Vyevyo Munapange Nyo Ira Dambo Laukwatinyu Lize Likale Lolemekeza Yehova

1-2. Kodi Yehova unafuna ira vadambo laukwati vaireenga vyoi avi?

KODI muli vaimweendi moi munana kozeela volowa m’banja? Akala chi eno, ninoufunelani vyapama. Kaninakaikela ira munana kozeela dambo lilukululi. Yehova unopanga chidwi na vyevyo munapanga nyo, moi unafuna ira dambo laukwatinyu lize likale losangalasa,a koma teto muze mukaena banja lapama. — Miya. 5:18; Nyim. 3:11.

² Pivyofuneya vinjinji mulemekeza Yehova vadambo laukwati chifukwa liye ngofwanelela vyevi. Chifukwa n’ni ninaonga eno? Nanga munapange avi ira vyevi viwandeye? Khanila ikoziwe nayolinga yoi ikami-e athu anayo kali vaimweendi moi kanakozeela ukwatiwa. Koma makundo anayo ninaone iyo, kanokoza nikami-a etene iyene ira nimulemekezenga Yehova nadowa vaphwando laukwati, koma teto navepiwa ira nikami-e athu anayo kanakozeela ukwati.

CHIFUKWA N’NI PIVYOFUNEYA MULEMEKEZA YEHOVA VADAMBO LAUKWATI?

3. Kodi Akristu anayo kanakozeela ukwati kanafuneya ganizela vyongo viivi, nanga chifukwa n’ni?

³ Akristu anayo kanakozeela ukwati, kanafuneya panga vyongo mogwilizana na makundo a Yehova ofwanyeya m’Mawae Baibulo. Chifukwa n’ni ninaonga eno? Ninaonga eno chifukwa yoi Yehova ngunoyo aambeeli-ile ukwati. Liye ngunoyo aambeeli-ile ukwati owambeela wa Adamu na Hava. (Gen. 1:28; 2:24) Chifukwa yoi Yehova ngunoyo aambeeli-ile ukwati, athu anayo kanakozeela ukwati kanafuneya panga vyongo vyoi dambo liwa laukwati lize lilemekeze Yehova.

4. Kodi athu anayo kanakozeela ukwati kan’na vifukwa vimo-iviwa viivi vyowapangi-a ira dambo liwa laukwati lize likale lolemekeza Yehova?

⁴ Vikala vifukwa vyovweya vyoupangi-ani ira muganizele mwemo Yehova munavwela liye va vyevyo munafuna nyo panga vadambo laukwatinyu. Liye ngu Babinyu waudimu, moi unafuna ira apitilize kala fwinyu wavamurima. (Aheb. 12:9) Eno kamunafune ira vadambo laukwati kapena dambo lililetene vaireye yongo ineyo inamukumudwi-e fwinyu unoyo ngu Yehova. (Sal. 25:14) Mwaganizela vyevyo Yehova uupangeleni liye, koma teto vyevyo unaze liye aupangeleni usogolo, kodi kamunaona ira liye ngofwanelela ira aze alemekeziwe vadambo laukwatinyu? — Sal. 116:12.

VYEVYO MUNAPANGE NYO IRA MUMULEMEKEZE YEHOVA

5. Kodi Baibulo linakami-e avi athu anayo kanakozeela ukwati ira kasakule vyongo mwazelu?

⁵ M’Baibulo kamuli ndandanda wa malamulo anayo Akristu kanafuneyaathu a-arela va vyevyo vinafuneya ireya vamwambo koma teto vaphwando laukwati. Eno uliwetene unafuneya sakula ekave mogwilizana na mwemo vyongo vililiathu, koma teto mogwilizana na dela la waniwao koma teto vyevyo kanaomeliwanaathu. Akristu oona, kanafuneya teto arela malamulo a boma okuza ukwati. (Mat. 22:21) Komave kaya athwayo kasakulile panga vyoi avi, kanafuneya panga vyongo mogwilizana na makundo a m’Baibulo. Vyera eno vyevyo kanasakuleathuvyo vinoza vimusangalase koma teto mulemekeza Yehova. Ndiye kodi mbamakundo aavi anayo ninafuneya iyo aganizela?

6. Chifukwa n’ni athu anayo kanafuna telana kanafuneya arela malamulo a boma okuza ukwati?

⁶ Mu-arelenga malamulo a boma okuza ukwati. (Arom. 13:1, 2) Muvilambo vimo-i, athu anayo kanafuna telana kanafuneya arela malamulo anayo boma lagarati-ileathu kaanatelane. Koma teto kanafuneya saela malamulo anayo kanafuneya areliwa dela lawaniwao. Akala mun’na vyofuka va vyevyo munafuna nyo arela, kalani omasuwa afuka andimuwa.b

7. Kodi ukwati unafuneya ireya moi avi?

⁷ Muze muonecheche ira ukwatinyu uireya molemekezeya. (1 Akor. 10:31, 32) Muze muonecheche ira athu kanotonyi-eda makalelo anayo ninakaana iyo mokami-iwa na zimu owela ookala azimu wailambo. (Agal. 5:19-26) Mogwilizana na makundo a m’Malemba okuza muru wabanja, lombwana ngunoyo un’na udindo oonechecha ira ukwatiwa uze ukale osangalasa koma teto olemekezeya. Ndiye kodi chin’ni ineyo inamukami-e ira vyevi viwandeye? Athu anjinji kanosakula ira kaze kakaena khani ya ukwati. Akala unoyo unakamba khaniyo unaikambe mwachikondi koma teto mwaulemu, vinoza vikami-e athu etene anayo kanavuruwa khaniyo iziwa ira ukwati chi mphaso yokumela wa Yehova, koma teto iziwa ira ukwati chi khani ilukulu. Chifukwa ya vyevi, athu anjinji kanosakula ira khaniwa ya mwambo wa ukwati ize iireele Unyumba ya Umwene. Akala munafuna ira khaninyu ya ukwati ize iireele Unyumba ya Umwene, munafuneya alembela mombaraanya kalata andimuwa amupigwinyu yowavepa ira muze mu-indi-ede chito Nyumba ya Umwene.

8. Kodi munapange avi ira phwando linyu laukwati lize likale lolemekeza Yehova? (Aroma 13:13)

⁸ Welengani Aroma 13:13. Akala munafuna ira muze mukaena phwando laukwati, kodi munapange avi ira kavize vaireye vyongo vyotonyi-eda zimu wailambo? Mawu Aigiriki anayo kawamasuleleathu ira “maphwando otakala” kanaonga vya maphwando anayo athu kanang’wavoathu walwa mopitilila malile koma teto vuruwana nyimbo mpakana vaari vama-iyu. Akala vadambo laukwatinyu musakulile ira vaze vakale walwa, munafuneya ganizela vyevyo munaze nyo mupange ira athu katize kang’we walwa mopitilila malile.c Akala vanaze vakale nyimbo, muze muonecheche ira voliyamu kize ikale yogwela vinjinji nayolinga yoi athu kaze kakwakwani-enga vwanana kaaledanga. Mwasakulanga nyimbo, munokoza panga pama ganizela vya tundu wa nyimbodo koma teto uthengiwa nayolinga yoi kavize vikumudwi-e athu amo-iwa.

9. Kodi athu anayo kanakozeela telana kanafuneya ganizela makundo aavi va khani ya athu anayo kanaze kaongevo koma teto vyosangalasa vimo-i?

⁹ Muvilambo vimo-i, athu kanosakula ira vaphwando liwa laukwati afwiwa kapena abaliwa kaze kaongevo, kapena vaze vakale masika, vuruwana nyimbo, kapena panga vyongo vimo-i vyosangalasa. Vyevi vinopangi-a ira dambolo lize likale loodiwaleya. Komave muze muonecheche ira vyongo vyevi vize vikale vyolimbikisa. (Afil. 4:8) Muvifukenga ira: ‘kodi vyevi vinoza vilemekeze athu amo-iwa? Kodi vinoza vilemekeze dongosolo la ukwati?’ Koma teto yofuka yofuneya vinjinji chila: ‘Kodi vinoza vimulemekeze Yehova?’ Ngakale ira vyongo vimo-i vinokoza kala vyapama, muze mupewe panga iliyetene ineyo inapangi-e athu kaganizela vyokuza gonana. (Aife. 5:3) Muze muonecheche ira abalinyu koma teto afwinyu anayo munaasakule nyo ira kaze kaongevo kaze kalemekeze vyevyo musakulile nyo.

10. Chifukwa n’ni athu anayo kanafuna telana kanafuneya pewa panga vyongo movioni-eda vadambo laukwatiwa? (1 Yohani 2:15-17)

¹⁰ Mupewenga panga vyongo movioni-eda. (Welengani 1 Yohani 2:15-17.) Yehova unosangalala atumikae kapanganga vyongo vyomulemekeza, m’malo mofuna ira athu kakedenga ganizela vya aluwa. Eno Akristu oviyevi-a, kanopewa ononga ndalama dinjinji nayolinga yofuna keda “vioni-eda.” Kodi munapindule avi akala munapange vyoi ukwatinyu kuze uononge ndalama dinjinji? Mwina vyevyo vinauireeleni vinokoza fwanafwana na vyevyo vyamuireele m’bali m’mo-iwa wau Norway zina lae Mike. Liye aongile ira: “Kanana ngongole, moi nookwakwani-a pitiliza panga upainiya. Ukwati-u kawali wavadela, koma wali osangalasa koma teto o-odiwaleya.” Murongola m’mo-iwa wau india zina lae Tabitha aongile ira: “Noopanga vyoi ukwati-u kukale wavadimu moi vyevi vyoonikami-a ira kanikaena nkhawa koma teto kanana vyongo vinjinji vyoi nikozeele, vyevyo vyapangi-ile ira kanisempanenga maganizo.”

11. Kodi athu anayo kanafuna telana kanatonyi-ede avi ira katinavioni-eda vakhani ya mawarelo koma teto virii-eda? (Onani teto ithuzithuzi.)

¹¹ Kodi musakula vyowara vyevyo munaze nyo muware vadambo laukwatinyu? Kaninakaikela ira munofuna za oneya pama vinjinji vadambo leli. Vyevi kai vyolakweya, chifukwa ngakale athu oromoliwa m’Baibulo koowara pama vadambo laukwatiwa. (Yes. 61:10) Pivyoona ira vyevyo munaze nyo muware vadambo laukwatinyu vinoza vikale vyo-iyana na vyevyo munawara nyo thawi detene, komave munafuneya za wara mwaulemu. (1 Tim. 2:9) Kamuze mulole ira vyevyo munaze nyo muware koma teto mwemo munavirii-edele nyo ize ikale yongo yofuneya vinjinji vadambo laukwatinyu. — 1 Pe. 3:3, 4.

12. Chifukwa n’ni athu anayo kanafuna telana kanafuneya pewa miyambo da ukwati dosempana na makundo a m’Baibulo dedo tidochuka mudela liwa?

¹² Mupewenga miyambo dosempana na makundo a m’malemba. (Chiv. 18:4) Muilambwela athu kapanganga ukwati, kanopanga teto miyambo dokuzana na ipembezo yonama koma teto roromela mizimu. Yehova unonichenjeza movweya pama ira kanipangengana vyongo vyotakala ngati vyevi. (2 Akor. 6:14-17) Akala udela lelo munakala nyo uli miyambo dimo-i dokuza ukwati dedo munadikaikela nyo, munopanga pama saela ira muiziwe mwemo daambeeleathu koma teto makundo a m’Baibulo anayo kanaukami-eni ira musakule vyongo mwazelu.

13. Kodi athu anayo kanafuna telana kanamusazi-ede avi Yehova vakhani yowachela mphaso?

¹³ Kodi udela lelo munakala nyo athu kanoomeliwa peleka mphaso wa athu anayo kanatelana? Mphaso dedo athwayo kanapelekeathu vinaroromela ndalama dedo kan’naathu. Pivyoona ira Akristu kanolimbikisiwa ira kakale ova-a moi vyevi vinowapangi-a ira kakalenga osangalala. (Miya. 11:25; Vyo. 20:35) Komave athu anayo kanafuna telana katinafuneya pangi-a athu anayo kaitaniwe ona ira mbokanyi-ediwa peleka mphaso kapena viona ira mphaso ineyo kanapelekeathu kinayamikeliwe chifukwa yoi chiyoyeva. Nimusazi-edenga Yehova voyamikela mphaso dedo athu kananiva-aathu moi kaniakanyi-edenga ira kaniva-e mphaso dedo katinakwakwani-e.— 2 Akor. 9:7.

VYEVYO MUNAPANGE NYO IRA MUPEWE KOMA TETO MUMALI-E MAVUTO

14. Kodi athu amo-iwa anayo kanafuna telana kanagumana na mavuto oyi avi?

¹⁴ Munokoza gumana na mavuto vevo munaesaesa nyo ira muze mukaena ukwati unoyo unamusangalase Yehova. Mwaisazo, vinokoza kala vyorucha ira mukozeele ukwati unoyo kunaononge ndalama dinjinji. Charlie, wau Solomon Islands, aongile ira: “Vyali vyorucha ira niaitane athu vaphwando li-u laukwati. Nikaana afwi-u anjinji, moi malinga na ikalelo yi-u uliwetene adedi-edela ira nimuitane.” Tabitha, unoyo nimuromolile iyo walele, aongile ira: “Wewo ninakala iyo athu kanoomeliwa aitanela athu anjinji vaphwando laukwati. Voolanda thawi ira makolwanga kafiye vosomedela vyevyo nasakulile iyo vyoi niaitane athu otamangela 100.” Sarah unoyo unakala wu India aongile ira: “Athu anjinji kanoomeliwa panga vyongo vofuna vioni-eda ira kokaana ndalama. Mulamwanga oopanga ukwati wavadimu vinjinji ndiye namiyene teto ndafuna ira ndize ndipange ukwati wavadimu kwaranya waaye.” Ndiye kodi chin’ni ineyo inaukami-eni mali-a mavuto ngati anala koma teto mavuto amo-iwa?

15. Chifukwa n’ni pempelo tilofuneya vinjinji mwakozeelanga ukwati?

¹⁵ Mwakozeelanga ukwati mupempelenga. Mumuwandelenga Yehova m’pempelo vyosakula vyevyo munafuna nyo panga koma teto vuto lililetene lelo munagumanena nyo mwakozeelanga ukwati. (Afil. 4:6, 7) Mumuwandelenga teto Yehova m’pempelo ira aukami-eni sakula vyongo mwazelu, kala odekha akala mun’na nkhawa koma teto ira mukale olimba murima akala vyevyo munafuna nyo sakula vina-iyana na vyveyo athu amo-iwa kanafunaathu. (1 Pe. 5:7) Munoza muwambeele muroromela vinjinji Yehova mwaona ira liye unoukami-ani. Tabitha unoyo nimuromolile iyo walewale, aongile ira: “Miyo na mwendanga noova ira ninosempana maganizo koma teto sempana maganizo na abali-u. Eno thawi iliyetene nakambilananga vyongo vyokuza ukwati-u noowambeela na pempelo. Noona ira Yehova oonikami-a moi nookambilana vyongo mwamurendele.”

16-17. Kodi ongi-ana momasuwa unaukami-eni avi vevo munakozeelanyo ukwati?

¹⁶ Muongi-anenga momasuwa koma teto mwaulemu. (Miya. 15:22) Etene ambiili, munafuneya sakula vyongo vinjinji vyokuza ukwatinyu. Vyevi vinotangani-avo sakula deti laukwatinyu, ndalama dedo munaze nyo muononge, athu anayo munaze nyo muwaitane koma teto vyongo vimo-i. Mwaanasakule vyoira, kambilanani teto limo-i vyevyo musakulile nyo. Kambilana makundo a m’Baibulo anayo kanakuzana na khaniyo koma teto malangizo okumela wa Akristu olimba mwauzimu unokoza ukami-ani. Mwakambilananga vyevyo munaomeliwe nyo vingairele, mufotokozenga mwaulemu, mukalenga ololela koma teto okozeya chenja. Akala makolwinyu kauvepileni ira muze mupange vyongo vyevyo pivyowandeya, esaesani panga vyevyo kavepileathuvyo chifukwa dambo leli tilavadela teto wa aluwa. Koma akala kamunakwakwani-e panga vyevyo kavepileathuvyo, muwafotokozele mwaulemu koma teto mwachikondi vifukwa viwa. (Akol. 4:6) Muwafotokozelenga movweya pama ira yolinga inyu ilukulu kuza kaana phwando laukwati lelo linaze limulemekeze Yehova.

¹⁷ Fotokoza vyevyo musakulile nyo wa makolwinyu simbwasimbwa wa anayo Kai a Mboni, unokoza kala orucha vinjinji, komave nalikami-edo la Yehova munokoza kwakwani-a. M’bali m’mo-iwa wau India zina lae Santhosh aongile ira: “Abali-u kafuna ira vaukwati-u nize nipange miyambo dimo-i diwa da ihindu. Chifukwa ya vyevi, vyoonilandela thawi ira miyo na mweendanga niafotokozele vyevyo nasakulile iyo. Noosomedela chenja vyongo vimo-i vyevyo naona iyo ira kavinamukudwi-a Yehova. Mwaisazo, noochenja vyodja vyevyo nafuna iyo dja vaphwando vosakula vyodja vyevyo aluwa kanaviomeliwanaathu, koma teto noosakula ira kavize vikale nyimbo koma teto ina, chifukwa vyali vyosempana na ikalelo iwa.”

18. Kodi munapange avi ira vyongo vize viyende pama vadambo laukwatinyu? (1 Akorinto 14:40) (Onani teto ithuzithuzi.)

¹⁸ Mukozeelenga mokwakwanela. Kozeeela wangali thawi, unokoza ukami-ani ira kamuze mukaena nkhawa vadambo laukwati. (Welengani 1 Akorinto 14:40.) M’bali Wayne wau Taiwan aongile ira: “Wanga-alile malambo oyeva ira ukwati uireye, noogumana na athu anayo kavipelekile ira kanikami-e vyongo vimo-i na vimo-i. Nookambilana mapulani anayo napangile iyo koma teto nooshishedela mbali dimo-i dedo daze diireye va ukwativo nayolinga yoi nisimikizele ira iliyetene inoza iyende pama.” Vofuna alemekeza athu anayo muwaitanilenyo munokoza panga pama za panga vyongo vathawiwa.

19. Kodi munapange avi ira muonecheche ira vyongo vize viyende pama vathawi ineyo phwando liliathu muwari?

¹⁹ Munokoza pewa mavuto anjinji akala munaganizele vangali thawi mavuto anayo kanakalevo koma teto vyevyo munapange nyo ira muwamali-e. (Miya. 22:3) Mwaisazo, akala munakala udela lelo athwiwa kanaomeliwa dowa umaphwando aukwati kaanaitaniwe, munokoza ganizela vyevyo munaze nyo mupange ira vyevi kavize viireye. Munokoza awandela vyevyo mupangile nyo ira vize viireye koma teto munokoza afotokozela vyevyo munaroromela nyo va miyambo dimo-i dokuza ukwati. Munokoza kambilana na aluwa vyevyo vili mukhani yoi “Kodi Paukwati wa Mboni za Yehova Pamachitika Zotani?” ineyo ili va saiti-u ya jw.org. Ira vyongo vize viyende pama vaphwando laukwatinyu, muze mumuvepe m’bali olimba mwauzimu ira aze akale “oing’anela phwando.” (Yoh. 2:8) Akala munamufotokozele movweya pama vyevyo munafuna nyo ira vize viireye va dambo laukwati, unokoza ukami-ani onechecha ira vyongo va dambo laukwatinyu viyenda mwadongosolo, koma teto mwaulemu ngati mwemo mwakozeele nyo.

20. Kodi athu anayo kanafuna telana kanafuneya umbuwela n’ni vyokuza dambo laukwatiwa?

²⁰ Munokoza kumbanyanga mwaganizela vyongo vyetene vyevyo vinafuneya ira mukozeele ukwati. Koma muumbuwelenga ira phwando laukwati linaza likala dambo limo-i ba-i. Moi inakedecha kala chiyambi chabe ya moyo osangalasa unoyo munaze nyo mukaena votumikela limo-i Yehova monga banja. Eno pangani vyetene vyevyo munawande nyo ira mukaena ukwati o-oulela vinjinji koma teto olemekezeya. Mumuroromelenga Yehova. Chifukwa mokami-iwa na liye munokoza kwakwani-a kozeela phwando laukwati lelo munerenga nyo mwaumbuwela, munerenga sangalala vinjinji moi kamunaza muviimba mulandu. — Sal. 37:3, 4.