Hana Oovepa Mwana

Muthu m’mo-iwa wau Isaraeli zina lae Elikana an’na a-iyana ambin’li. Mazina a a-iyanayo kali Hana na Penina. Koma Elikana oomuomeliwana vinjinji Hana. Penina ookaana a-ima anjinji koma Hana kaan’na mwana ngakale m’mo-i. Chifukwa ya vyevi, Penina oomunyoza Hana thawi detene. Chaka iliyetene, Elikana oodowa lambela wu Silo limo-i na banja lae. Dambo limo-i kangali wewo, oozindikila ira Hana ukumudwa vinjinji. Liye oomuwandela ira: ‘Hana kuule. Ndinouwomeliwana vinjinji. Kodi miyo kandili ofuneya kwaranya a-ima anayo unafunaweayo?’

Vanduli viwa Hana oomaruwa dowa pempela. Liye oomuvepa Yehova ira amukami-e moi apempela wu aulanga mookumi-a mawu. Hana oolonjeza ira: ‘Yehova, mwandiva-a mwana wamulombwana ndinoza ndiuva-eni ira autumikelengani wa moywae wetene.’

Eno ndimuwa wa asembe zina lae Eli angaonile milomo da Hana ditekenye- yanga, ooganiza ira mwina were lezela. Koma Hana oosomeda ira: ‘Naari mbwiyeni, miyo kandilezelile. Ndikaana vuto lilukulu vinjinji lelo ndinamufotokozela miyo Yehova.’ Eli oozindikila ira ulakwi-a moi oomuwandela Hanoyo ira: ‘Mulungu auva-e vyevyo unafunawevyo.’ Vyangaireile eno, Hana oowambeela vivwa pama m’murimani moi oowelela waniwa. Chaka ya-anamale Hana, oobala mwana nomuva-a zina loi Samueli. Liye oosangalala vinjinji.

Hana kaadiwalile vyevyo amulonjezile liye Yehova. Samueli anga-iile yamwa, oomupeleka ira atumikelenga va ihema. Liye oomuwandela Eli ira: ‘Mwana ula ngunoyo ndamuvepa miyo vathawi ile. Ndiimupeleka ira atumikelenga Yehova wa moywae wetene.’ Chaka iliyetene, Elikana na Hana koodowa muona Samueli teto koomulandela maleya opaza miwono. Yehova oova-a Hana a-ima amo-i, aalombwana aralu na aa-iyana ambin’li.