Koolonjeza Ira Kanerenga Muvwela Yehova

Vangavirile medi min’li kumela vevo Aisaraeli kakumileathu wu Iguputo, aluwa koofiya Vamwango wa Sinai moi koomanga misasa. Yehova oomuwandela Mose ira agwele m’mwangomo. Wewo oomu- wandela ira: ‘Ndiavulumucha Aisaraeli. Akala kanandivwele koma teto sunga malamulwanga, kanoza kakale athwanga avadela.’ Mose ootita m’mwangomo dowa awandela Aisaraeli vyevyo Yehova aongile liyevi. Kodi aluwa kapangile avi kangavwile vyevi? Koosomeda ira: ‘Ninerenga panga iliyetene ineyo Yehova uongile liye.’

Mose oowelelawo teto umwango ule. Eno Yehova oomuwandela ira: ‘Ndinoonga na nyo vavira malambo maralu. Uwachenjeze athu ira katigwele m’mwangola.’ Mose ootita dowa awandela Aisaraeli ira kakozeele vuruwana vyevyo Yehova unaze liye aawandele.

Vangavirile malambo maralu, oowambeela panga vipaliwali na mabingu moi vamwangovo vookala murambo odimba. Teto oovweya ula wakopolo wa lipenga. Eno Yehova angatitele vamwangovo, voowambeela mulo. Aisaraeli koova vinjinji moi koowam- beela ngurumeda. Mwango wetene unoyo ootuwela uchi koma teto ootekenyeya vinjinji, teto phokoso la lipenga lakeda enjedeleya. Eno Mulungu oonga ira: ‘Miyo ndili Yehova. Kamulambelenga milungu dimo-i.’

Mose oowelela teto umwango ule moi Yehova oomuva-a malamulo oyi athwayo kaa-arelenga vomulambela koma teto vopanga vyongo vya dambo na dambo. Mose oolemba malamulwayo dowa awelengela Aisaraeli. Aluwa koolonjeza ira: ‘Ninerenga panga vyetene vyevyo Yehova uongile liye.’ Aisaraelayo koolonjeza ira kanerenga muvwela Mulungu. Koma kodi koopanga vyevi?