Yodja Yamazulo Yomari-a

Ayuda koopanga ikondwelelo ya Pasika va dambo la 14 la mwedi wa Nisani. Koopanga vyevi voumbuwela vyevyo Mulungu apangile liye vowavulumucha wu Iguputo ira kakale mu Ilambo Yolonjeziwa. Mu 33 C.E., Yesu na anamarumiwae koopanga mwambola wu Yelusalemu musubi la mudimu. Vomari-a Yesu oonga ira: ‘M’mo-i mwa nyo unoza andipeleke.’ Anamarumiwayo koodabwa vinjinji moi koomufuka Yesu ira: ‘Kodi ngu mbaani unoyo?’ Yesu oosomeda ira: ‘Unoyo ndinamuva-e miyo mkatela.’ Vanduli viwa oopeleka mkateyo wa Yudasi Isikariyoti. Thawi ineyo Yudasi ookumamo m’mbamo.

Yesu oopempela moi vanduli viwa oomeyameya mkate nopeleka wa anamarumiwayo . Teto oonga ira: ‘Djani mkatela. Unaimelela thuthu langa lelo ndinaze miyo ndilipeleke chifukwa ya nyo.’ Vanduli viwa oopempela teto nawili nopeleka vinyu wa anamarumiwayo. Oonga ira: ‘Ng’wani vinyula. Unaimelela magazanga anayo ndinaze miyo ndiapeleke na yolinga yoi machimo a athu kakululukiwe. Mupangenga vyevi chaka iliyetene vondiumbuwela. Ndinoulonjezani ira ninoza nilamulele limo-i udimu.’ Ambeela thawi ineyo o-arela a Kristu kanopanga mwambo owumbuwela khwa wae chaka iliyetene. Mwambola unaromoliwa ira Yodja Yamazulo ya Mbwiye.

Kangakede mari-a mwambola, anamarumiwayo koowambeela kangana. Khaniwa yali yoi mulukulu mbaani vaari viwa. Koma Yesu oowawandela ira: ‘Mulukulu vinjinji va etene nyen’ne ngunoyo unaviona ira ngumung’onong’ono vinjinji vaari vinyu.’

‘Nyo muli afwanga. Ndinouwandelani iliyetene ineyo Babanga ufunile liye ira ndiuwandeleni. Cheneneveva ndinodowa udimu wa Babanga. Athu kanoza kaiziwe ira muli ofunjedanga akala munatonyi-edana chikondi. Eno mutonyi-edanenga chikondi ngati mwemo miyo ndiutonyi-edeleni miyo.’

Vomari-a, Yesu oomuvepa Yehova ira aateteze ofunjedae. Oovepa teto ira aakami-e ira kapangenga vyongo mogwilizana koma teto mwamurendele. Vanduli viwa oovepa ira zina la Yehova liweli-iwe. Eno Yesu na anamarumiwayo kooimba nyimbo domutamanda Yehova vanduli viwa kookuma musubimo. Va sopano thawi yoi Yesu amangiwe yali ingaandamele.