Yehova Oonga na Samuweli

Eli ali Ndimuwa wa Asembe moi ookaana a-ima ambin’li anayo katumikela ngati asembe uihema. Maziniwa kali Hofeni na Pinehasi. A-imala katavwela malamulo a Yehova, moi koopangela athu vyotakala. Aisaraeli kazana sembe doi kapeleke wa Yehova, aluwa koolandavo nyama dapama dowa didja. Eli oovwa vyevyo a-imayala kapangaathu koma kaakami-ile. Kodi Yehova akede i-iya khanila?

Vathawi ineyo Samueli ali angali mwana koma liye kaapangana makalelo otakalayo moi Yehova oosangalala na liye. Dambo limo-i liwa angagonatile oovwa muthu amuitananga. Liye oovenya dowa wa Eli moi angafiile oonga ira: ‘Ndiiza.’ Koma Eli oonga ira: ‘Miyo kandiuitanile. Dowa wagonati.’ Samueli angadowile gonati oovwa teto itana nawili. Ulendo wanaralu, Eli ozindikila ira unoyo amuitana Samueli ngu Yehova. Eno oomuwandela ira, wavwa itana nawili wasomede ira: ‘Ongani Yehova. Miyo tumikinyu ndinovwa.’

Samueli angadowile gonati oovwa teto itana ira: ‘Samueli! Samueli!’ Liye oosomeda ira: ‘Ongani. Miyo tumikinyu ndinovwa.’ Eno Yehova oomuwandela ira: ‘Wamuwandele Eli ira ndinomulanga liye na banja lae. Chifukwa unoiziwa vyotakala vyevyo a-imae kanapangaathu uihema koma unakeda aing’ana.’ Ungachile, Samueli oodowa ula visewo vya ihema ngati mwemo mwapangela liye thawi detene. Liye oova muwandela ndimuwa wa asembe vyevyo Yehova aongile liye. Koma Eli oomuitana nomufuka ira: ‘Mwananga, kodi Yehova uuwandele n’ni? Ndiwandele iliyetene.’ Vyangaireile eno, Samueli oomuwandela Eli vyetene vyevyo Yehova aongile liye.

Yehova oopitilizave musogolela Samueli. Moi athu amuilambo yetene ya Isaraeli kooiziwa ira Yehova oomusakula Samueli ira akale namaongela koma teto oweluza.