Gulu Lakopolo la Asilikali a Yehova

Beni-hadadi, ali Mwene wa Siriya, moi thawi detene oomeliwa dowa wana na Aisaraeli. Koma thawi detene namaongela Elisa oochenjeza Mwene wa Isaraeli moi mweneyo ootawa. Eno Beni-hadadi ooganiza vyoruma asilikalae ira kamu-inde Elisa. Liye oovwa vyoi Elisoyo uli wu Dotana.

Asilikali a Siriya koofiya wu Dotana ma-iyu norungunuwa mzindoyo. Mamawa, tumiki wa Elisa angakumile vande oona gulu la asilikalilo. Liye oova vinjinji moi ookuwa ira: ‘M’mani miyo veva ninapanga avi mbwiyeni?’ Koma Elisa oomuwandela ira: ‘Kuove iyo nikaana anjinji kwaranya anayo kali na aluwa.’ Eno Yehova oo-ula maso a tumikiyo moi oona ira mimwango detene dorungunuwa mzindoyo mukala mahachi na magaleta akondo okara mulo.

Vevo asilikali a Siriya kafunaathu mu-inda Elisa, liye oopempela ira: ‘Pepani Yehova apangi-eni ira kasokonezeye maganizo.’ Mwazizizi, asilikalale kafwanyeile ira katinaiziwa wewo kaliathu ngakale ira koona. Vyangaireile eno Elisa oowawandela ira: ‘Mu-olowa-i zani uno diuveleeleni wa muthu unoyo munamufuna nyo.’ Asilikalayo koowambeela mu-arela mpakana dowa fiya wu Samariya wewo mwene ya Isaraeli yakalaathu.

Va pivevo asilikayo kaiziwileathu wewo kaliathu. Mweneyo ingaaonile yoomufuka Elisa ira: ‘Kodi ndiaphe?’ Kodi Elisa oona ira unola ngu mwai oyi aaphe athwala? Naari. M’malomwiwa oonga na Mweneyo ira: ‘Kamuwaphe. Ava-eni yodja ira kadje era eno a-iyeni ira kadowenga.’ Eno Mweneyo yokoza phwando lilukulu. Kangamari-ile dja koomaruwa dowanga waniwa.