Gidiyoni Oowagonji-a Amidiyani

Vangavirile thawi, Aisaraeli koo-iya lambela Yehova moi koowambeela lambela milungu donama. Wa chaka 7, Amidiyani kooba viweto vya Aisaraeli koma teto aonongela mbewu diwa. Vowatawa Amidiyanayo, Aisaraeli koovitaala m’mapanga koma teto m’mimwango. Eno koomuvepa Yehova ira aavulumuche. Vanduli viwa Yehova ootumiza mgelo ira adowe wa Gidiyoni. Mgeloyo oomuwandela Gidiyoni ira: ‘Yehova uusakula ira ukale silikali olimba murima koma teto wakopolo.’ Gidiyoni oomufuka mgeloyo ira: ‘Kodi muthu ookaana chito ngati miyo, ndinaavulumuche avi Aisaraeli?’

Koma kodi Gidiyoni asimikizela avi ira Yehova oomusakula? Liye oo-ela maoya vati nomuwandela Yehova ira: ‘Akala mamawa maoyala kanafwanyeye kangali onyeta, koma teya kala youma, ndinoza ndiiziwe ira nyo mundisakula ira ndiavulumuche Aisaraeli.’ Mamawa a dambo lo-arela oofwanya ira maoyale koonyeta koma teya chiyouma. Koma Gidiyoni oovepa teto ira, mamawa adambo lo-arela afwanye maoyale kangali ouma koma teya ingali yonyeta. Vyevi vingaireile, Gidiyoni oosimikizela ira Yehova umusakula. Eno oosonkani-a asilikalae ira kadowe kawane na Amidiyani.

Yehova oomuwandela Gidiyoni ira: ‘Ndinowakami-a Aisaraeli ira kakwaranye vakondwela. Koma chifukwa yoi mukaana asilikali anjinji munokoza ganizanga ira mukwaranya chifukwa ya kopolo dinyu. Wandela uliwetene unoyo unaova ira awelele waniwa.’ Eno asilikali okwakwana 22,000 koowelela waniwa keda ala okwakwana 10,000 oka. Koma Yehova oonga ira: ‘Asilikalala koinjivave. Uwalande uwadowena u-inje teto waawandele ira kang’we ma-inje. Eno wasakule anayo kanag’wenga ma-inje wu kaing’ananga adaniwa.’ Asilikali 300 oka mbanayo kali chelu vevo kang’waathu ma-inje. Yehova oolonjeza ira asilikali oyevayo kanoza kagonji-e asilikali Aimidiyani okwakwana 135,000.

Ma-iyu, Yehova oomuwandela Gidiyoni ira: ‘Sopano dowani mwawane na Amidiyani.’ Gidiyoni oowava-a asilikalae malipenga a nyanga na misuwo dilukuludilukulu teto m’misuwodo oo-elamo vyomoneela. Liye oowawandela ira: ‘Muonechechenga vyevyo ndinapanga miyo teto na nyen’ne mupangenga vyevyo.’ Gidiyoni oouli-a lipenga lae, notwa suwole vanduli viwa ootukula yomoneela noigweli-a mudimu nowambeela kuwa ira: ‘Kondo ya Yehova chi ya Gidiyoni!’ Asilikali 300 ale koopanga teto chimozimozi. Amidiyani kangavwile vyevi koowambeela oova moi kootawa. Chifukwa yosokonezeya, aluwa koowambeela ukelana ekiwaekiwa. Va Yehova oowakami-a Aisaraeli gonji-a adaniwa.