Yesu Oomuvenyi-a Lazaro

Yesu ookaana afwae aralu anayo kakala wu Betaniya. Afwayayo ali Lazaro na arongolae ambin’li, Mariya na Marita. Dambo limo-i, Yesu angali ukombela imo-i ya inje wa Yorodano, Mariya na Marita koomutumizela uthenga oyi: ‘Lazaro unaabulela mwakayakaya. Ninavepa ira muze mombaraanya.’ Koma Yesu kaadowile thawi ineyo. Ookalave malambo ambin’li wewo vanduli viwa oowawandela ofunjedae ira: ‘Tiyemoni nidowe wu Betaniya. Lazaro unaagona moi ndinafuna ndamuvenyi-e.’ Anamarumiwayo koomuwandela ira: ‘Akala Lazaroyo unaagona vinomukami-a ira afwanye pama mombaraanya.’ Va sopano Yesu oowawandela ira: ‘Lazaro utatia.’

Vevo Yesu afiya liye wu Betaniya vali vangamalile malambo 4 Lazaro angali m’manda. Ookala athu anjinji anayo kazile ira kamumiyali-e Marita na Mariya. Marita angavwile ira Yesu unaaza, oomuchingamela moi kangagumanile na liye oonga ira: “Mbwiyeni, mwaakale uno murongolanga kaatatia.” Yesu oomusomeda ira: ‘Murongolawo unoza avenye. Unororomela vyevi?’ Marita oonga ira: ‘Ee, ndinororomela ira unoza avenye va dambo lomari-a.’ Eno Yesu oonga ira: “Miyo ndili venya na moyo.”

Vanduli viwa Marita oomuwandela Mariya ira: ‘Yesu uza.’ Mariya ootamangela wa Yesu moi gulu la athu loomu-arela. Mariya ookokora vakwikwi na Yesu moi akeda ula. Vanduli viwa oonga ira: ‘Mbwiyeni, mwaakale uno murongoli-u kaatatia.’ Yesu angaonile ira Mariya ukaana chisoni vinjinji, naliyene oowambeela ula. Athu kangaonile ira Yesu uwambeela ula koonga ira: ‘Ee oomuwomeluwana vinjinji Lazaro.’ Koma amo-i koowambeela fuka ira: ‘Nanga chifukwa n’ni kamukami-ile ira kakhwe?’ Kodi Yesu apangile avi?

Yesu na athwayo koodowa umanda moi kafwanyile ira vamandavo ko-eyavo na libwe. Liye oowawandela athu ira: ‘Chosani libweli.’ Koma Marita oonga ira: ‘Vivira malambo 4 angali m’manda vano uwambeela nukha.’ Komave athu koochosa libwelo moi Yesu opempela ira: ‘Babani, ndinoyamikela ira mundivwa. Ndinoiziwa ira munondivwa thawi detene, koma ndinapempela mogweli-a eni ira athwala kaiziwe ira nyo moondiruma.’ Vanduli viwa ookuwa ira: “Lazaro kuma.” Vyangaireile eno voireya vyongo vyodabwi-a. Lazaro ookuma angan’na nguwo dedo kamukuunelenaathu. Yesu oonga ira: “M’masuleni nomu-iya ira adowenga.”

Athu anjinji anayo kaonile vyevi koomuroromela Yesu. Koma athu amo-i koodowa awandela Afarisi moi Afarisayo koofuna mupha Lazaro na Yesu. M’mo-i mwa anamarumiwa 12 ale zina lae Yudasi, oozemba dowa wa Afarisi nowawandela ira: ‘Munandiva-a ndalama ndingasi ndaukami-ani ira mumufwanye Yesu?’ Koogwilizana ira kanomuva-a ndalama 30 da siliva. Eno Yudasi oowambeela saelasaela mpata oyi amupeleke Yesu.