesi a thambi, oing’anela dela, andimuwa mupingo koma teto atumiki okami-a. Anjinji mwa abali anala kanolimbana na mavuto anayo kanaapangi-a ira kakumbanyenga, komave ngakale vili eno aluwa kanovipeleka ira kanikami-e. (2 Akor. 12:15) Mwaisazo, M’bali m’mo-iwa unoyo ngoing’anela dela zina lae Mark aongile ira: “Limo-i mwa mavuto alukulualukulu anayo kanandipangi-a ira ndikumbanyenga ti loi ndinakala undendai vinjinji na makolwanga anayo mbokalamba. Makolwanga etene ambiili kokaana mavuto okuza thanzi. Ngakale ira murongolanga na mamunae kanowasamalela, vinondivoreya vinjinji ona ira kandinapange vinjinji vowakami-a.” Ngakale ira kaninaiziwe vyongo vyetene vyevyo vinakumbanyi-e abali anayo kanatumikela mwatindala, ninokoza panga pama umbuwela apempelela. (1 Ates. 5:12, 13) Ninokoza panga pama teto apempelela a-iyana aabalala anayo kanakami-a amamuniwa mororomeleya ira kapitilize panga utumikiwa.

10-11. Kodi Yehova unokoza sangalala na mapempelwi-u ngakale ira kaniromolile mazina a abali na arongola mwachindunji? Fotokozani.

¹⁰ Monga mwemo nionele iyo, thawi detene nipempelelenga magulu aabali na arongola o-iyana-iyana. Mwaisazo, ngakale ira kaninaiziwa vya muthu m’mo-iwene, ninokoza muvepa Yehova ira akami-e abali na arongola anayo kali mundende koma teto miyali-a anayo kakhweliwe. M’bali m’mo-iwa zina lae Donald unoyo ngu ndimuwa mupingo aongile ira: “Vikala abali na arongola anjinji anayo kanagumana na mavuto moi thawi dimo-i ndinakedecha apempelela etene vamo-i ira Yehova aakami-e.”

¹¹ Kodi Yehova unosangalala na mapempelo anala? Ee. Moi kaninawande iziwa ndendende vyevyo m’bali kapena murongola uliwetene unafuneela liye. Eno pivyofuneya pempelelanga abali na arongola etene vamo-i. (Yoh. 17:20; Aife. 6:18) Mapempelo ngati anala kanotonyi-eda ira “ninoomeluwana gulu letene la abali.” — 1 Pe. 2:17.

VYEVYO NINAONGE IYO VOMUPEMPELELA MUTHU ULIWETENE VAEKA

12. Kodi panga chidwi na athu amo-iwa unanikami-e avi ira niromolenga vyevyo vinaaireela naapempelelanga?

¹² Mupangenga chidwi na athu amo-iwa. Enjedela vopempelela abali na arongola monga gulu, pivyofuneya teto ira nimupempelelenga uliwetene vaeka vomuromola zina. Kodi mupingo mwinyu vikala uliwetene unoyo unabulela wa thawi indendai? Kodi mukala muzombwe unoyo una nkhawa chifukwa yoi afwae kanomukanyi-eda ira apange vyotakala? Kodi vikala likolo lelo linaesaesa lela mwaniwa “mogwilizana na vyevyo Yehova unaonga liye”? (Aife. 6:4) Napanganga chidwi na vyevyo vinaireela athu amo-iwa, vinoza vinikami-e ira niapangelenga chifundo koma teto niaomeluwengana vinjinji. Vyevi vinoza vinilimbikise ira niapempelelenga thawi detene.b — Arom. 12:15.

13. Kodi ninapange avi ira nikwakwani-enga apempelela athu anayo kaninaaiziwa?

¹³ Mupempelelenga amo-i vowaromola zina. Ninokoza panga vyevi ngakale wa athu anayo kaninagumanevo. Mwaisazo, kaganizelani vya abali na arongola anayo kali mundende wu Crimea, Eritrea, Russia na Singapore. Munokoza fwanya mazina aabali na arongola anayo kali mundende va jw.org.c Woing’anela dela m’mo-iwa zina lae Brian aongile ira: “Ndinoona ira ndalemba zina la m’bali kapena murongola unoyo uli mundende noliwelenga mogweli-a mawu, vinondikami-a ira ndimuumbuwele muthuyo nomuromola zina lae ndapempelanga.”

14-15. Kodi ninapange avi ira napempelelanga athu amo-iwa niromolenga vyevyo kanafuneelaathu?

¹⁴ Muromolenga vyevyo munafuna nyo. Michael unoyo nimuromolile iyo umaambeelelo aongile ira: “Ndawelenga va jw.org vya abali na arongola anayo kali mundende, ndinoshisha ganizela mwemo ndavwele miyo aakale ira ngu miyo unoyo umangiwe. Ndinoiziwa ira mwina vano ndikumbanyelanga vya iyananga koma teto ndiesaesanga ira ndifwanye vyofuneya va moywae. Vyevi vinondikami-a ira ndiiziwenga vyongo vyevyo ndinaromole miyo ndapempelelanga abali anayo kali va banja anayo kali mundende.” — Aheb. 13:3.

¹⁵ Naganizelanga vyongo vyo-iyana-iyana vyevyo abali na arongola anayo kali mundende kanagumananaathu dambo na dambo, vinokoza nikami-a fwanya vyongo vyevyo ninaromole iyo naapempelelanga. Mwaisazo, ninokoza pempelela ira oing’anela ndende kapangenga vyongo mwachifundo na abali na arongoli-u koma teto ira olamulela kaalolenga abalala ira kalambelenga momasuwa. (1 Tim. 2:1, 2) Ninokoza pempelela teto ira abali na arongola mupingo kalimbikisiwenga chifukwa yororomeleya wa m’bali kapena murongola unoyo uli mundende. Kapena teto ira athu anayo kai a Mboni kapangenga chidwi na ikalelo yi-u novuruwana uthengi-u. (1 Pe. 2:12) Komave makundo anala kanokoza nikami-a teto naapempelelanga abali na arongola anayo kanagumana na mavuto o-iyana-iyana. Napanganga chidwi na amo-i, naapempelelanga vowaromola maziniwa koma teto naromolanga vyevyo ninafuna iyo ira Yehova aapangele, ninotonyi-eda ira “ninowaomeluwana vinjinji.” — 1 Ates. 3:12.

NIONENGA MOFWANELELA MAPEMPELWI-U

16. Kodi ninapange avi ira nionenga mofwanelela mapempelwi-u? (Mateyu 6:8)

¹⁶ Monga nionele iyo wale, napempelelanga athu amo-iwa vinokoza pangi-a ira vyongo vichenje vamoywiwa. Komave likundo leli ninafuneya lionanga mofwanelela. Niumbuwelenga ira napempelanga ninakala nimuwandelanga Yehova vyevyo unaiziwa liye wale. Koma teto kavinatapulela ira Yehova unafunecha malangizwi-u omuwandela mwemo unapangele liye vimo-i viwa vyene. Yehova unoiziwa vyevyo atumikae kanafuneelaathu ngakale vevo aluwa kapena iyo naanaiziwa iyo iliyetene. (Welengani Mateyu 6:8.) Ndiye kodi vikala chifukwa iliyetene yoi nipempelelenga athu amo-iwa? Ee. Enjedela va vifukwa vyevyo nivionile iyo wale mukhanila, napempelelanga amo-iwa, ninotonyi-eda ira ninowaganizela. Chikondi inonilimbikisa ira nipempelelenga athu amo-iwa. Moi Yehova unosangalala aona ira atumikae kanomusazi-eda votonyi-eda chikondi athu amo-iwa.

17-18. Kodi mapempelo anayo ninaapempelela iyo abali na arongoli-u ninaaelekezele na n’ni?

¹⁷ Ngakale mapempelwi-u kalepele pangi-a ira vyongo vichenje va moyo wa abali na arongoli-u, komave kanotonyi-eda ira ninowaomeluwana moi Yehova unoona vyevi. Vyevi ninokoza vierekezela na banja lelo lin’na a-ima ambiili ang’onong’ono, mwana m’mo-i gwa lombwana m’mo-iwa gwa i-yana. Mwana walombwanoyo unaabulela moi ugonati. Sikanoyo unamuvepa babae ira: “Babani chonde mukami-eni chimwenangola. Ubulela vinjinji.” Babaeyo uiziwa wale mwemo vyongo vililiathu wa mwana walombwanoyo, unomuomeluwana vinjinji moi unomusamalela pama. Komave baboyo unosangalala voona ira mwanae wa-iyanoyo unomuomeluwana vinjinji chimwenaeyo moi unamuvepa babae ira amukami-e.

¹⁸ Vyevi pivyevyo Yehova unafuna liye ira nipangenga. Liye unafuna ira niomeluwanenga koma teto nipempelelanenga. Napanganga vyevi mapempelwi-u kanotonyi-eda ira ninowaomeluwana afwi-u kumela vati va murima moi Yehova unoona vyevi. (2 Ates. 1:3; Aheb. 6:10) Koma teto monga nionele iyo, thawi dimo-i mapempelwi-u kanokoza pangi-a ira vyongo vichenje va moyo wa athu amo-iwa. Eno tiyemoni etene iyene nipangenga vyevyo ninawande iyo ira niumbuwelenga pempelela athu amo-iwa.