Ofunjeda a Yesu Koowachela Zimu Owela

Vangavirile malambo 10 kumela vevo Yesu adowile liye udimu, ofunjedae koowachela zimu owela. Lali dambo la Pentekosite muchaka ya 33 C.E., mu Yelusalemu mookala athu anjinji okumela m’madela o-iyana-iyana anayo kazile umwambola. Ofunjeda a Yesu okwakwana 120 koosonkana musubi limo-i lamudimu. Mwazizizi, vooireya vyongo vyodabwi-a. Vyongo vimo-i vyooneya ngati lumi la mulo vyooneya va muru va wofunjeda uliwetene moi etene anayo koowambeela onga viongelo vyo-iyana-iyana. Vanduli viwa va nyumba yetene ineyo voovweya pokoso ngati liphevo lakopolo.

Athu anayo kazile wu Yelusalemu koovwa pokosolo moi kootamangela unyumba wewo wali anamarumiwayo ira kaone ineyo yaireya. Koodabwa vinjinji vwa ira ofunjedayo kananaonga viongelo viwa. Athwayo koonga ira: ‘Koma athwala mbau Galileya. Nanga vinawandeya avi ira kaongenga viongelo vi-u?’

Vanduli viwa Petulo na anamarumiwa amo-iwa kooimela nowambeela onga na athwayo. Petulo oowafotokozela ira Yesu oophiwa moi Yehova oomuvenyi-a. Eno oonga ira: ‘Vathawi ila Yesu uli udimu undanda lamanda la Mulungu moi univa-a zimu owela unoyo anilonjezile liye. Chi chifukwa iwa munaona vyodabwi-avi.’

Athwayo kookuziwa murima vinjinji na vyevyo Petulo aongile liye moi koomufuka ira: “Nipange n’ni veva?” Liye oowawandela ira: ‘Lapani machimwinyu teto mubatiziwe muzina la Yesu. Mwapanga eno nanyen’ne teto munoza muwachele zimu owela.’ Va dambo leli athu 3,000 koobatiziwa. Vingaireile eno, ofunjeda koowambeela enjedeleya vinjinji mu Yelusalemu. Zimu owela oowakami-a vinjinji anamurumiwala moi koogarati-a mipingo ira kawandenga funji-a athu vyongo vyetene vyevyo Yesu aalamulile liye.